Nĩ Mĩoroto Ĩrĩkũ ya Kĩĩroho Wĩigĩire Mwaka Mwerũ wa Ũtungata?

Mĩoroto ya kĩĩroho nĩ ũndũ o wothe twĩrutanagĩria kũhingia nĩguo tũtungatĩre Jehova makĩria na tũmũkenie. Nĩ ĩtũteithagia gũkũra kĩĩroho, na irathimo iria ĩtũmaga tũgĩe nacio nĩ ikĩrĩte mahinda na hinya ũrĩa tũngĩima. (1Ti 4:15) Twagĩrĩirũo gũikaraga tũkĩroraga mĩoroto ĩrĩa twĩigĩire nĩkĩ? Nĩ tondũ maũndũ maikaraga magĩcenjagia. No gũkorũo rĩu tũtingĩhota gũkinyĩra muoroto ũrĩa tweigĩire tene, kana tũkorũo nĩ tũũkinyĩrĩte na kwoguo tũbatare kwĩigĩra muoroto ũngĩ.

Ihinda rĩega rĩa kũrora mĩoroto itũ nĩ mbere ya mwaka mwerũ wa ũtungata kwambĩrĩria. No mwarĩrĩrie ũndũ ũcio hĩndĩ ya ũthathaiya wa famĩlĩ, na mwĩigĩre mĩoroto ĩrĩa mũngĩenda gũkinyĩra mwĩ mũndũ ũmwe ũmwe na mwĩ ta famĩlĩ.

Hihi nĩ mĩoroto ĩrĩkũ wĩigĩire maũndũ-inĩ maya marĩ haha kĩanda, na nĩ makinya marĩkũ ũbangĩte kuoya nĩguo ũmĩkinyĩre?