Kũrĩ Hĩndĩ Gũtagakorũo na Rũmena
O na tũngĩeheria rũmena ngoro-inĩ citũ, tũtingĩhota kũgirĩrĩria andũ arĩa matũthiũrũrũkĩirie kuonania rũmena. Andũ matarĩ na mahĩtia no mathiaga na mbere kuonio rũmena. Kwoguo-rĩ, nũũ hihi ũngĩniina rũmena tene na tene?
No Jehova Ngai wiki tu ũngĩhota kweheria biũ rũmena rũrĩa rũrĩ thĩinĩ wa thĩ ũmũthĩ. Bibilia ĩranĩire atĩ nĩ ageeka ũguo.—Thimo 20:22.
NGAI NĨ AKAANIINA IHUMO CIOTHE CIA RŨMENA
1. SHAITANI ŨRĨA MŨCUKANI. Shaitani, o we mũraika ũrĩa waremeire Ngai, nĩwe ũtũmĩte gũkorũo na rũmena rũrĩa rũrĩ kuo ũmũthĩ. Ngai nĩ akaaniina Shaitani o hamwe na andũ arĩa othe monanagia rũmena.—Thaburi 37:38; Aroma 16:20.
2. THĨ YA SHAITANI ĨRĨA ĨIYŨIRE RŨMENA. Ngai nĩ akaaniina kĩndũ o gĩothe gĩcogagĩra rũmena thĩinĩ wa thĩ, o hamwe na ateti marĩ ungumania na atongoria a ndini arĩa matũmaga andũ makũrie rũmena. Ningĩ Ngai nĩ akaaniina ahũũri biacara arĩa makoragwo marĩ akoroku na mahinyagĩrĩria andũ nĩguo megune o ene.—2 Petero 3:13.
3. KWAGA GŨKINYANĨRA KWA ANDŨ. Bibilia yugaga atĩ andũ othe nĩ maagaire kwaga gũkinyanĩra, ũguo nĩ kuuga makoragwo na mwerekera wa gwĩciria na gwĩka maũndũ marĩa matagĩrĩire. (Aroma 5:12) Mwerekera ũmwe mũũru tũkoragwo naguo nĩ kũmena andũ arĩa angĩ na kũmonia rũmena. Ngai nĩ agaateithia andũ gũtooria mĩerekera ĩyo yothe mĩũru yumanaga na kwaga gũkinyanĩra, na rũmena rũthire biũ.—Isaia 54:13.
BIBILIA NĨ ĨRANĨIRE THĨ ĨTARĨ NA RŨMENA
1. GŨTIGAAKORŨO NA WAGI WA KĨHOOTO. Ũthamaki wa Ngai nĩguo ũgaakorũo ũgĩathana thĩ yothe. Ũgaathana kuuma igũrũ na nĩ ũkaarehe kĩhooto tene na tene. (Danieli 2:44) Mũthutũkanio na kwaga gũkiranĩrĩria itigaakorũo kuo rĩngĩ. Ngai nĩ agaathondeka maũndũ mothe ma wagi wa kĩhooto marĩa andũ mahĩtũkagĩra ũmũthĩ.—Luka 18:7.
2. ANDŨ OTHE NĨ MAGAAKORŨO NA THAYŨ. Gũtirĩ mũndũ ũkaagerera moritũ marĩa maumanaga na ngũĩ kana mbaara. (Thaburi 46:9) Tondũ andũ othe thĩinĩ wa thĩ nĩ magaakorũo marĩ endi thayũ, kũndũ guothe nĩ gũgaakorũo na ũgitĩri.—Thaburi 72:7.
3. ANDŨ OTHE MAGAATŨŨRA TENE NA TENE MARĨ NA GĨKENO. Andũ othe thĩinĩ wa thĩ nĩ makoonanagia wendo. (Mathayo 22:39) Gũtirĩ mũndũ ũgaatangĩka nĩ ũndũ wa gwĩciria kana kũririkana maũndũ moru anahĩtũkĩra. (Isaia 65:17) Hĩndĩ ĩyo rĩrĩa rũmena ruothe rũkeherio, andũ “nĩ magaakena mũno nĩ ũndũ wa kũingĩhĩrũo nĩ thayũ.”—Thaburi 37:11.
Hihi no wende gũtũũra thĩinĩ wa thĩ ta ĩyo? O na ihinda-inĩ rĩrĩ, andũ aingĩ nĩ merutĩte gũtooria rũmena makĩhũthĩra motaaro ma Bibilia. (Thaburi 37:8) Ũguo nĩguo Aira a Jehova thĩinĩ wa thĩ yothe merutanagĩria gwĩka. O na gũtuĩka maumĩte ũndũire-inĩ ngũrani na mĩrerere ĩtiganĩte, nĩ mendaine na makoragwo na ũrũmwe.—Isaia 2:2-4.
Aira a Jehova no makene gũkuonia maũndũ marĩa merutĩte megiĩ kũhiũrania na wagi wa kĩhooto na mũthutũkanio. Maũndũ marĩa ũkwĩruta no magũteithie gũtooria rũmena na wambĩrĩrie kuonania wendo. Nĩ ũkwĩruta kuonagia andũ othe wendo nginya arĩa mangĩoneka matarĩ na ngatho kana marĩ na rũmena. Weka ũguo, nĩ ũgũkorũo na gĩkeno ihinda-inĩ rĩrĩ na nĩ ũrĩkoragwo na ũrata mwega hamwe na arĩa angĩ. Makĩria ma ũguo, nĩ ũkwĩruta ũrĩa ũngĩka nĩguo ũgaatũũra rungu rwa Ũthamaki wa Ngai rĩrĩa rũmena rũtagaakorũo kuo rĩngĩ.—Thaburi 37:29.