Kwagagĩria Ũtungata Witũ—Kũmenyeria Arũtwo Erũ

Ũndũ Ũcio nĩ wa Bata Nĩkĩ? Arũmĩrĩri erũ a Jesu no mũhaka merute kũrũmia “maũndũ marĩa mothe” aathanire, na maũndũ macio nĩ hamwe na kũruta andũ arĩa angĩ ũhoro wa ma. (Mat. 28:19, 20) Andũ aingĩ erũ nĩ magĩrĩire kũingĩra Cukuru ya Ũtungata wa Gĩtheokrasi na kwahoteka nĩ mahunjĩirie andũ a famĩlĩ ciao kana arata. O na kũrĩ ũguo, o ũrĩa marathiĩ na mbere gũkũria wendo wao harĩ maũndũ marĩa mareruta, na kũgĩa na ũmenyo atĩ Jehova endaga andũ othe maigue ũhoro ũrĩa mwega, no monanie wendi wao wa kũhunjĩria andũ. (Rom. 10:13, 14) Rĩrĩa arutwo matuĩka ahunjia matarĩ abatithie, kũmenyerio wega nĩ gũkũmateithia makorũo na ũmĩrĩru rĩrĩa maroya ikinya rĩrĩ rĩa bata mũno harĩ gũkũra kwao kĩĩroho.—Luka 6:40.

Ũrĩa Tũngĩka:

Teithia mũhunjia ũcio oe mabuku marĩa ekũbatara akĩhunjia na akĩrutana. Muonie ũrĩa ũbangaga mondo yaku ya kũhunjia, na ũmũtaarĩrie wĩra wa o ibuku rĩrĩa ũkuaga.
Thuurai kaũndũ karĩa mũngiuga kuuma thĩinĩ wa Ũtungata Witũ wa Ũthamaki na mwĩmenyerie hamwe. Mwĩkĩre ngoro oige kaũndũ kau akĩhũthĩra ciugo ciake mwene. Wĩmenyeriei ciikaro iria irĩ thĩinĩ wa ibuku rĩa Cukuru ya Ũtungata, karatathi ka 82, iria ihutĩtie gĩcigo kĩanyu. Tĩtĩrithia bata wa kwĩhumba na kwĩgemia na njĩra ya gĩtĩo.—2 Kor. 6:3, 4.
Ndũgatige kũmũmenyeria. Muonie kandi ya gĩcigo gĩa kũhunjia, na ũmũrute ũrĩa Rekodi ya Nyumba kwa Nyumba ĩhũthagĩrũo. Muonie ũrĩa mũndũ amĩihũragia ahunjĩria mũndũ wakenio nĩ ndũmĩrĩri. Mũrute kũhũthĩra jw.org ũtungata-inĩ o hamwe na kabuku ka Good News for People of All Nations. Muonie ũrĩa angĩteithia mũndũ athiĩ na mbere kũgucĩrĩrio nĩ ndũmĩrĩri itũ.—1 Kor. 3:6.
Korũo na wetereri, na ũmũgathĩrĩrie. (Thim. 25:11) Korũo ũrĩ kĩonereria kĩega. Kĩyo gĩaku hamwe na kũmuonia atĩ nĩ ũrakenio nĩwe gũgũkorũo na moimĩrĩro mega harĩ mũrutwo mĩaka-inĩ ĩrĩa ĩgũka.

Geria Gwĩka ũũ Mweri-inĩ Ũyũ:

Hunjia nyũmba kwa nyũmba na mũrutwo waku wa Bibilia, na ũmũtware gũcokera mũndũ wahunjĩirie, kana mũndũ ũreruta Bibilia. Angĩkorũo ndũrĩ na mũrutwo wa Bibilia, ũria mũhunjia ũtarĩ na ũmenyeru mũnene mũhunjie nake.