Maumĩrĩro Moru ma Mbaara
Andũ nĩ mahutagio na njĩra nene nĩ mbaara na ngũĩ. Rĩrĩa kũrĩ na mbaara, thigari o hamwe na raiya nĩ meyonagĩra maũndũ ma kũguoyohia.
THIGARI
“Kaingĩ nĩ wĩyonagĩra andũ makĩũragwo na angĩ makĩgurario na njĩra njũru. Gũtirĩ hĩndĩ mũndũ aiguaga arĩ na ũgitĩri.”—Gary, Britain.
“Ndanahũũrũo na rithathi mũgongo na ũthiũ, na ngeyonera andũ aingĩ makĩũragwo, nginya ciana na andũ akũrũ. Mbaara no ĩtũme wage kũmakio nĩ ũndũ o na ũrĩkũ, nginya gĩkuũ.”—Wilmar, Colombia.
“Rĩrĩa mũndũ arathwo ũkĩĩyonagĩra, ũndũ ũcio ndweheraga meciria-inĩ. Mbica ĩyo o hamwe na mũkayo wake cikaraga igĩũkaga meciria-inĩ maku. Gũtirĩ hĩndĩ ũkaariganĩrũo nĩ mũndũ ũcio.”—Zafirah, United States.
RAIYA
“Ndonaga ta gũtarĩ hĩndĩ ngaakorũo na gĩkeno rĩngĩ. Ũikaraga na guoya tondũ no ndagĩka o yothe ũngĩũragwo, kana ũigue mũndũ wanyu wa famĩlĩ kana mũrata nĩ oragĩtwo.”—Oleksandra, Ukraine.
“Twaaraga raini ya irio kuuma thaa inyanya cia ũtukũ nginya thaa ithano cia ũtukũ, na twakoragwo na guoya mũno tondũ mũndũ nĩ angĩakorirũo nĩ rithathi hĩndĩ o yothe.”—Daler, Tajikistan.
“Aciari akwa mooragirũo hĩndĩ ya mbaara. Ndatigirũo itarĩ na mũndũ wa kũnyũmĩrĩria kana wa kũnũmbũiya.”—Marie, Rwanda.
O na gũtuĩka andũ acio magwetwo nĩ macemanĩtie na maũndũ ma kũguoyohia nĩ ũndũ wa mbaara, rĩu nĩ magĩte na thayũ. Ningĩ marĩ na ma atĩ ica ikuhĩ, ngũĩ na mbaara ciothe nĩ igũthira. Ngathĩti ĩno ya Mũrangĩri nĩ ĩrataarĩria ĩkĩhũthĩra Bibilia ũrĩa ũndũ ũcio ũkaahinga.