Ririkanaga Atĩ Jehova nĩ “Ngai Ũrĩa Ũtũũraga Muoyo”

1. Nĩ kĩĩ gĩteithagia andũ a Jehova gũthiĩ na mbere kũmũthathaiya o na magĩcemanagia na moritũ?

BIBILIA yugaga atĩ tũratũũra “mahinda ma ũgwati maritũ kũhiũrania namo.” (2 Tim. 3:1) Andũ a Jehova nĩ macemanagia na moritũ marĩa mũndũ o wothe aragerera mũtabarĩre-inĩ ũyũ wa maũndũ, no ningĩ nĩ macemanagia na ũkararia na makanyarirũo. Nĩ kĩĩ gĩtũteithagia gũthiĩ na mbere gũthathaiya Jehova o na kũrĩ na moritũ macio? Ũndũ ũmwe wa bata nĩ atĩ nĩ tũmenyete atĩ Jehova nĩ “Ngai ũrĩa ũtũũraga muoyo.”—Jer. 10:10; 2 Tim. 1:12.

2. Nĩ kĩĩ kĩonanagia atĩ Jehova nĩ Ngai ũrĩa ũtũũraga muoyo?

² Jehova nĩ Ngai wa biũ ũrĩa ũtũtiiragĩrĩra hĩndĩ ya magerio, na agacaria mĩeke ya gũtũteithia. (2 Maũ. 16:9; Thab. 23:4) Kũririkana atĩ we nĩ Ngai ũrĩa ũtũũraga muoyo no gũtũhe hinya wa kũhiũrania na igerio o rĩothe tũngĩcemania narĩo. Reke tuone ũrĩa ũndũ ũcio wateithirie Mũthamaki Daudi.

3. Daudi eendaga kuuga atĩa rĩrĩa aaugire atĩ “Jehova arĩ muoyo”?

³ Daudi nĩ ooĩ Jehova na nĩ aamwĩhokete. Rĩrĩa Mũthamaki Saulu na thũ ingĩ cia Daudi ciageragia kũmũũraga, nĩ aahoire Jehova amũteithie. (Thab. 18:6) Daudi aaugire ũũ thutha wa Ngai gũcokia mahoya make na kũmũhonokia: “Jehova arĩ muoyo!” (Thab. 18:46) Hihi Daudi eendaga kuuga atĩa? Ibuku rĩmwe rĩa gũtaarĩria Bibilia riugaga atĩ Daudi eendaga kuonania aarĩ na ma atĩ Jehova “nĩ ngai ũtũũraga muoyo ũrĩa hingo ciothe ũrũagĩrĩra andũ ake.” Hatarĩ nganja, maũndũ marĩa Daudi eeyoneire nĩ maatũmĩte akorũo na ma atĩ Ngai wake arĩ muoyo, na ũndũ ũcio nĩ wekĩrire hinya itua rĩake rĩa gũthiĩ na mbere gũtungatĩra Jehova na kũmũgooca.—Thab. 18:​28, 29, 49.

4. Tũgunĩkaga atĩa nĩ ũndũ wa gũkorũo na ma atĩ Jehova nĩ Ngai ũrĩa ũtũũraga muoyo?

⁴ Tũngĩkoragwo na ma atĩ Jehova nĩ Ngai ũrĩa ũtũũraga muoyo, ũndũ ũcio no ũtũteithie kũmũtungatĩra na kĩyo. Nĩ tũrĩkoragwo na hinya wa gũkirĩrĩria magerio na tũkerutanĩria biũ ũtungata-inĩ wake. Ningĩ nĩ tũrĩkoragwo tũtuĩte itua rĩa gũtũũra hakuhĩ na Jehova.

NGAI ŨRĨA ŨTŨŨRAGA MUOYO NĨ ARĨKŨHEAGA HINYA

5. Nĩ kĩĩ kĩngĩtũteithia kũhiũrania na magerio tũrĩ na ũmĩrĩru? (Afilipi 4:13)

⁵ No tũhote gũkirĩrĩria igerio o rĩothe rĩrĩ inene kana inini, tũngĩririkanaga atĩ Jehova arĩ muoyo na atĩ nĩ arĩtũteithagia. Ririkana atĩ gũtirĩ thĩna tũngĩcemania naguo ũkĩrĩte ũhoti wa Ngai. Nĩwe Mwene-Hinya-Wothe, na no atũhe hinya wa gũkirĩrĩria. (Thoma Afilipi 4:13.) Kũmenya ũguo no gũtũteithie kũhiũrania na magerio tũrĩ na ũmĩrĩru. Kuona Jehova agĩtũteithia rĩrĩa twacemania na magerio matarĩ manene, no gũtũhe ũũma atĩ nĩ arĩtũteithagia o na rĩrĩa twacemania na magerio manene.

6. Nĩ maũndũ marĩkũ Daudi eeyoneire arĩ kamwana magĩtũma ehoke Jehova makĩria?

⁶ Ta wĩcirie maũndũ merĩ Daudi eeyoneire marĩa maatũmire ehoke Jehova o na makĩria. Arĩ kamwana akĩrĩithia ngʼondu cia ithe, kũrĩ hĩndĩ nduba na mũrũthi ciakuuire ngʼondu kuuma rũũru-inĩ. Mahinda-inĩ macio meerĩ, Daudi aarũmĩrĩire nyamũ icio arĩ na ũmĩrĩru, na akĩhonokia ngʼondu icio. No handũ ha kuona ta aahotete gwĩka ũguo na hinya wake mwene, aarĩ na ma atĩ Jehova nĩwe wamũteithirie. (1 Sam. 17:​34-37) Daudi ndaigana kũriganĩrũo nĩ maũndũ macio eeyoneire. Gwĩcũrania ũhoro wamo nĩ kwamũheaga ũũma atĩ Ngai ũrĩa ũtũũraga muoyo nĩ angĩamũheire hinya o na thutha ũcio.

7. Daudi aaigire meciria make ũndũ-inĩ ũrĩkũ, na gwĩka ũguo kwamũteithirie atĩa kũrũa na Goliathu?

⁷ Thutha-inĩ, hihi Daudi arĩ o mĩaka-inĩ ya ũtinĩnja, kũrĩ hĩndĩ aathiire gũceera kambĩ-inĩ ya mbũtũ ya Isiraeli. Aakorire thigari icio imakĩte mũno tondũ nĩ guokĩte irimũ inene rĩa Afilisti rĩetagwo Goliathu rĩrĩa ‘rĩanyũrũragia mbũtũ ya Isiraeli.’ (1 Sam. 17:​10, 11) Thigari icio ciatooririo nĩ guoya tondũ ciaroraga tu o ũrĩa Goliathu aarĩ na kĩũga kĩnene, na ciugo iria aamanyũrũragia nacio. (1 Sam. 17:​24, 25) No Daudi oonaga ũndũ ũcio na njĩra ngũrani. Daudi oonaga kũnyũrũria mbũtũ ya Isiraeli no ta kũnyũrũria “mbũtũ ya Ngai ũrĩa ũtũũraga muoyo.” (1 Sam. 17:26) Daudi aaigire meciria make harĩ ũhoti wa Jehova. Aarĩ na ma atĩ Ngai ũrĩa wamũteithagia hĩndĩ ĩrĩa aarĩithagia nĩ angĩamũteithirie o na ihinda-inĩ rĩu. Tondũ nĩ eehokete Jehova, nĩ aahotire kũngʼethanĩra na Goliathu na akĩmũtooria.—1 Sam. 17:​45-51.

8. Tũngĩka atĩa nĩguo twĩkĩre hinya mwĩhoko witũ harĩ Jehova rĩrĩa tũracemania na magerio? (Ningĩ rora mbica.)

⁸ O na ithuĩ no tũhote gũtooria magerio tũngĩririkanaga atĩ Ngai ũrĩa ũtũũraga muoyo nĩ ehaarĩirie gũtũteithia. (Thab. 118:6) No twĩkĩre hinya mwĩhoko witũ harĩ Jehova na njĩra ya gwĩcũrania maũndũ marĩa aneka ihinda ihĩtũku. Thomaga ngʼano cia Bibilia iria cionanagia ũrĩa Jehova aahonokirie ndungata ciake. (Isa. 37:​17, 33-37) Ningĩ no ũrorage ũhoro ũrĩa wĩkĩragwo website-inĩ itũ ya jw.org, ũrĩa wonanagia ũrĩa Jehova ateithĩtie aarĩ na ariũ a Ithe witũ mahinda-inĩ maya. Makĩria ma ũguo, ririkanaga mahinda marĩa Jehova anagũteithia. Ndũkamake o na angĩkorũo ndũrona ta harĩ ũndũ wa magegania agwĩkĩire, ta gũkũhonokia kuuma harĩ nduba kana mũrũthi. Ma nĩ atĩ Jehova nĩ agwĩkĩire maũndũ maingĩ ũtũũro-inĩ waku. Nĩ akũgucĩrĩirie nĩguo ũgĩe na ũrata wa hakuhĩ hamwe nake. (Joh. 6:44) O na nowe ũgũteithĩtie gũthiĩ na mbere kũmũtungatĩra. Kwoguo no ũmũũrie agũteithie kũririkana mahinda aacokirie mahoya maku, agĩkũhe ũteithio ihinda-inĩ rĩrĩa waũbataraga, kana agĩgũtiirĩrĩra ũkĩgerera ũndũ mũritũ. Gwĩcũranagia maũndũ ta macio no gũgũteithie gũkorũo na ma atĩ hingo ciothe Jehova nĩ arĩgũteithagia.

9. Nĩ atĩa tũbatiĩ kũririkana rĩrĩa tũracemania na magerio? (Thimo 27:11)

⁹ Kuona Jehova arĩ Ngai ũrĩa ũtũũraga muoyo nĩ gũtũteithagia gũkorũo na muonere ũrĩa wagĩrĩire wĩgiĩ magerio maitũ. Tũngiuga ũguo nĩkĩ? Tondũ ũndũ ũcio nĩ ũtũteithagia kũririkana atĩ magerio maitũ nĩ mahutanĩtie na ũndũ ũngĩ mũnene, wĩgiĩ thitango ĩrĩa Shaitani eerekeirie harĩ Jehova. Mũcukani augaga atĩ no tũtiganĩrie Jehova tũngĩcemania na moritũ. (Ayub. 1:​10, 11; thoma Thimo 27:11.) No rĩrĩa twakirĩrĩria moritũ tũrĩ ehokeku, tuonanagia atĩ nĩ twendete Jehova na tũkonania atĩ Shaitani nĩ mũheenania. Kwahoteka nĩ ũracemania na magerio, ta hihi gũũkĩrĩrũo nĩ thirikari, mathĩna ma kĩĩmbeca, kana andũ arĩa ũrahunjĩria makaga gũgũthikĩrĩria. Angĩkorũo nĩguo, ririkana atĩ ũndũ ũrĩa ũragerera nĩ ũrakũhe mweke wa gũkenia ngoro ya Jehova. Ningĩ ririkana atĩ ndangĩreka ũgerio gũkĩra ũrĩa ũngĩhota gwĩtiiria. (1 Kor. 10:13) Nĩ arĩkũheaga hinya wa gũthiĩ na mbere gũkirĩrĩria.

NGAI ŨRĨA ŨTŨŨRAGA MUOYO NĨ ARĨKŨRATHIMAGA

10. Nĩ ũndũ ũrĩkũ Ngai ũrĩa ũtũũraga muoyo ekagĩra arĩa mamũthathayagia?

¹⁰ Jehova nĩ aheaga arĩa mamũthathayagia ngerenwa. (Ahib. 11:6) Ihinda-inĩ rĩrĩ nĩ atũheaga thayũ na agatũteithia kũiganĩra, na ihinda rĩũkĩte nĩ agaatũhe muoyo wa tene na tene. Tũrĩ na ma biũ atĩ Jehova nĩ akoragwo na wendi wa gũtũrathima na nĩ arĩ ũhoti wa gwĩka ũguo. Gũkorũo na ũũma ũcio nĩ gũtũtindĩkaga gũthiĩ na mbere kũmũthathaiya na kĩyo, o ta ũrĩa ndungata ciake cia tene ciekaga. Ũguo nĩguo Timotheo eekaga.—Ahib. 6:​10-12.

11. Nĩ kĩĩ gĩatindĩkaga Timotheo kwĩrutanĩria mawĩra-inĩ ma kĩũngano? (1 Timotheo 4:10)

¹¹ Thoma 1 Timotheo 4:10. Timotheo aarĩ na wĩtĩkio mũrũmu harĩ Ngai ũrĩa ũtũũraga muoyo. Nĩkĩo eerutanagĩria ũtungata-inĩ wake. Eekaga ũguo atĩa? Mũtũmwo Paulo nĩ aamwĩkagĩra ngoro kwagagĩria ũhoti wake wa kũrutana na wa kwaria mbere ya andũ. Ningĩ Paulo nĩ aamwĩrire atuĩke kĩonereria kĩega harĩ Akristiano arĩa angĩ, ethĩ na akũrũ. Makĩria ma ũguo Timotheo nĩ eehokeirũo mawĩra mamwe maritũ, ta megiĩ kũheana ũtaaro mũrũmu na njĩra ya wendo kũrĩ arĩa maaũbataraga. (1 Tim. 4:​11-16; 2 Tim. 4:​1-5) Timotheo aarĩ na ma atĩ Jehova nĩ ekũmũrathima o na rĩrĩa andũ arĩa angĩ maga kuona wĩra ũrĩa ahingĩtie, kana maga kũmũcokeria ngatho.—Rom. 2:​6, 7.

12. Athuri a kĩũngano merutanagĩria mawĩra-inĩ marĩa mehokeirũo nĩkĩ? (Ningĩ rora mbica.)

¹² O na athuri a kĩũngano ũmũthĩ no makorũo na ma atĩ Jehova nĩ onaga wĩra wao mwega na agakenio nĩguo. Makĩria ma kũrutana, gũthiĩ maceera ma ũrĩithi, na kũhunjia, athuri aingĩ a kĩũngano nĩ mateithagĩrĩria mĩako-inĩ ya ithondeka na magateithĩrĩria hĩndĩ ya icanjama cia ndũire. Angĩ nao nĩ makoragwo ikundi-inĩ cia gũceerera arwaru kana Kamĩtĩ-inĩ cia Ũiguano na Thibitarĩ. Athuri a kĩũngano nĩ makoragwo mehaarĩirie kũruta mawĩra ta macio tondũ nĩ moĩ atĩ kĩũngano nĩ kĩa Jehova no ti kĩa mũndũ. Kwoguo nĩ merutanagĩria biũ mawĩra-inĩ marĩa mehokeirũo marĩ na ma atĩ Jehova nĩ ekũmarathima nĩ ũndũ wa kĩyo kĩao.—Kol. 3:​23, 24.

13. Jehova aiguaga atĩa nĩ ũndũ wa maũndũ marĩa twĩrutanagĩria gwĩka ũtungata-inĩ wake?

¹³ Ti ithuothe tũngĩtuĩka athuri a kĩũngano. No o ũmwe witũ arĩ na kĩndũ angĩhe Jehova. Ngai witũ nĩ akenaga rĩrĩa twerutanĩria ũrĩa wothe tũngĩhota kũmũtungatĩra. Nĩ akenagio nĩ mĩhothi ĩrĩa tũrutaga harĩ gũteithĩrĩria wĩra wa thĩ yothe, o na ĩngĩkorũo ĩrĩ mĩnini. Nĩ akenaga rĩrĩa twerutanĩria kuoya guoko mĩcemanio-inĩ nĩguo tũrute macokio o na tũrĩ na thoni, na agakena rĩrĩa tuohera arĩa matũhĩtĩirie. O na angĩkorũo ũrona ta ũtarahota kũhingia maũndũ maingĩ ta ũrĩa ũngĩenda, korũo na ma atĩ Jehova nĩ akenagio nĩ marĩa ũrahota kũhingia. Nĩ akwendete nĩ ũndũ wa kĩyo gĩaku, na nĩ arĩkũrathimaga.—Luk. 21:​1-4.

TŨŨRA HAKUHĨ NA NGAI ŨRĨA ŨTŨŨRAGA MUOYO

14. Gũtũũra hakuhĩ na Jehova kũrĩtũteithagia atĩa gũikara tũrĩ ehokeku? (Ningĩ rora mbica.)

¹⁴ Tũngĩkoragwo na ũrata wa hakuhĩ hamwe na Jehova, nĩ tũrĩonaga ũrĩ ũndũ mũhũthũ gũikara tũrĩ ehokeku harĩ we. Ũndũ ũcio nĩguo wateithirie Jusufu. Nĩ aaregire biũ kwĩingĩria mĩtugo-inĩ ya waganu. Nĩ ooĩ atĩ Ngai nĩ aramuona na ndangĩendire kũmũrakaria. (Kĩam. 39:9) Nĩguo tũkorũo na ũrata wa hakuhĩ hamwe na Jehova, nĩ tũrabatara gũcaragia mahinda ma kũmũhoya na kwĩruta Kiugo gĩake. Tweka ũguo, ũrata witũ hamwe nake nĩ ũgũthiĩ na mbere gũkũra. Twakorũo na ũrata wa hakuhĩ na Jehova o ta Jusufu, nĩ tũrĩĩthemaga gwĩka ũndũ o wothe ũngĩmũrakaria.—Jak. 4:8.

15. Tũreruta atĩa kuumana na ũrĩa gwathiire harĩ Aisiraeli rĩrĩa maarĩ werũ-inĩ? (Ahibirania 3:12)

¹⁵ Arĩa mariganagĩrũo atĩ Jehova nĩwe Ngai ũrĩa ũtũũraga muoyo, no mamũraihĩrĩrie na njĩra hũthũ. Ta wĩcirie ũrĩa gwathiire harĩ Aisiraeli rĩrĩa maarĩ werũ-inĩ. Nĩ maamenyaga atĩ Jehova arĩ kuo, no nĩ maambĩtie kũgĩa na nganja kana nĩ arĩmaheaga kĩrĩa marabatara. O na kũrĩ hĩndĩ mooririe ũũ: “Hihi Jehova arĩ hamwe na ithuĩ-ĩ, kana ndarĩ hamwe na ithuĩ?” (Tham. 17:​2, 7) Mũthia-inĩ nĩ maaremeire Jehova. Hatarĩ nganja tũtingĩenda kũrũmĩrĩra kĩonereria kĩu kĩao kĩũru.—Thoma Ahibirania 3:12.

16. Nĩ ũndũ ũrĩkũ ũngĩgeria wĩtĩkio witũ?

¹⁶ Andũ thĩinĩ wa thĩ no matũme ũkorũo ũrĩ ũndũ mũritũ harĩ ithuĩ gũtũũra hakuhĩ na Jehova. Andũ aingĩ matiĩtĩkĩtie atĩ nĩ kũrĩ Ngai. Kaingĩ andũ arĩa matarũmagĩrĩra wendi wa Ngai monekaga makĩgaacĩra. Ũndũ ũcio no ũgerie wĩtĩkio witũ. O na gũtuĩka nĩ twĩtĩkĩtie atĩ Ngai arĩ kuo, no twambĩrĩrie gwĩkĩrĩra nganja kana nĩ arĩtũteithagia. Kũrĩ hĩndĩ mwandĩki wa Thaburi ya 73 eekagĩrĩra nganja ũndũ ũcio. Nĩ oonaga andũ arĩa maamũthiũrũrũkĩirie makĩagarara mawatho ma Ngai, ĩndĩ no maakenagĩra ũtũũro. Nĩ ũndũ ũcio, akĩambĩrĩria kuona ta gũtungatĩra Ngai gũtarĩ ũguni.—Thab. 73:​11-13.

17. Nĩ kĩĩ kĩrĩtũteithagia gũtũũra hakuhĩ na Jehova?

¹⁷ Nĩ kĩĩ gĩateithirie mwandĩki ũcio wa Thaburi kũrũnga mwĩcirĩrie wake? Nĩ eecũranirie ũrĩa kũngĩathiire harĩ andũ arĩa matigaga kwĩhoka Jehova. (Thab. 73:​18, 19, 27) Ningĩ nĩ eecũranirie irathimo cia gũtungatĩra Jehova. (Thab. 73:24) O na ithuĩ no twĩcũranagie ũhoro wĩgiĩ irathimo iria Jehova atũheete. Ningĩ no tũgerie gwĩciria ũrĩa ũtũũro witũ ũngĩkorũo ũhaana korũo tũtitungatagĩra Jehova. Gwĩka ũguo no gũtũteithie gũtũũra tũrĩ ehokeku na gũtua itua o ta rĩrĩ rĩa mwandĩki ũcio wa Thaburi: “Niĩ-rĩ, gũkuhĩrĩria Ngai nĩkuo kwega na niĩ.”—Thab. 73:28.

18. Nĩ kĩĩ kĩngĩtũma tũkorũo na ũmĩrĩru wa kũngʼethanĩra na ihinda rĩrĩa rĩũkĩte?

¹⁸ No tũhote kũhiũrania na ũritũ o wothe tũngĩcemania naguo matukũ-inĩ maya ma kũrigĩrĩria, tondũ tũrĩ “ngombo cia Ngai ũrĩa wa ma ũtũũraga muoyo.” (1 Thes. 1:9) Ngai witũ nĩ atũrũmbũyagia na hingo ciothe nĩ arĩtũteithagia. Nĩ oonanirie atĩ aarĩ hamwe na ndungata ciake mahinda-inĩ ma tene, na arĩ o hamwe na ithuĩ mahinda-inĩ maya. Ica ikuhĩ nĩ tũkũngʼethanĩra na thĩna mũnene ũtarĩ woneka thĩinĩ wa thĩ, no tũtigaakorũo tũrĩ oiki. (Isa. 41:10) Rekei ithuothe “tũkoragwo na ũmĩrĩru mũnene wa kuuga: ‘Jehova nĩwe mũndeithia; ndigwĩtigĩra.’”—Ahib. 13:​5, 6.