4 | Bibilia nĩ Ĩheanĩte Ũtaaro Ũngĩgũteithia

Ũguo nĩ Kuuga Atĩa?

O na gũtuĩka Bibilia ti ibuku rĩa maũndũ ma ũrigitani, nĩ ĩheanaga ũtaaro ũngĩtũteithia. Ũtaaro ũcio no ũteithie mũndũ ũrĩ na mathĩna ma kĩĩmeciria. Reke tuone motaaro maigana ũna.

Kũhũthĩra Ũtaaro wa Rĩandĩko Rĩu Kũngĩteithia Atĩa?

“Andũ arĩa marĩ na ũgima mwega wa mwĩrĩ matibataraga ndagĩtarĩ, no arĩa arwaru nĩo mamũbataraga.”—MATHAYO 9:12.

Bibilia nĩ yonanagia atĩ rĩmwe no tũbatare gũcaria ũrigitani. Andũ aingĩ arĩa marĩ na mũrimũ wa meciria nĩ mateithĩkĩte na njĩra ya gũcaria ũhoro wa kwĩhokeka wĩgiĩ thĩna wao na gũthiĩ kũrĩ ndagĩtarĩ.

“Kũmenyeria mwĩrĩ kũrĩ ũguni.”—1 TIMOTHEO 4:8.

Gwĩka maũndũ ma kwagagĩria ũgima waku wa mwĩrĩ no gũgũteithie kwagagĩria ũgima waku wa kĩĩmeciria. Maũndũ macio nĩ ta gũkorũo na mũbango ũtaratĩrĩrio wa kũmenyeria mwĩrĩ, kũrĩaga irio cia kũguna mwĩrĩ, na gũkomaga toro wa kũigana.

“Ngoro ĩrĩ na gĩkeno nĩ ndawa njega, no roho mũthuthĩku nĩ ũniinaga mũndũ hinya.”—THIMO 17:22.

Gũthoma mĩhari ya Bibilia ĩngĩgwĩkĩra ngoro na gũcaria maũndũ ũngĩka maringaine na ũhoti waku no gũgũteithie gũikara ũkenete. Kũroraga maũndũ marĩa mega ũtũũro-inĩ na gwĩtĩkia atĩ maũndũ nĩ marĩagĩra mahinda mokĩte no gũgũteithie kũhiũrania na thĩna waku wa kĩĩmeciria.

“Ũũgĩ ũkoragwo na andũ arĩa enyihia.”—THIMO 11:2.

Rĩmwe no ũkore atĩ ndũrahota gwĩka maũndũ mothe marĩa ũngĩenda gwĩka, kwoguo koragwo wĩhaarĩirie gwĩtĩkĩra ũteithio wa andũ arĩa angĩ. Arata na andũ a famĩlĩ no kũhoteke no mende gũgũteithia, no marigwo nĩ ũrĩa mabatiĩ gwĩka. Meere ĩmwe kwa ĩmwe ũrĩa ũngĩenda magũteithie. Ndũkerĩgagĩrĩre maũndũ maingĩ mũno kuuma kũrĩ o, na ũmacokagĩrie ngatho hingo ciothe nĩ ũndũ wa gũgũteithia.

Ũrĩa Ũtaaro wa Bibilia Ũteithagia Arĩa Marĩ na Thĩna wa Kĩĩmeciria

“Nĩ ndamenyire harĩ ũndũ ũtaathiaga wega harĩ niĩ, na kwoguo ngĩcaria ũteithio wa ndagĩtarĩ. Ndagĩtarĩ nĩ aahotire kũmenya thĩna ũrĩa ndarĩ naguo. Ũndũ ũcio nĩ wandeithirie gũtaũkĩrũo nĩ thĩna wakwa na kũmenya njĩra itiganĩte iria ingĩarigitirũo nacio nĩguo njagagĩrie ũgima wakwa wa kĩĩmeciria.”—Nicole,a ũrĩa ũkoragwo na mũrimũ wa bipolar disorder.

“Nĩ nyonete atĩ gũthoma Bibilia tũrĩ na mũtumia wakwa tũtegũtĩĩrĩria nĩ kũndeithagia kwambĩrĩria o mũthenya ndĩ na maũndũ mega na ma gwaka meciria-inĩ makwa. Na kaingĩ rĩrĩa mũrimũ wakwa wahinyĩrĩria, ndiagaga mũhari ũkũnjĩkĩra ngoro.”—Peter, ũrĩa ũkoragwo na depression.

“Nĩ ndaritũhagĩrũo kwĩra arĩa angĩ igũrũ rĩgiĩ thĩna wakwa, tondũ nĩ ndaconokaga mũno. No mũrata ũmwe wakwa nĩ aathikĩrĩirie na kinyi, na arĩ na wendo nĩ aageririe gũtaũkĩrũo nĩ ũrĩa ndaiguaga. Nĩ aandeithirie mũno kũigua wega na kũigua atĩ ndirĩ wiki.”—Ji-yoo, ũrĩa thĩna wake ũtũmaga aremwo kwĩgirĩrĩria kũrĩa mũno.

“Bibilia nĩ ĩndeithĩtie kũiganania maũndũ na njĩra ya kwaga kũruta wĩra mũno na gũkorũo na mahinda ma kũigana ma kũhurũka. Ũũgĩ wayo nĩ ũndeithĩtie kũhiũrania na thĩna wakwa ũrĩa ũũhinyagĩrĩria ngoro na meciria.”—Timothy, ũrĩa ũkoragwo na mũrimũ wa obsessive-compulsive disorder.