GĨCUNJĨ KĨA WĨRUTI GĨA 17
RWĨMBO NA. 99 Makiri Maingĩ ma Ariũ a Ithe Witũ
Gũtirĩ Hĩndĩ Tũkoragwo Tũrĩ Oiki
“Nĩ ngũgũteithia.”—ISA. 41:10.
ŨNDŨ ŨRĨA WARĨRĨIRIO
Njĩra inya iria Jehova atũrũmbũyagia nacio.
1-2. (a) Nĩ kĩĩ kĩngĩtũma tũkorũo na ma atĩ tũtikoragwo tũrĩ oiki rĩrĩa tũracemania na magerio? (b) Tũkwarĩrĩria maũndũ marĩkũ gĩcunjĩ-inĩ gĩkĩ?
RĨRĨA tũracemania na magerio maritũ, no tũigue ta tũrĩ ithuiki gatarũ-inĩ karĩ iria-inĩ rĩrĩ na kĩhuhũkanio kĩnene. O na kũrĩ ũguo, tũtikoragwo tũrĩ oiki. Ithe witũ wa igũrũ nĩ onaga moritũ marĩa tũcemanagia namo, na nĩ atwĩrĩire atĩ nĩ arĩtũteithagia kũhiũrania namo. Jehova atũheete ũũma ũyũ thĩinĩ wa Bibilia: “Nĩ ngũgũteithia.”—Isa. 41:10.
2 Thĩinĩ wa gĩcunjĩ gĩkĩ tũkwarĩrĩria ũrĩa Jehova atũteithagia na njĩra ya (1) gũtũhe ũtongoria, (2) gũtũhingĩria mabataro maitũ, (3) gũtũgitĩra, na (4) gũtũũmĩrĩria. Gũtekũmakania moritũ marĩa tũcemanagia namo ũtũũro-inĩ, Jehova atwĩrĩire atĩ gũtirĩ hĩndĩ akaariganĩrũo nĩ ithuĩ o na kana atũtiganĩrie. Kwoguo gũtirĩ hĩndĩ tũkoragwo tũrĩ oiki.
JEHOVA NĨ ATŨTONGORAGIA
3-4. Jehova atũtongoragia atĩa? (Thaburi 48:14)
3 Thoma Thaburi 48:14. Jehova nderĩgagĩrĩra twĩtongorie ithuĩ ene. Hihi atongoragia atĩa ndungata ciake ũmũthĩ? Njĩra ĩmwe nĩ kũgerera Bibilia. (Thab. 119:105) Kũgerera Kiugo gĩake, Jehova nĩ atũteithagia gũtua matua mega na gũkũria ngumo njega. Ũndũ ũcio nĩ ũtũmaga tũkorũo na gĩkeno ihinda-inĩ rĩrĩ na tũkerĩgĩrĩra gũgaatũũra tene na tene ihinda rĩũkĩte.a Kwa ngerekano, nĩ atũrutaga ũrĩa tũngĩeheria muku ngoro-inĩ, ũrĩa tũngĩkorũo tũrĩ ehokeku maũndũ-inĩ mothe, na ũrĩa tũngĩenda arĩa angĩ biũ kuuma ngoro. (Thab. 37:8; Ahib. 13:18; 1 Pet. 1:22) Rĩrĩa twakũria ngumo ta icio cia Gĩkristiano, nĩ tũtuĩkaga aciari ega, arata ega, na andũ ega kĩhiko-inĩ.
4 Makĩria ma ũguo, Jehova nĩ aandĩkithirie thĩinĩ wa Bibilia ngʼano cia andũ maatariĩ o ta ithuĩ na maageragĩra magerio o ta marĩa tũgeragĩra. (1 Kor. 10:13; Jak. 5:17) Rĩrĩa twathoma ngʼano icio na twahũthĩra maũndũ marĩa tweruta, nĩ tũgunĩkaga na njĩra ta igĩrĩ. Ya mbere, nĩ tũmenyaga atĩ to ithuĩ tũracemania na moritũ ĩndĩ nĩ kũrĩ angĩ manacemania na moritũ o ta macio na makamatooria. (1 Pet. 5:9) Ya kerĩ, nĩ twĩrutaga ũrĩa tũngĩhota kũhiũrania na magerio marĩa tũragerera.—Rom. 15:4.
5. Nĩa Jehova ahũthagĩra gũtũtongoria?
5 Ningĩ Jehova nĩ ahũthagĩra aarĩ na ariũ a Ithe witũ gũtũtongoria.b Kwa ngerekano, arori a mũthiũrũrũko nĩ maceeragĩra ciũngano kaingĩ nĩguo matwĩkĩre ngoro. Mĩario ĩrĩa marutaga nĩ ĩkĩraga wĩtĩkio witũ hinya na ĩgatũteithia gũtũũria ũrũmwe witũ. (Atũm. 15:40–16:5) Athuri a kĩũngano o nao nĩ merutanagĩria gũteithia o ũmwe witũ gũtũũra hakuhĩ na Jehova. (1 Pet. 5:2, 3) Nao aciari nĩ marutaga ciana ciao kwenda Jehova, gũtua matua ma ũũgĩ, na gũkorũo na mĩthiĩre mĩega. (Thim. 22:6) Nao aarĩ a Ithe witũ agimaru kĩĩroho nĩ mateithagia aarĩ a Ithe witũ ethĩ na njĩra ya kũmaigĩra kĩonereria kĩega, kũmahe ũtaaro mangĩhũthĩra, na kũmekĩra ngoro.—Tit. 2:3-5.
6. Tũbatiĩ gwĩka atĩa nĩguo tũgunĩke na ũtongoria ũrĩa Jehova atũheaga?
6 Jehova nĩ ahingĩtie itemi rĩake rĩa gũtũhe ũtongoria ũrĩa tũrabatara. Gũkĩrĩ ũguo-rĩ, tũngĩonania ngatho citũ atĩa nĩ ũndũ wa ũteithio ũrĩa atũheete? Thimo 3:5, 6 yugaga: “Wĩhokage Jehova na ngoro yaku yothe, na ndũkehokage ũtaũku waku mwene.” Rĩrĩa twehoka Jehova, ‘nĩ arĩtũrũngagĩra njĩra citũ,’ na ũguo nĩ kuuga nĩ arĩtũteithagia gwĩthema mathĩna maingĩ na tũkagĩa na ũtũũro ũrĩ na gĩkeno makĩria. Na githĩ tũtikoragwo na ngatho mũno nĩ ũndũ wa ũrĩa Jehova atwendete na ũrĩa atũheaga ũtaaro ũrĩa tũrabatara?—Thab. 32:8.
JEHOVA NĨ ATŨHINGAGĨRIA MABATARO MAITŨ
7. Jehova atũhingagĩria atĩa mabataro maitũ? (Afilipi 4:19)
7 Thoma Afilipi 4:19. Makĩria ma gũtũtongoria kĩĩroho, Jehova nĩ arathimaga kĩyo gitũ gĩa gũcaria gĩa kũrĩa, gĩa kwĩhumba, na gwa gũikara. (Mat. 6:33; 2 Thes. 3:12) O na gũtuĩka nĩ ũndũ wa ndũire gũtangĩka igũrũ rĩgiĩ ũrĩa tũkũhingia mabataro maitũ ma kĩĩmwĩrĩ, Jehova atwĩraga tũtigetange mũno nĩ ũndũ wa maũndũ macio. (Mat. 6:25) Nĩkĩ? Tondũ gũtirĩ hĩndĩ Ithe witũ agaatiganĩria athathaiya ake ehokeku marĩ thĩna-inĩ. (Mat. 6:8; Ahib. 13:5) No tũmwĩhoke biũ rĩrĩa atwĩra atĩ nĩ arĩtũhingagĩria mabataro maitũ.
8. Jehova aarũmbũirie Daudi atĩa?
8 Ta wĩcirie ũrĩa Jehova aateithirie Daudi. Hĩndĩ ĩrĩa Daudi ooragĩra mũthamaki Saulu, Jehova nĩ aamũheaga kĩrĩa aabataraga arĩ hamwe na arũme arĩa maarĩ nake. Thutha wa Daudi gwĩcũrania ũrĩa Jehova aamũrũmbũyĩtie ihinda-inĩ rĩu, aandĩkire ũũ: “Kũrĩ hĩndĩ ndarĩ mwĩthĩ na rĩu ndĩ mũkũrũ, no ndirĩ ndona mũndũ o na ũmwe mũthingu atiganĩirio, kana ciana ciake ikĩhoya mũgate.” (Thab. 37:25) No kũhoteke o nawe nĩ wĩyoneire ũrĩa Jehova ahingagĩria ndungata ciake njĩhokeku mabataro ma cio.
9. Jehova arũmbũyagia andũ ake atĩa rĩrĩa kwaumĩra gĩcanjama kĩa ndũire? (Ningĩ rora mbica.)
9 Ningĩ Jehova nĩ arũmbũyagia andũ ake rĩrĩa kwaumĩra gĩcanjama kĩa ndũire. Kwa ngerekano, rĩrĩa kwaumĩrire ngʼaragu Jerusalemu hĩndĩ ya karine ya mbere, Akristiano a kuuma kũndũ gũtiganĩte nĩ maaheire ariũ a Ithe witũ a kũu ũteithio ũrĩa maabataraga. (Atũm. 11:27-30; Rom. 15:25, 26) O na ũmũthĩ, andũ a Ngai nĩ monanagia roho ta ũcio wa ũtaana. Rĩrĩa kwaumĩra gĩcanjama kĩa ndũire, Jehova nĩ ahũthagĩra andũ ake kũheana irio, maĩ, nguo, na ndawa kũrĩ arĩa mahutĩtio. Timu cia mĩako nĩ ithondekaga mĩciĩ na Nyũmba cia Ũthamaki iria ithũkangĩtio. Ningĩ ndungata cia Jehova nĩ ikoragwo ciĩhaarĩirie kũũmĩrĩria arĩa mahutĩtio nĩ gĩcanjama na kũmekĩra ngoro kũgerera Maandĩko.c
Jehova atũũmagĩrĩria atĩa rĩrĩa kwaumĩra gĩcanjama kĩa ndũire? (Rora kĩbungo gĩa 9)e
10-11. Ũreruta atĩa kuumana na ũhoro wĩgiĩ Borys?
10 Ningĩ Jehova nĩ ahingagĩria arĩa matamũthathayagia mabataro mao arĩ na ũtaana. Nĩ twĩgerekanagia na Jehova rĩrĩa twacaria mĩeke ya kuonania ũtugi kũrĩ andũ arĩa matamũtungatagĩra. (Gal. 6:10) Kaingĩ ũndũ ũcio nĩ ũrutaga ũira mwega ũtwĩgiĩ na wĩgiĩ Jehova. Ta wĩcirie ũhoro wa Borys, ũrĩa nĩ mwarimũ mũnene wa cukuru thĩinĩ wa Ukraine. O na gũtuĩka Borys ti Mũira wa Jehova, nĩ aarũmbũyagia arutwo ake arĩa maarĩ Aira a Jehova na njĩra ya ũtugi na agatĩa wĩtĩkio wao. Rĩrĩa kwaumĩrire mbaara kũrĩa aaikaraga, nĩ aatuire itua rĩa kũũrĩra kũndũ kũrĩ na ũgitĩri bũrũri-inĩ o ũcio, na ariũ a Ithe witũ nĩ maamũteithirie mũno. Thutha-inĩ Borys nĩ aathiire Kĩririkano gĩa gĩkuũ kĩa Jesu. Acokia meciria na thutha, Borys aaugire: “Nĩ njokagĩria Aira a Jehova ngatho tondũ nĩ maanũmbũirie mũno na njĩra ya wendo.”
11 O na ithuĩ no twĩgerekanie na Ithe witũ wa igũrũ ũrĩ tha nyingĩ, na njĩra ya kũrũmbũiya andũ arĩa marĩ na ũbataro tũrĩ na wendo, gũtekũmakania kana nĩ mathathayagia Jehova kana matimũthathayagia. (Luk. 6:31, 36) Twĩrĩgagĩrĩra atĩ wendo ũrĩa tũmonagia nĩ ũrĩmatindĩkaga kwenda kwĩruta makĩria ũhoro wĩgiĩ Jehova na kũmũtungatĩra. (1 Pet. 2:12) Gũtekũmakania maumĩrĩra, nĩ tũrĩkoragwo na gĩkeno kĩnene kĩrĩa kiumanaga na kũheana.—Atũm. 20:35.
JEHOVA NĨ ATŨGITAGĨRA
12. Jehova eranĩire ũgitĩri ũrĩkũ harĩ andũ ake marĩ gĩkundi? (Thaburi 91:1, 2, 14)
12 Thoma Thaburi 91:1, 2, 14. Ũmũthĩ, Jehova nĩ atwĩrĩire atĩ nĩ arĩtũgitagĩra kĩĩroho. Gũtirĩ hĩndĩ ageetĩkĩria Shaitani athararie ũthathaiya wa ma. (Joh. 17:15) Na rĩrĩa ‘thĩna ũrĩa mũnene’ ũgaakinya, tũrĩ na ma atĩ Jehova nĩ akaahingia kĩĩranĩro gĩake gĩa kũgitĩra andũ ake kĩĩroho na nginya kĩĩmwĩrĩ.—Kũg. 7:9, 14.
13. Hihi nĩ ũgitĩri ũrĩkũ Jehova atũheaga tũrĩ mũndũ ũmwe ũmwe?
13 Hihi nĩ ũgitĩri ũrĩkũ Jehova atũheaga tũrĩ mũndũ ũmwe ũmwe? Jehova nĩ atũteithagia kũgerera Maandĩko nĩguo tũhote gũkũũrana wega na ũũru. (Ahib. 5:14) Rĩrĩa twatũũra kũringana na motaaro ma Bibilia, nĩ tũgitagĩrũo kĩĩroho na kĩĩmwĩrĩ. (Thab. 91:4) Makĩria ma ũguo, Jehova nĩ atũgitagĩra kũgerera kĩũngano. (Isa. 32:1, 2) Rĩrĩa twanyitanĩra hamwe na andũ mendete Jehova na matũũraga kũringana na ithimi ciake, nĩ twĩkĩragwo ngoro na tũkagĩa na hinya wa kũregana na ũgucania mũũru.—Thim. 13:20.
14. (a) Jehova agaga gũtwehereria magerio mothe marĩa tũcemanagia namo nĩkĩ? (b) Thaburi 9:10 ĩtũheaga ũũma ũrĩkũ? (Ningĩ rora kohoro ka magũrũ-inĩ.)
14 Mahinda-inĩ ma tene, rĩmwe Jehova nĩ aagitagĩra ndungata ciake nĩguo itikagerwo ngero kana ciũragwo. O na kũrĩ ũguo, ti hĩndĩ ciothe eekaga ũguo. Bibilia yugaga atĩ “ihinda na maũndũ materĩgĩrĩirũo” no makore mũndũ o wothe. (Koh. 9:11) Ningĩ kuuma o tene, Jehova nĩ arekete ndungata imwe ciake inyarirũo na nginya ciũragwo nĩguo Shaitani oneke nĩ wa maheeni. (Ayub. 2:4-6; Mat. 23:34) O na gũtuĩka Jehova no age gũtwehereria magerio marĩa tũragerera, no tũkorũo na ma atĩ gũtirĩ hĩndĩ agaatiganĩria arĩa mamwendete.d—Thab. 9:10.
JEHOVA NĨ ATŨŨMAGĨRĨRIA
15. Tũũmagĩrĩrio atĩa nĩ mahoya, Kiugo kĩa Ngai, na Akristiano arĩa angĩ? (2 Akorintho 1:3, 4)
15 Thoma 2 Akorintho 1:3, 4. Rĩmwe na rĩmwe nĩ tũiguaga tũrĩ na kĩeha kana mĩtangĩko. No gũkorũo nĩ ũracemania na ũndũ mũritũ ũratũma ũigue ũrĩ wiki. Hihi nĩ ũkuona ta harĩ mũndũ ũrataũkĩrũo nĩ ũrĩa ũraigua? Jehova nĩ arataũkĩrũo. Nĩ oĩ ruo rũrĩa tũrĩ naruo, na makĩria nĩ ‘atũũmagĩrĩria magerio-inĩ maitũ mothe.’ Eekaga ũguo atĩa? Rĩrĩa tweitũrũra harĩ Jehova kũgerera mahoya, nĩ atũheaga “thayũ wa Ngai ũrĩa ũkĩrĩte ũtaũku wothe.” (Afil. 4:6, 7) Ningĩ nĩ tũũmagĩrĩrio rĩrĩa twathoma ciugo cia Jehova thĩinĩ wa Bibilia. Nĩ atwĩraga ũrĩa atwendete, agatũteithia gũtuĩka andũ ogĩ, na agatũhe kĩĩrĩgĩrĩro kĩega kĩa ihinda rĩũkĩte. Ningĩ nĩ tũũmagĩrĩrio kũgerera mĩcemanio ya kĩũngano ĩrĩa tũrutagwo maũndũ maingĩ kuuma Bibilia-inĩ na tũgakenera ngwatanĩro hamwe na aarĩ na ariũ a Ithe witũ arĩa matwendete.
16. Ũreruta atĩa kuumana na ũhoro wĩgiĩ Nathan na Priscilla?
16 No tuone ũrĩa Jehova atũũmagĩrĩria na agatwĩkĩra ngoro kũgerera Bibilia tũngĩciria ũhoro wa mũrũ wa Ithe witũ Nathan na mũtumia wake Priscilla, arĩa maikaraga Amerika (US). Mĩaka ĩigana ũna mĩthiru, nĩ maatuire itua rĩa gũthamĩra kũrĩa kũrĩ na bata mũnene wa ahunjia. Nathan aaugire: “Twarĩ na ma atĩ Jehova nĩ angĩarathimire kĩyo gitũ.” No rĩrĩa maakinyire kũrĩa meetũmĩte, nĩ maagĩire na mathĩna mateerĩgĩrĩire ma mwĩrĩ o hamwe na moritũ ma kĩĩmbeca. Thutha-inĩ nĩ maabatarire gũcoka kwao, na no maathiire na mbere kũhiũrania na moritũ ma kĩĩmbeca. Nathan aaugire: “Nĩ ndarigagwo nĩ kĩĩ gĩatũmire Ngai age gũtũrathima ta ũrĩa twerĩgagĩrĩra. Nginya nĩ ndambĩtie kwĩyũria kana harĩ ũndũ mũũru ndekĩte.” O na kũrĩ ũguo, thutha wa ihinda Nathan na Priscilla nĩ maataũkĩirũo atĩ Ngai ndaamatiganĩirie ihinda-inĩ rĩu iritũ. Nathan aaugire: “Ihinda-inĩ rĩu, Bibilia yatariĩ ta mũrata mũũgĩ ũratũũmĩrĩria na agatũhe ũtongoria. Gwĩcũrania ũrĩa Jehova aatũteithirie gũkirĩrĩria moritũ macio handũ ha kũiga meciria harĩ mathĩna maitũ, nĩ gwatũteithirie gũkorũo na ma atĩ Jehova nĩ egũthiĩ na mbere gũtũteithia nginya ihinda rĩũkĩte.”
17. Mwarĩ wa Ithe witũ Helga oomĩrĩirio atĩa? (Ningĩ rora mbica.)
17 Ningĩ no tũũmĩrĩrio nĩ aarĩ na ariũ a Ithe witũ. Na njĩra ĩrĩkũ? Reke tuone ngerekano ya mwarĩ wa Ithe witũ Helga, ũrĩa ũikaraga Hungary. Kwa ihinda rĩa mĩaka mĩingĩ, nĩ aahiũranagia na moritũ maatũmaga aigue arĩ na mĩtangĩko na eyagĩire kĩene. No acokia meciria na thutha, nĩ onaga atĩ Jehova aahũthagĩra aarĩ na ariũ a Ithe witũ kĩũngano-inĩ kũmũũmĩrĩria. Aandĩkire ũũ: “Hĩndĩ ciothe Jehova nĩ akoretwo akĩndeithia rĩrĩa ndaigua ngĩritũhĩrũo kũruta wĩra, kũrũmbũiya mwana wakwa mũrwaru, na nĩ ũndũ wa moritũ mangĩ. Kwa ihinda rĩa mĩaka 30 gũtirĩ mũthenya arĩ aga kũhingia kĩĩranĩro gĩake gĩa kũnyũmĩrĩria. Akoretwo akĩnjĩkĩra hinya kũgerera ciugo njega na cia gwĩkĩra ngoro cia aarĩ na ariũ a Ithe witũ. Kaingĩ nĩ nyamũkagĩra ndũmĩrĩri nguhĩ, ngatũmĩrũo kandi, kana ngerũo ciugo cia kũnyũmĩrĩria hĩndĩ ĩrĩa ndĩracibatara makĩria.”
Jehova angĩkũhũthĩra atĩa kũũmĩrĩria arĩa angĩ? (Rora kĩbungo gĩa 17)
18. Tũngĩũmĩrĩria arĩa angĩ na njĩra ta irĩkũ?
18 Tũrĩ na mweke wa kwĩgerekania na Ngai witũ na njĩra ya kũũmĩrĩria arĩa angĩ. Tũngĩka ũguo atĩa? No tũmathikĩrĩrie tũrĩ na wetereri, tũmeere ciugo cia kũmomĩrĩria, na tũmahe ũteithio ũrĩa marabatara. (Thim. 3:27) Twĩrutanagĩria kũũmĩrĩria arĩa othe marathĩnĩka nginya arĩa matatungatagĩra Jehova. Mũndũ wa itũũra angĩkuĩrũo, kana akorũo arĩ mũrwaru kana arĩ na mĩtangĩko, no tũmũceerere, tũmũthikĩrĩrie, na tũmũũmĩrĩrie tũkĩhũthĩra Maandĩko. Rĩrĩa twegerekania na Jehova “Ngai mwene ũhoro wothe wa kũũmanĩrĩria,” no tũteithie Akristiano arĩa angĩ kũũmĩrĩria magerio, na ningĩ no tũteithie andũ arĩa matatungatagĩra Ngai mende kwĩruta ũhoro wake.—Mat. 5:16.
HĨNDĨ CIOTHE JEHOVA NĨ ARĨTŨTEITHAGIA
19. Jehova atũrũmbũyagia atĩa, na tũngĩĩgerekania nake atĩa?
19 Jehova nĩ arũmbũyagia mũno arĩa mamwendete. Ndatũtiganagĩria rĩrĩa tũrĩ na moritũ. Na o ta ũrĩa mũciari arũmbũyagia mwana wake arĩ na wendo, noguo Jehova arũmbũyagia ndungata ciake njĩhokeku. Nĩ atũtongoragia, agatũhingĩria mabataro maitũ, agatũgitĩra, na agatũũmĩrĩria. Nĩ twĩgerekanagia na Ithe witũ wa igũrũ ũrĩ wendo rĩrĩa twateithia na twekĩra ngoro arĩa angĩ rĩrĩa marĩ na moritũ. O na gũtuĩka no tũcemanie na moritũ na tũgĩe na ruo rwa ngoro, no tũkorũo na ma atĩ Jehova arĩ hamwe na ithuĩ. Eranĩire ũũ: “Ndũgetigĩre, nĩ gũkorũo niĩ ndĩ hamwe nawe.” (Isa. 41:10) Kĩĩranĩro kĩu nĩ gĩtũmaga tũkorũo na ma atĩ gũtirĩ hĩndĩ tũkoragwo tũrĩ oiki.
RWĨMBO NA. 100 Onanagiai Ũtana
a Rora gĩcunjĩ kĩrĩ na kĩongo “Tua Matua ma Gũtĩithia Ngai” thĩinĩ wa ngathĩti ya Mũrangĩri ya Ĩpuro 1, 2011.
b Rora kĩbungo gĩa 11-14 gĩcunjĩ-inĩ kĩrĩ na kĩongo “Thiĩ na Mbere Kũrũmĩrĩra Ũtongoria wa Jehova” ngathĩti-inĩ ya Mũrangĩri ya Februarĩ 2024.
c No wone ngerekano cia ica ikuhĩ thĩinĩ wa jw.org/ki ũngĩandĩka ciugo “ũteithio hĩndĩ ya icanjama” gathandũkũ-inĩ ga gwetha ũhoro.
d Rora “Ciũria Kuuma Kũrĩ Athomi” thĩinĩ wa ngathĩti ya Mũrangĩri ya Februarĩ 2017.
e GŨTAARĨRIA MBICA: Aarĩ na ariũ a Ithe witũ a bũrũri wa Malawi makĩamũkĩra ũteithio wa kĩĩmwĩrĩ na wa kĩĩroho thutha wa kũgũmĩrũo nĩ gĩcanjama kĩa ndũire.