Hihi Gĩthomo na Mbeca no Iteithie Mũndũ Gũgaakorũo na Ũtũũro Mwega?

Andũ aingĩ meciragia atĩ andũ arĩa marĩ na gĩthomo kĩa igũrũ na atongu nĩ makoragwo na ũtũũro mwega. Metĩkĩtie atĩ gĩthomo kĩa yunivasĩtĩ no gĩteithie mũndũ gũkorũo arĩ mũruti wĩra mwega, gũkorũo na famĩlĩ njega, na gũkorũo arĩ raia mwega. Ningĩ metĩkĩtie atĩ gĩthomo kĩa igũrũ no gĩtũme mũndũ agĩe na wĩra mwega, na atĩ andũ arĩa monaga mbeca nyingĩ nĩ makoragwo na gĩkeno.

ŨNDŨ WĨKAGWO NĨ ANDŨ AINGĨ

Ta wĩcirie ũndũ waugirũo nĩ Zhang Chen, kuuma bũrũri wa China. Aaugire ũũ: “Ndetĩkĩtie atĩ nĩ ndabataraga ndigirii ya yunivasĩtĩ nĩguo njeherere ũthĩni, na atĩ wĩra wĩna mũcara mwega nĩ ũngĩandeithirie gũkorũo na ũtũũro mwega ũrĩ na gĩkeno.”

Nĩguo makorũo na ũtũũro mwega, andũ aingĩ mendaga gũthiĩ yunivasĩtĩ iria ciũĩkaine mũno, kaingĩ mabũrũri-inĩ mangĩ. Ũndũ ũcio nĩ wekĩkaga mũno mbere ya mũrimũ wa Korona ũũkĩte, ũrĩa watũmire andũ maremwo gũthiĩ mũno mabũrũri-inĩ mangĩ. Kĩndũ ta mĩaka ikũmi mĩhĩtũku, ũthuthuria ũmwe wekirũo nĩ woonanirie atĩ arutwo makĩria ma nuthu arĩa mathomagĩra mabũrũri-inĩ mangĩ maumĩte Asia.

Kaingĩ aciari nĩ merutanagĩria biũ nĩguo ciana ciao ithiĩ yunivasĩtĩ mabũrũri-inĩ mangĩ. Qixiang, kuuma Taiwan aaugire ũũ: “Aciari akwa matiarĩ na mbeca nyingĩ, no nĩ maatigĩrĩire atĩ niĩ na ciana icio ingĩ ithatũ citũ nĩ twathiĩ korenji bũrũri-inĩ wa Amerika (US).” Nĩguo mahote kũmarĩhĩra gĩthomo kĩu, aciari ake maabatarire kuoya marũni, o ta ũrĩa aciari aingĩ mekaga.

MAUMĨRĨRA MAKORETWO MARĨ MARĨKŨ?

Nĩ ma gĩthomo no kĩagagĩrie ũtũũro na njĩra itiganĩte, no ti hingo ciothe gĩteithagia arutwo ta ũrĩa mangĩenda. Kwa ngerekano, andũ aingĩ mationaga wĩra ũrĩa mangĩenda, o na thutha wa gũkorũo mahũthĩrĩte ihinda iraihu na mbeca nyingĩ magĩthoma. Riboti ĩmwe yaandĩkirũo nĩ Rachel Mui ngathĩti-inĩ ya Business Times bũrũri-inĩ wa Singapore yaugĩte ũũ: “Mũigana wa andũ arĩa marĩkĩtie yunivasĩtĩ matarĩ na wĩra ũrathiĩ wongererekete.” Mũndũ ũmwe mũthomu mũno wĩtagwo Jianjie ũikaraga Taiwan aaugire ũũ: “Andũ aingĩ matikoragwo na wa gwĩka, tiga gwĩtĩkĩra mawĩra marĩa matakonainie na gĩthomo kĩao.”

Arĩa monaga wĩra ũringaine na gĩthomo kĩrĩa marĩ nakĩo, no monaga atĩ ũtũũro wao ndũkoragwo ũtariĩ ta ũrĩa mangĩenda. Niran, kuuma Thailand nĩ oonire wĩra ũringaine na gĩthomo gĩake, thutha wa kũrĩkia gĩthomo kĩa yunivasĩtĩ Rũraya. Aaugire ũũ: “Ndigirii yakwa nĩ yandeithirie kuona wĩra wĩna mũcara mwega o ta ũrĩa nderĩgagĩrĩra. No nĩguo heo mũcara ũcio ndabataraga kũruta wĩra na kĩyo mathaa maingĩ. Thutha ũcio, kambuni ĩrĩa yanyandĩkĩte nĩ yabutire andũ aingĩ wĩra, na ndarĩ ũmwe wao. Nĩ ndamenyire atĩ ndũngĩĩhoka wĩra atĩ nĩ ũgũgũteithia kũgĩa na ũtũũro mwega mahinda marĩa maroka.”

O na andũ arĩa makoragwo marĩ atongu na monekaga ta marĩ na ũtũũro mwega, no macemanagia na mathĩna ma famĩlĩ, mĩrimũ, na mĩtangĩko ĩgiĩ mbeca. Katsutoshi kuuma bũrũri-inĩ wa Japan aaugire ũũ: “Ndarĩ na mbeca nyingĩ, no ndiarĩ na gĩkeno tondũ andũ arĩa angĩ nĩ maanjiguagĩra ũiru na makanjĩka maũndũ matarĩ mega.” Mũtumia ũmwe wĩtagwo Lam ũikaraga Vietnam aaugire ũũ: “Andũ aingĩ nĩ merutanagĩria nĩguo magĩe na mbeca nyingĩ magĩĩciria atĩ nĩ ikũmateithia kũgĩa na ũtũũro mwega, no handũ ha ũguo magĩaga na mathĩna maingĩ ma mwĩrĩ, na magathuthĩka ngoro.”

O ta Franklin, andũ aingĩ nĩ meyoneire atĩ nĩ kũrĩ maũndũ mangĩ ma bata makĩria ũtũũro-inĩ gũkĩra gũthingata gĩthomo kĩa igũrũ na ũtonga. Handũ ha gũthingata kwĩgĩĩra na ũtonga, andũ amwe merutanagĩria kũgĩa na ũtũũro mwega mahinda marĩa maroka na njĩra ya gũkorũo marĩ andũ ega, na gwĩka andũ arĩa angĩ maũndũ mega. Hihi ũndũ ũcio no ũtũme mũndũ agĩe na ũtũũro mwega mahinda marĩa maroka? Gĩcunjĩ kĩrĩa kĩrũmĩrĩire nĩ kĩarĩrĩirie ũndũ ũcio.