Hihi nĩ Ũrehaarĩria nĩ Ũndũ wa Kĩririkano?

Pasaka ya mũico ya Jesu yarĩ ya mwanya. Tondũ gĩkuũ gĩake nĩ gĩakuhĩrĩirie, nĩ aabangire kũrĩanĩra Pasaka ĩyo hamwe na atũmwo ake na kwambĩrĩria gĩkũngũĩro kĩa o mwaka kĩa Irio cia Hwaĩ-inĩ cia Mwathani. Kwoguo agĩtũma Petero na Johana mathiĩ makahaarĩrie rumu ĩrĩa mangĩarĩrĩire. (Lu 22:7-13; rora mbica ngothi-inĩ.) Ũndũ ũcio ũratũririkania bata wa kwĩhaarĩria nĩ ũndũ wa Kĩririkano, kĩrĩa gĩgeekwo Machi 27. No kũhoteke ciũngano nĩ ciĩkĩte mĩbango ya nũũ ũkaaruta mĩario, ũhoro wa mũgate na ndibei, na maũndũ mangĩ. O na kũrĩ ũguo-rĩ, o mũndũ angĩĩhaarĩria atĩa we mwene nĩ ũndũ wa Kĩririkano?

Haarĩria ngoro yaku. Thoma na wĩcũranie ũthomi wa Bibilia wa Kĩririkano. No wone mũtaratara wa kũrũmĩrĩra thĩinĩ wa kabuku ga Gũthuthuria Maandĩko O Mũthenya. Ũhoro Muongerere wa B12 thĩinĩ wa Bibilia ya New World Translation ũrĩ na mũtaratara ũtaarĩirie ũhoro na njĩra ndikĩru makĩria. (Ningĩ no ũrore Kabuku ka Mũcemanio wa Ũtũũro na Ũtungata ka Ĩpuro 2020.) Famĩlĩ no cione ũhoro cingĩarĩrĩria hĩndĩ ya ũthathaiya wa famĩlĩ, wĩgiĩ bata wa ũkũũri thĩinĩ wa Fahirisi kana Ũteithio wa Ũthuthuria Harĩ Aira a Jehova.

Nyita andũ angĩ ũgeni. Nyitanĩra biũ wĩra-inĩ wa kũnyita andũ ũgeni. Wĩcirie ũhoro wa andũ arĩa ũngĩnyita ũgeni, ta andũ arĩa ũcokagĩra, andũ arĩa werutaga Bibilia nao tene, arata, na andũ a famĩlĩ. Athuri a kĩũngano magĩrĩirũo gũtigĩrĩra atĩ nĩ manyita ũgeni arĩa matigĩte kũnyitanĩra na kĩungano. Ririkana atĩ angĩkorũo mũndũ ndaikaraga gĩcigo-inĩ kĩanyu, no ũmenye mathaa na kũrĩa Kĩririkano gĩgeekĩrũo kũrĩa aikaraga, ũngĩhihinya ŨHORO WITŨ thĩinĩ wa jw.org, ũcoke ũthuure “Kĩririkano.”

Nĩ atĩa ũngĩ tũngĩka nĩguo twĩhaarĩrie?