Hihi Wee nĩ Ũgũkorũo na Kĩyo ta kĩa Jehova na Jesu Ihinda-inĩ Rĩrĩ rĩa Kĩririkano?

1. Aira a Jehova merutanagĩria mũno gwĩka atĩa ihinda-inĩ rĩa Kĩririkano?

¹ Jehova nĩ akoragwo na kĩyo mũno harĩ kũhingia muoroto wake. Rĩkĩaria ũhoro wa irathimo imwe cia Ũthamaki wa Ngai, rĩandĩko rĩa Isaia 9:7 riugaga ũũ: “Wĩrutanĩria wa Jehova Mũnene wa Ita nĩguo ũgatũma maũndũ macio moneke.” O ũndũ ũmwe na ũcio, Jesu nĩ onanirie kĩyo kĩnene harĩ ũthathaiya wa ma hĩndĩ ya ũtungata wake gũkũ thĩ. (Joh. 2:13-17; 4:34) O mwaka ihinda-inĩ rĩa Kĩririkano, ahunjia milioni nyingĩ thĩinĩ wa thĩ nĩ merutanagĩria mũno gũkorũo na kĩyo ta kĩa Jehova na Jesu na njĩra ya kuongerera ũtungata wao. Hihi wee nĩ ũgwĩka tao?

2. Gũkorũo na kĩyo gũgaatũtindĩka twĩke atĩa kwambĩrĩria Machi 7?

² Kũnyita Andũ Ũgeni: Mwaka ũyũ, wĩra wa kũnyita andũ ũgeni moke Kĩririkano ũkaambĩrĩria Njuuma Machi 7. Banga gũgaakorũo na itemi inene ũtungata-inĩ. Ahunjia thĩinĩ wa ciũngano nĩ magaakorũo na gĩkeno kĩnene makĩĩrutanĩria kũnyita ũgeni andũ aingĩ o ũrĩa kwahoteka thĩinĩ wa gĩcigo kĩao. Nĩ wega ũkeerutanĩria kũnyita ũgeni arutwo aku a Bibilia, arĩa ũcokagĩra, arĩa mũrutithanagia wĩra nao, andũ a famĩlĩ, na arĩa mũthomaga nao, na njĩra ya kũmahe karatathi ga kũnyitana ũgeni kana ũkĩhũthĩra jw.org.

3. Tũngĩongongerera ũtungata witũ atĩa mĩeri-inĩ ya Machi na Ĩpuro?

³ Painia wa Gũteithĩrĩria: Ningĩ kĩyo nĩ gĩgaatũtindĩka kuongongerera ũtungata witũ. Hatarĩ nganja, ahunjia aingĩ nĩ makaahota gũtuĩka mapainia a gũteithĩrĩria mĩeri-inĩ ya Machi na Ĩpuro, tondũ nĩ tũgaakorũo na mweke wa gũthuura kũhunjia mathaa 30. Hĩndĩ ya ũthathaiya wanyu wa famĩlĩ kana hĩndĩ ya wĩruti waku kĩũmbe, wĩcũranie na njĩra ya mahoya ũrĩa ũngĩtuĩka painia wa gũteithĩrĩria. (Thim. 15:22) Kĩyo gĩaku wĩra-inĩ wa kũnyita andũ ũgeni moke Kĩririkano no gĩkĩre arĩa angĩ ngoro o nao merutanĩrie. Angĩkorũo nĩ ũgwĩka mogarũrũku nĩguo wongerere ũtungata waku, ũgũkorũo ũkĩĩgerekania na Jesu harĩ kuonania kĩyo.—Mar. 6:31-34.

4. Nĩ irathimo irĩkũ ciumanaga na gũkorũo na kĩyo ta kĩa Jehova na Jesu?

⁴ Gũkorũo na kĩyo ta kĩa Jehova na Jesu ihinda-inĩ rĩrĩ rĩa Kĩririkano nĩ gũgũtũrehera irathimo nyingĩ. Andũ aingĩ gĩcigo-inĩ kĩrĩa tũhunjagia nĩ mekũgĩa na mweke wa kũhunjĩrio. Nĩ tũkwĩgĩra na gĩkeno na kũiganĩra kũrĩa kuumanaga na kũheana na gũtungatĩra Jehova. (Atũm. 20:35) Makĩria ma ũguo, nĩ tũgũkenia Ngai witũ ũrĩ kĩyo o hamwe na Mũriũ wake.