ŨRĨA TŨNGĨTOORIA RŨMENA

4 | Ngai no Agũteithie Gũtooria Rũmena

Ũrutani wa Bibilia:

“Maciaro ma roho nĩ wendo, gĩkeno, thayũ, wetereri, ũtugi, wega, wĩtĩkio, ũhooreri, na kwĩgirĩrĩria.”—AGALATIA 5:22, 23.

Ũguo nĩ Kuuga Atĩa?

Ngai no ateithie mũndũ kweheria rũmena. Roho wake mũtheru no ũtũteithie kũgĩa na ũmũndũ mwega ũrĩa tũtangĩhota kũgĩa naguo kũgerera hinya witũ ithuĩ ene. Kwoguo handũ ha kũgeria gũtooria rũmena kũgerera hinya witũ ithuĩ ene, twagĩrĩirũo kwĩhokaga ũteithio ũrĩa Ngai aheanaga. Tũngĩĩhokaga Ngai, nĩ tũrĩiguaga ta ũrĩa mũtũmwo Paulo aaiguaga, ũrĩa waandĩkire ũũ: “Maũndũ-inĩ mothe nĩ ngoragwo na hinya kũgerera ũrĩa ũũheaga hinya.” (Afilipi 4:13) Nĩ tũrĩhotaga kuuga ũũ: “Ũteithio wakwa uumaga kũrĩ Jehova.”—Thaburi 121:2.

Ũrĩa Ũngĩka:

“Jehova nĩ andeithĩtie ngatuĩka mũndũ wendete thayũ.”—WALDO

Hoyaga Jehova kuuma ngoro akũhe roho wake mũtheru. (Luka 11:13) Mũhoe agũteithie gũkorũo na ũmũndũ mwega. Wĩrute ũrĩa Bibilia yugaga igũrũ rĩgiĩ maũndũ marĩa mangĩgũteithia kweheria rũmena, ta gũkorũo na ngumo ta wendo, thayũ, wetereri, na kwĩgirĩrĩria. Etha njĩra cia gũkũria ngumo icio ũtũũro-inĩ waku. Na ũthondeke ũrata na andũ arĩa o nao marageria gũkũria ngumo ta icio. Andũ ta acio no “[magwĩkĩre] hinya ũhoro-inĩ wĩgiĩ wendo na ciĩko njega.”—Ahibirania 10:24.

Ũndũ Wonetwo—WALDO

Nĩ Aatooririe Rũmena

Waldo nĩ aacemanirie na maũndũ moru agĩkũra, ũndũ ũrĩa watũmire akũrie rũmena. Aaugire ũũ: “Kaingĩ nĩ ndarũaga na endia a ndawa cia kũrebia . . . Hĩndĩ ĩmwe, gĩkundi kĩa ekina-ĩ nĩ kĩarĩhire mũndũ ũmwe woĩkaine mũno anjũrage, no nĩ ndahotire gwĩthara ndĩ na nguraro ya kahiũ.”

Waldo ndaakenire rĩrĩa mũtumia wake aambĩrĩirie kwĩruta Bibilia na Aira a Jehova. Augaga ũũ: “Nĩ ndamenete Aira a Jehova mũno na maita maingĩ nĩ ndametaga ciugo njũru mũno. No hĩndĩ ciothe maakoragwo na thayũ.”

Thutha wa ihinda, Waldo o nake akĩambĩrĩria kwĩruta Bibilia. Aaugire: “Ndwarĩ ũndũ mũhũthũ kũhũthĩra maũndũ marĩa nderutaga. Ndetĩkĩtie atĩ gũtirĩ hĩndĩ ingĩahotire kũgirĩrĩria marakara makwa.” No harĩ ũndũ aathomire kuuma Bibilia-inĩ ũkĩmũteithia mũno.

Waldo athiĩte na mbere kuuga ũũ: “Mũthenya ũmwe, Alejandro ũrĩa wandutaga Bibilia, nĩ aanjĩrire thome Agalatia 5:22, 23. . . . Alejandro aanjĩrire atĩ ingĩahotire gũkũria ngumo icio kũgerera roho mũtheru wa Ngai no ti na hinya wakwa mwene. Ũũma ũcio nĩ wagarũrire biũ muonere wakwa wa maũndũ.”

Nĩ ũndũ wa kwĩhoka ũteithio wa Ngai, Waldo nĩ aahotire gũtooria rũmena. Aaugire ũũ: “Andũ a famĩlĩ na arata akwa a tene matiĩtĩkagia mona mogarũrũku marĩa njĩkĩte.” Oongereire ũũ: “Jehova nĩ andeithĩtie ngatuĩka mũndũ wendete thayũ.”