Ũrĩa Tũngĩkinyĩra Ngoro cia Andũ Arĩa Tũreruta Nao
1. Ũrutani wa Jesu warĩ na moimĩrĩro marĩkũ harĩ ngoro cia athikĩrĩria ake?
1 Jesu Kristo nĩ aakinyagĩra ngoro cia athikĩrĩria ake. Hĩndĩ ĩmwe, ngoro cia arutwo ake nĩ ‘ciahĩahĩaga’ thutha wa kũmataarĩria Maandĩko wega. (Luk. 24:32) Tondũ no mũhaka twathĩkagĩre Ngai kuuma ngoro-rĩ, tũngĩhota atĩa gũkinyĩra ngoro cia arĩa tũreruta nao nĩguo meke mogarũrũku ũtũũro-inĩ wao?—Rom. 6:17.
2. Kũhũthĩra ũũgĩ na ũtaũku gũteithagia atĩa gũkinyĩra ngoro ya mũndũ?
2 Hũthĩra Ũũgĩ na Ũtaũku: Harĩ andũ aingĩ, o kũmeera tu ũndũ ũrĩa wagĩrĩire na ũrĩa ũtagĩrĩire gũtingĩtũma moe ikinya. Kũingĩrĩra wĩtĩkio wa ndini ciao na njĩra ya kũmathomera maandĩko maingĩ o na no gũtũme marege gũthikĩrĩria. Nĩguo tũhote gũteithia mũrutwo, no mũhaka twambe tũmenye itũmi cia maũndũ marĩa etĩkĩtie na marĩa ekaga. Tũngĩthuura ciũria cia mawoni na njĩra ya ũũgĩ, ũndũ ũcio no ũtũme eyarie kuuma ngoro. (Thim. 20:5) Hĩndĩ ĩyo norĩo tũngĩhota gũthuura ũhoro ũrĩa ũngĩhutia ngoro yake kuuma Kiugo-inĩ kĩa Ngai. Kwoguo, no mũhaka tuonanie atĩ nĩ tũrakenio nĩwe na tũkorũo na wetereri. (Thim. 25:15) Ririkana atĩ andũ amwe makũraga kĩĩroho na ihenya na angĩ magakũra kahora. Heaga roho mũtheru wa Jehova ihinda nĩguo ũhutie mwĩcirĩrie na ciĩko ciao.—Mar. 4:26-29.
3. Tũngĩteithia atĩa arĩa twĩrutaga nao makũrie ngumo njega?
3 Mateithie Makũrie Ngumo Njega: Icunjĩ cia Bibilia iria cionanagia wega wa Jehova na wendo wake no iteithie andũ arĩa twĩrutaga nao makũrie ngumo njega. No tũhũthĩre maandĩko ta Thaburi 139:1-4 kana Luka 12:6, 7 kuonania ũrĩa Ngai akenagio nĩ o ũmwe witũ. Rĩrĩa andũ makenera ũtugi mũnene wa Jehova kuuma ngoro, wendo na wĩrutĩri wao harĩ Ngai nĩ ũgũkũra. (Rom. 5:6-8; 1 Joh. 4:19) Ningĩ rĩrĩa meruta atĩ mĩthiĩre yao nĩ ĩhutagia Jehova, no mekĩrũo ngoro gwĩkaga maũndũ na njĩra ĩrĩmũkenagia na ĩkamũtĩithia.—Thab. 78:40, 41; Thim. 23:15.
4. Tũngĩonania atĩa atĩ nĩ tũheete gĩtĩo wĩyathi wa mũndũ wa gwĩthuurĩra rĩrĩa tũreruta na andũ ũtungata-inĩ witũ?
4 Jehova nderaga mũndũ o na ũmwe athĩkĩre maathani make kĩa hinya. Ithenya rĩa ũguo, onagia andũ atĩ kũrũmĩrĩra ũtaaro wake nĩ ũndũ wa ũũgĩ. (Isa. 48:17, 18) Twĩgerekanagia na Jehova rĩrĩa twarutana na njĩra ĩgũtũma andũ metuĩre matua. Hĩndĩ ĩrĩa andũ meyonera o ene bata wa gwĩka mogarũrũku ũtũũro-inĩ wao, moimĩrĩro makoragwo marĩ ma gũtũũra. (Rom. 12:2) Ningĩ ũndũ ũcio nĩ ũmagucagĩrĩria harĩ Jehova, “mũroria wa ngoro.”— Thim. 17:3.