Kwĩruta Kuumana na Ahunjia Arĩa Marĩ na Ũmenyeru
Nĩ tũkenaga mũno nĩ gũkorũo na ahunjia marĩ na ũmenyeru kĩũngano-inĩ. Amwe ao makoretwo magĩtungatĩra Jehova marĩ ehokeku ihinda iraya. Angĩ nao mahota gũkorũo magĩte na ũmenyeru ũtungata-inĩ ica ikuhĩ. Ahunjia aya nĩ meyoneire ũrĩa Jesu akoretwo agĩtongoria kĩũngano gĩa Gĩkristiano na njĩra ya kwaramia wĩra wa kũhunjia na wa gũtua andũ arutwo. (Mat. 28:19, 20) Gũtungata na njĩra ĩyo nĩ kũmateithĩtie kũgĩa na ‘ũhoti ũrĩa ũkĩrĩrĩirie’ rĩrĩa macemania na moritũ kana magerio. (2 Kor. 4:7) No twĩrute maũndũ maingĩ kuumana na ahunjia acio marĩ na ũmenyeru. Nĩ makenaga mũno rĩrĩa maheo mweke wa kũruta arĩa angĩ maũndũ marĩa merutĩte. (Thab. 71:18) Nĩ ũndũ ũcio, nĩ wega gwetha mĩeke ya kwĩruta kuumana nao. Tũngĩka ũguo atĩa?
Ũtungata-inĩ. Nĩguo ahunjia erũ kana arĩa matarĩ na ũmenyeru magĩe na moimĩrĩro mega, nĩ mabataraga kũmenyerio. No twĩrute maũndũ maingĩ tũngĩĩrorera ahunjia arĩa marĩ na ũmenyeru makĩhunjia. (Rora gĩcunjĩ kĩa, “Thiĩ na Mbere Gũkorũo na Kĩyo Ũtungata-inĩ,” kĩbungo gĩa gatatũ rungu rwa kĩongo “Teithagia Arĩa Matarĩ na Ũmenyeru,” thĩinĩ wa Mũrangĩri wa Februarĩ 15, 2015.) Ũgunĩkĩte atĩa nĩ kũhunjia hamwe na ahunjia acio marĩ na ũmenyeru?
Hihi no ũbange kũhunjia na mũhunjia ũmwe ũrĩ na ũmenyeru? Angĩkorũo ndarĩ na ũgima mwega wa mwĩrĩ, no ũbange gũthomera na mũrutwo waku wa Bibilia mũciĩ gwake. Thutha wa kwĩruta, no ũrie mũhunjia ũcio agũtaare kuumana na maũndũ marĩa ona.
Kũhũthĩra Mahinda Hamwe Nao: Hũthĩra mahinda hamwe nao nĩguo ũmamenye wega. Nyita ũgeni ũmwe wao ũthathaiya-inĩ wanyu wa famĩlĩ na ũmũhoe ũhoro. Angĩkorũo mũhunjia ũcio ndarĩ na ũgima mwega wa mwĩrĩ, hihi no mũbange gwĩkĩra ũthathaiya wa famĩlĩ gwake mũciĩ? Mũrie ũrĩa aamenyire ũhoro wa ma. Nĩ irathimo irĩkũ agĩte nacio? Onete ũhoro wa ma ũgĩkũra atĩa gĩcigo-inĩ kĩu? Agĩte na gĩkeno kĩrĩkũ nĩ ũndũ wa gũtungatĩra Jehova?
Ndũkerĩgĩrĩre maũndũ maingĩ kuuma kũrĩ o, gũkĩra marĩa mangĩhota gwĩka. O ta ithuĩ, ahunjia acio marĩ na ũmenyeru, makoragwo na iheo itiganĩte. (Rom. 12:6-8) Amwe nĩ akũrũ na no maremwo nĩ kũhũthĩra mahinda maingĩ na ithuĩ ta ũrĩa tũngĩenda. O na kũrĩ ũguo, no twĩrute maũndũ maingĩ kuuma kũrĩ o nĩ ũndũ wa ũmenyeru ũrĩa magĩte naguo magĩtungatĩra Jehova marĩ ehokeku.