Mathĩna ma Kĩĩmeciria Marĩ Thĩinĩ wa Thĩ Yothe
“Hingo ciothe ndiagaga tũmĩtangĩko, nginya rĩrĩa itarĩ na gĩtũmi gĩa gũtangĩka.”
“Rĩrĩa ndĩraigua ngenete mũno, nĩ nyambagĩrĩria kũmaka. Nĩ ndĩyoneire atĩ rĩrĩa ndĩraigua ngenete mũno, njikaraga o ihinda inini ngambĩrĩria kũigua kĩeha.”
“Ndĩrutanagĩria kũhiũrania na o mũthenya na mathĩna maguo, no rĩmwe ndĩkoraga ndĩratangĩka nĩ ũndũ wa maũndũ mangĩ maingĩ.”
Ciugo icio ciaugirũo nĩ andũ maahiũranagia na thĩna wa kĩĩmeciria. Hihi wee wanaigua ũguo? Kana hihi nĩ harĩ mũndũ wendete wanaigua ũguo?
Angĩkorũo wanaigua ũguo, korũo na ma atĩ ndũrĩ wiki. Andũ aingĩ ũmũthĩ nĩ mahiũranagia na mathĩna ma kĩĩmeciria, mao ene kana ma andũ arĩa mendete.
Hatarĩ nganja, tũratũũra “mahinda ma ũgwati maritũ kũhiũrania namo” marĩa maratũma tũtangĩke na njĩra nyingĩ. (2 Timotheo 3:1) Ũthuthuria ũmwe woonanirie atĩ thĩinĩ wa thĩ yothe, mũndũ ũmwe harĩ andũ anana nĩ akoragwo na thĩna wa kĩĩmeciria. Nĩ ũndũ wa kĩngʼũki gĩa Korona, mwaka-inĩ wa 2020, andũ arĩa maarĩ na mĩtangĩko ya kĩĩmeciria nĩ moongererekire na gĩcunjĩ ta kĩa 26 harĩ 100, na arĩa maarĩ na mĩrimũ mĩnene ya kĩĩmeciria makĩongerereka na gĩcunjĩ ta kĩa 28 harĩ 100.
Nĩ ũndũ wa bata kũmenya mũigana wa andũ arĩa mahiũranagia na mĩtangĩko na mĩrimũ ya kĩĩmeciria. No nĩ ũndũ wa bata makĩria kũmenya ũrĩa wee o hamwe na andũ arĩa wendete mũngĩka nĩguo mũkorũo na ũgima mwega wa kĩĩmeciria.
Ũgima mwega wa kĩĩmeciria nĩ ũrĩkũ?
Rĩrĩa mũndũ arĩ na ũgima mwega wa kĩĩmeciria, aiguaga akenete, na nĩ ahotaga gwĩka maũndũ na njĩra ĩrĩa yagĩrĩire. No ahote gwĩtiiria mĩtangĩko ya o mũthenya, ahote kũruta wĩra wega, na aigue agĩkenera ũtũũro.
Thĩna wa kĩĩmeciria . . .
NDUUMANAGA na mũndũ gũkorũo arĩ na wathe.
NĨ MŨRIMŨ ũtũmaga mũndũ atangĩke na njĩra nene, na ũkahutia mwĩcirĩrie wake, ũrĩa araigua ngoro-inĩ, na mĩtugo yake.
Kaingĩ nĩ ũtũmaga mũndũ aritũhĩrũo kũgĩa ũrata na arĩa angĩ, na akaritũhĩrũo kũhiũrania na maũndũ ma o mũthenya.
Thĩna ũcio no ũhutie mũndũ o wothe gũtekũmakania ũkũrũ wake, ũndũire, rũrĩrĩ rwake, ndini yake, gĩthomo, kana ũhoti wake wa kĩĩmbeca.
Gũcaria ũteithio wa mathĩna ma kĩĩmeciria
Rĩmwe mũndũ no ambĩrĩrie gwĩka maũndũ na njĩra ngũrani, akambĩrĩria gũkoma mũno kana kwaga gũkoma toro wa kũigana, akambĩrĩria kũrĩa mũno kana kwaga kũrĩa ũrĩa ararĩaga mbere ĩyo, kana akaigua agĩtangĩka mũno kana arĩ na kĩeha. Ũndũ ta ũcio ũngĩkĩka, mũndũ no abatare gwetha mũndũ ũngĩmũteithia kũmenya kĩrĩa kĩratũma akorũo na mogarũrũku macio na ũrĩa angĩrigitwo. No hihi nũũ ũngĩmũteithia?
Jesu Kristo, ũrĩa nĩwe mũndũ ũrĩa mũũgĩ mũno wanatũũra gũkũ thĩ aaugire ũũ: “Andũ arĩa marĩ na ũgima mwega wa mwĩrĩ matibataraga ndagĩtarĩ, no arĩa arwaru nĩo mamũbataraga.” (Mathayo 9:12) Andũ arĩa marĩ na mathĩna ma mwĩrĩ mangĩcaria ũrigitani ũrĩa wagĩrĩire, no mahote kũmanyihanyihia, na mahote gũkorũo na ũtũũro mwega ũrĩ na gĩkeno. Nĩ ũndũ mwega harĩ andũ ta acio gũcaria ũrigitani o na ihenya, angĩkorũo thĩna wao nĩ wĩyumĩrĩtie mũno kana ũgaikara ihinda iraihu.a
O na gũtuĩka Bibilia ti ibuku rĩa maũndũ ma ũrigitani, ĩrĩ na ũhoro ũngĩtũteithia gũkorũo na ũgima mwega wa kĩĩmeciria. Tũragwĩkĩra ngoro ũthome icunjĩ iria irũmĩrĩire, iria irarĩrĩria ũrĩa Bibilia ĩngĩtũteithia kũhiũrania na mathĩna ma kĩĩmeciria.
a Kabuku gaka ka Mũrangĩri gationanĩtie nĩ ũrigitani ũrĩkũ mwega gũkĩra ũrĩa ũngĩ. O mũndũ nĩwe wagĩrĩirũo gũthuthuria na kinyi ũrigitani ũrĩa egũthuura.