Rũmena Rũiyũrĩte Kũndũ Guothe
Andũ othe thĩinĩ wa thĩ manahutio nĩ ciĩko cia rũmena.
Thĩinĩ wa nyũmba cia mohoro na nenda cia ũkinyanĩria, nĩ kuongererekete riboti cia andũ maronania rũmena kwerekera andũ arĩa angĩ makĩhũthĩra ciugo, marũa, Intaneti, kana ciĩko. Ningĩ ta wĩcirie ũrĩa mũthutũkanio ũingĩhĩte, inyũrũri, irumi, andũ kwĩhĩtanĩra, ũici na ũthũkangia wa indo. Andũ kũndũ guothe nĩ monagio rũmena.
Kabuku gaka nĩ karonania ũrĩa rũmena rũngĩtoorio nĩguo rũtigathereme. Kĩu ti kĩroto, no nĩ ũndũ wa ma tondũ andũ aingĩ thĩinĩ wa thĩ nĩ mahotete gũtooria rũmena.