Ithuothe nĩ Twĩriragĩria Gũkorũo na Ũtũũro Mwega
Wendaga ũtũũro waku ũgaakorũo ũhaana atĩa mahinda marĩa maroka? O ta mũndũ ũngĩ o wothe, no mũhaka akorũo nĩ wendaga wee na famĩlĩ yaku mũgaakorũo na ũtũũro mwega mũrĩ na gĩkeno, ũgima mwega wa mwĩrĩ, thayũ, na mũgaacĩrĩte.
No andũ aingĩ nĩ monaga ta ũtũũro ũrĩa meriragĩria gũgaakorũo naguo ũtagaakinyanĩra. Nĩ meyoneire maũndũ materĩgĩrĩirũo magĩkĩka ta mũrimũ wa Korona, ũrĩa ũhutĩtie mĩtũũrĩre ya andũ aingĩ, ũkarehe moritũ ma kĩĩmbeca, na ũkooraga andũ aingĩ. Ũndũ ũcio nĩ ũtũmaga meyũrie ũrĩa ũtũũro wao wa mahinda marĩa maroka ũgaakorũo ũtariĩ.
Nĩ ũndũ wa kũrigwo ũrĩa gũgaathiĩ, andũ nĩ maracaria na kĩyo kĩndũ kĩngĩmateithia gũgaakorũo na ũtũũro mwega mahinda marĩa maroka. Andũ amwe meciragia atĩ nĩ kũrĩ hinya ũtarĩ wa ndũire ũngĩmateithia. Andũ angĩ nao mathingataga kwĩgĩĩra na gĩthomo na mbeca nyingĩ, magĩciria atĩ indo icio nĩ ikũmateithia kũgĩa na indo iria marabatara. Nao angĩ meciragia atĩ gũkorũo mũndũ arĩ mwega no kũmateithie kũgĩa na ũtũũro mwega.
Hihi maũndũ macio no magũteithie gũkaagĩa na ũtũũro mwega ta ũrĩa ũngĩenda? Nĩguo ũmenye kana no magũteithie, nĩ ũrabatara kũmenya ũhoro wa ciũria ici:
Ũtũũro waku wa mahinda mokĩte wĩhocetie harĩ kĩĩ?
Hihi gĩthomo na mbeca no iteithie mũndũ gũkorũo na ũtũũro mwega?
Hihi gũkorũo ũrĩ mũndũ mwega no gũgũteithie gũgaakorũo na ũtũũro mwega?
Ũngĩruta kũ ũtaaro wa kwĩhokeka wĩgiĩ mahinda mokĩte?
Kabuku gaka nĩ gegũgũteithia kũmenya macokio ma ciũria icio.