Kwagagĩria Ũtungata Witũ—Kuonia Mwene Nyũmba Ũrĩa Twĩrutaga Bibilia Tũkĩhũthĩra Ibuku rĩa Bibilia Ĩrutanaga

Ũndũ Ũcio nĩ wa Bata Nĩkĩ? Andũ aingĩ no maage gũtaũkĩrũo rĩrĩa twamera atĩ nĩ twĩrutaga Bibilia na andũ kwao mĩciĩ hatarĩ marĩhi. Mahota gwĩciria marabatara kũingĩra kana kwĩandĩkithia gĩkundi-inĩ gĩa kwĩruta. Handũ ha kũmũũria kana no ende kwĩruta-rĩ, githĩ ti wega ũmuonie ũrĩa kwĩruta Bibilia gwĩkagwo? Ũkĩhũthĩra ndagĩka nini tu, o na ũrĩ mũrango-inĩ, no wonie mũndũ ũrĩa kwĩruta Bibilia arĩ ũndũ mũhũthũ na mwega.

Ũrĩa Tũngĩka:

Thutha wa kwĩmenyithania kũrĩ mwene nyũmba, no ũmũũrie kana hihi nĩ eciragia ũhoro wa ũtũũro wa ihinda rĩũkĩte.
Mwĩre atĩ andũ aingĩ nĩ meciragia ũndũ ũcio, na ũmuonie gĩcunjĩ kĩa Ũhoro Ũrĩa wĩ Thĩinĩ kĩa ibuku Bibilia Ĩrutanaga. Mũtaarĩrie atĩ ibuku rĩrĩ, rĩ na icunjĩ hũthũ gũtaũkĩrũo, ironania ũrĩa Bibilia ĩrutanaga igũrũ rĩgiĩ ihinda rĩũkĩte na maũndũ mangĩ, na ũmũũrie nĩ gĩcunjĩ kĩrĩkũ arona gĩkĩmũgucĩrĩria.
Mũnengere ibuku rĩmwe, na ũmũtware harĩ gĩcunjĩ kĩrĩa athuura. Mũtaarĩrie atĩ ciũria iria irĩ kĩambĩrĩria-inĩ gĩa gĩcunjĩ kĩu icoketio ibungo-inĩ iria irũmĩrĩire.
Ũria mwene nyũmba kana no ende gũthoma kĩbungo kĩa mbere. Ũcoke ũthome kĩũria gĩa kĩbungo kĩu na mwethe macokio mũrĩ hamwe. Rorai na mwarĩrĩrie maandĩko marĩa monanĩtio na maranyita mbaru macokio. Muonie ũrĩa ũkururĩire macokio ibuku-inĩ rĩaku.
Thiĩi kĩbungo-inĩ kĩrĩa kĩrũmĩrĩire, no rita rĩrĩ ũmũrie agerie gũcokia kĩũria kĩu na ciugo ciake.
Mũcokerie ngatho na ũbange gũcoka rĩngĩ nĩguo mũrĩkĩrĩrie gĩcunjĩ kĩu.
Ũngĩona kwagĩrĩire, muonie video ĩrĩ na kĩongo Wĩruti wa Bibilia Wĩkagwo atĩa? thĩinĩ wa website ya jw.org/ki.

Geria Gwĩka ũũ Mweri-inĩ Ũyũ:

Hoya Jehova arathime kĩyo gĩaku gĩa kũgĩa na mũrutwo mwerũ wa Bibilia.—Afil. 2:13.
Geria kuonia mwene nyũmba ũrĩa twĩrutaga Bibilia tũkĩhũthĩra ibuku Bibilia Ĩrutanaga, kana ũmuonie video ya Wĩruti wa Bibilia Wĩkagwo Atĩa? o na akorwo no rita rĩmwe ũrĩ ũtungata-inĩ.