Guoko kwa Jehova Gũtikoragwo gwĩ Gũkuhĩ

1. Rĩrĩa Musa aatongoragia Aisiraeli kuuma Misiri-rĩ, oonanirie atĩa atĩ nĩ eehokete Jehova?

MUSA nĩ ũmwe wa andũ arĩa magwetetwo ibuku-inĩ rĩa Ahibirania arĩa moonanirie wĩtĩkio. (Ahib. 3:​2-5; 11:​23-25) Nĩ oonanirie wĩtĩkio rĩrĩa aatongoririe Aisiraeli kuuma Misiri, na ndaarekire Mũthamaki Firauni na mbũtũ yake matũme etigĩre kũhingia wĩra ũcio. Tondũ nĩ eehokete Jehova, nĩ aahotire gũtongoria andũ acio rĩrĩa maatuĩkanagia Iria-inĩ Itune, na thutha-inĩ marĩ werũ-inĩ. (Ahib. 11:​27-29) O na gũtuĩka Aisiraeli aingĩ nĩ maatete mwĩhoko harĩ ũhoti wa Jehova wa kũmarũmbũiya, Musa aathiire na mbere kwĩhoka Ngai. Wĩtĩkio wa Musa ndwarĩ wa tũhũ, tondũ Jehova nĩ aarũmbũirie Aisiraeli marĩ kũu werũ-inĩ mũngʼaru, akĩmahe irio na maĩ na njĩra ya kĩama.a—Tham. 15:​22-25; Thab. 78:​23-25.

2. Nĩ kĩĩ gĩatũmire Ngai orie Musa ũũ: “Kaĩ guoko kwa Jehova gwĩ gũkuhĩ”? (Ndari 11:​21-23)

² O na gũtuĩka Musa aarĩ na wĩtĩkio mũrũmu, thutha wa kĩndũ mwaka ũmwe kuuma Aisiraeli maarutwo ũkombo-inĩ Misiri na njĩra ya kĩama, Musa nĩ eekĩrĩire nganja ũhoti wa Jehova wa kũhe andũ ake nyama. Musa nĩ aarigagwo ũrĩa Jehova angĩahotire kũhe andũ milioni cigana ũna nyama cia kũmaigana marĩ werũ-inĩ. Nĩ ũndũ ũcio Jehova akĩũria Musa ũũ: “Kaĩ guoko kwa Jehova gwĩ gũkuhĩ?” (Thoma Ndari 11:​21-23.) Ciugo “guoko kwa Jehova” irũgamĩrĩire roho mũtheru wa Ngai, kana hinya wake wa gwĩka maũndũ. Kwoguo nĩ ta Jehova ooragia Musa atĩrĩ, ‘Kaĩ ũreciria ndingĩhota gwĩka ũndũ ũrĩa njugĩte nĩ ngwĩka?’

3. Nĩkĩ nĩ ũndũ wa bata gwĩciria ihinda rĩrĩa Musa na Aisiraeli maagire kwĩhoka ũhoti wa Jehova?

³ Hihi nĩ ũrĩ weyũria kana Jehova no ahote gũkũhingagĩria mabataro maku na ma famĩlĩ yaku? Akorũo waneyũria kana ndũrĩ weyũria, reke tũthuthurie kĩrĩa gĩatũmire Musa na Aisiraeli mage kwĩhoka ũhoti wa Jehova wa kũmahingĩria mabataro mao. Motaaro ma Bibilia marĩa maarĩrĩirio nĩ megũtũteithia gũkorũo na ma biũ atĩ guoko kwa Jehova gũtikoragwo gwĩ gũkuhĩ.

WĨRUTE KUUMANA NA MUSA NA AISIRAELI

4. Nĩ kĩĩ kĩngĩkorũo gĩatũmire Aisiraeli aingĩ mambĩrĩrie gwĩkĩrĩra nganja ũhoti wa Jehova wa kũmahingĩria mabataro mao?

⁴ Nĩ kĩĩ gĩatũmire Aisiraeli aingĩ mambĩrĩrie gwĩkĩrĩra nganja ũhoti wa Jehova wa kũmahingĩria mabataro mao? Maaumire Misiri hamwe na “andũ angĩ aingĩ matukanĩte” mataarĩ Aisiraeli, na maakoretwo magĩtuĩkania werũ ũcio mũnene kwa ihinda merekeire Bũrũri wa Kĩĩranĩro. (Tham. 12:38; Gũcok. 8:15) Andũ arĩa mataarĩ Aisiraeli nĩ maanogirio nĩ kũrĩa maana na o na Aisiraeli aingĩ makĩambĩrĩria kũnogio nĩmo, na makĩnyitanĩra nao harĩ kũnugunĩra Musa. (Ndar. 11:​4-6) Andũ acio nĩ maambĩrĩirie kwĩrirĩria irio iria maarĩaga marĩ Misiri. Nĩ ũndũ ũcio Musa akĩigua aritũhĩrũo mũno, tondũ eeciragia atĩ nĩwe waagĩrĩirũo kũmacarĩria nyama.—Ndar. 11:​13, 14.

5-6. Tũngĩĩruta atĩa kuumana na ũrĩa Aisiraeli aingĩ maahutirio nĩ mwerekera wa andũ arĩa mataarĩ Aisiraeli?

⁵ Aisiraeli nĩ maagwatirio mwerekera wa kwaga kuonania ngatho nĩ andũ acio mataarĩ Aisiraeli. O na ithuĩ no tũhutio nĩ mwerekera wa andũ arĩa angĩ wa kwaga kuonania ngatho na twambĩrĩrie kwaga kũiganĩra nĩ indo iria Jehova atũheaga. Ũndũ ũcio no wĩkĩke tũngĩambĩrĩria kwĩrirĩria maũndũ marĩa twarĩ namo na hau kabere kana tũngĩambĩrĩria kũiguĩra andũ arĩa angĩ ũiru nĩ ũndũ wa indo iria me nacio. No tũngĩĩruta kũiganĩra na kĩrĩa twĩ nakĩo, nĩ tũrĩkoragwo na gĩkeno makĩria.

⁶ Aisiraeli nĩ maagĩrĩirũo kũririkana atĩ Ngai aamerĩire atĩ nĩ mangĩagĩire na indo nyingĩ cia kĩĩmwĩrĩ maakinya Bũrũri wa Kĩĩranĩro, no ti hĩndĩ ĩyo maarĩ werũ-inĩ. Ũndũ ũmwe na ũcio, o na ithuĩ twagĩrĩirũo gwĩciragia mũno ũhoro wa ciĩranĩro iria Jehova atwĩrĩire thĩinĩ wa thĩ njerũ, handũ ha kũiga meciria harĩ indo iria tũtarĩ nacio mũtabarĩre-inĩ ũyũ wa maũndũ. Ningĩ no twĩcũranie igũrũ rĩgiĩ maandĩko marĩa mangĩtũteithia kwĩhoka Jehova o na makĩria.

7. Nĩ kĩĩ kĩngĩtũma tũkorũo na ma atĩ guoko kwa Jehova ti gũkuhĩ?

⁷ O na kũrĩ ũguo, no wĩyũrie kĩrĩa gĩatũmire Ngai orie Musa kĩũria gĩkĩ: “Kaĩ guoko kwa Jehova gwĩ gũkuhĩ?” Kwahoteka Jehova eendaga gũteithia Musa kũmenya atĩ nĩ arĩ hinya mũingĩ mũno na atĩ no aũhũthĩre handũ o hothe. Kwoguo Jehova nĩ angĩahotire kũhe Aisiraeli nyama cia kũigana o na marĩ werũ-inĩ gatagatĩ. Ngai nĩ oonanirie hinya wake kũgerera “guoko kũrĩ hinya, na guoko gũtambũrũkie.” (Thab. 136:​11, 12) Nĩ ũndũ ũcio rĩrĩa tũragerera ũndũ mũritũ, twagĩrĩirũo gũkorũo na ma atĩ Jehova no ahote gũtũteithia gũtekũmakania kũrĩa tũrĩ.—Thab. 138:​6, 7.

8. Tũngĩĩthema atĩa gwĩka ihĩtia ta rĩrĩa Aisiraeli aingĩ meekire marĩ werũ-inĩ? (Ningĩ rora mbica.)

⁸ Jehova aaheire Aisiraeli tũmakia arũme tũingĩ, ũũ atĩ maarĩ na nyama nyingĩ gũkĩra iria maabataraga. No handũ ha gũcokeria Jehova ngatho nĩ ũndũ wa kĩama kĩu, aingĩ ao maatuĩkire akoroku. Meeyũnganĩirie tũmakia arũme tũingĩ kwa ihinda rĩa mũthenya ũmwe na nuthu mategũtigithĩria. Jehova nĩ aarakaririo mũno nĩ andũ acio “moonanirie merirĩria ma mwĩyendo,” na akĩmoera ikinya. (Ndar. 11:​31-34) Tũreruta atĩa na ngerekano ĩyo? Nĩ tũbatiĩ kwĩmenyerera tũtigatuĩke andũ akoroku. Kwoguo gũtekũmakania kana tũrĩ atongu kana athĩni, ũndũ ũrĩa tũbatiĩ gwĩkĩrĩra mũno nĩ kwĩigĩra “mĩthithũ kũrĩa igũrũ,” na njĩra ya gũthondeka ũrata wa hakuhĩ hamwe na Jehova na Jesu. (Mat. 6:​19, 20; Luk. 16:9) Tweka ũguo, no tũkorũo na ma atĩ Jehova nĩ arĩtũhingagĩria mabataro maitũ.

9. Nĩ ũndũ ũrĩkũ tũrĩ na ma naguo wĩgiĩ ũteithio wa Jehova?

⁹ O na mahinda-inĩ maya, Jehova nĩ akoragwo ehaarĩirie gũteithia andũ ake. No ũguo ti kuuga atĩ gũtirĩ hĩndĩ tũngĩũrũo nĩ indo citũ kana twage gĩa kũrĩa.b Ĩndĩ Jehova ndarĩ hĩndĩ angĩtũtiganĩria. Nĩ arĩtũtiiragĩrĩra magerio-inĩ maitũ mothe. Maũndũ maya merĩ tũkwarĩrĩria nĩ megũtũteithia kuona ũrĩa tũngĩonania atĩ tũrĩ na ma Jehova nĩ arĩtũhingagĩria mabataro maitũ: (1) rĩrĩa tũrĩ na mathĩna ma kĩĩmbeca na (2) rĩrĩa tũreciria ũrĩa tũkaahingia mabataro maitũ ma ihinda rĩũkĩte.

RĨRĨA TŨRĨ NA MATHĨNA MA KĨĨMBECA

10. Nĩ mathĩna ta marĩkũ ma kĩĩmbeca tũngĩcemania namo?

¹⁰ O ũrĩa mũthia wa mũtabarĩre ũyũ ũrathiĩ ũkuhĩrĩirie, no twĩrĩgĩrĩre atĩ noguo mathĩna ma kĩĩmbeca megũthiĩ mongererekete. Maũndũ ta ngũĩ cia gĩũteti, mbaara, icanjama cia ndũire, na gũtuthũka kwa mĩrimũ ya kũgwatanio, no matũme ngarama ya ũtũũro ĩhaice, kana matũme tũũrũo nĩ wĩra witũ, indo citũ, kana mĩciĩ itũ. No tũbatare gũcaria wĩra ũngĩ kũrĩa tũikaraga kana twĩcirie gũthamĩria famĩlĩ itũ kũndũ kũngĩ nĩguo tũhote kũmĩhingĩria mabataro. Nĩ kĩĩ kĩngĩtũteithia gũtua matua maronania atĩ nĩ tũrehoka Jehova?

11. Nĩ kĩĩ kĩngĩgũteithia kũhiũrania na mathĩna ma kĩĩmbeca? (Luka 12:​29-31)

¹¹ Ũndũ wa bata makĩria ũngĩka nĩ kũmenyithia Jehova mĩtangĩko yaku. (Thim. 16:3) Mũhoe akũhe ũũgĩ wa gũtua matua mega na agũteithie gũikara ũhooreire nĩguo wĩtheme “gwĩtanga mũno” igũrũ rĩgiĩ ũndũ ũrĩa ũrahĩtũkĩra. (Thoma Luka 12:​29-31.) Mũhoe ũtegũtigithĩria agũteithie kũiganagĩra na mabataro ma o mũhaka. (1 Tim. 6:​7, 8) Ĩka ũthuthuria mabuku-inĩ maitũ nĩguo wone ũrĩa ũngĩhiũrania na mathĩna ma kĩĩmbeca na njĩra ĩrĩa yagĩrĩire. Ũhoro ũrĩa ũrĩ thĩinĩ wa jw.org wĩgiĩ ũrĩa tũngĩhiũrania na mathĩna ma kĩĩmbeca nĩ ũteithĩtie andũ aingĩ.

12. Nĩ ciũria irĩkũ ingĩteithia Mũkristiano gũtua matua mega megiĩ famĩlĩ yake?

¹² Andũ amwe nĩ magwĩte mũtego-inĩ wa gwĩtĩkĩra wĩra ũrabatara mathiĩ kũraihu na famĩlĩ ciao, no aingĩ nĩ monete atĩ rĩu rĩtikoragwo rĩrĩ itua rĩa ũũgĩ. Ũtanetĩkĩra wĩra mwerũ, nĩ wega gwĩciria ũrĩa wĩra ũcio ũkũhutia maũndũ maku ma kĩĩroho, handũ ha o kũrora tu mũcara ũrĩa ũrĩonaga. (Luk. 14:28) No wĩyũrie: ‘Hihi kĩhiko gĩakwa kĩngĩhutio atĩa ingĩthiĩ haraihu na ũrĩa tũhikanĩtie nake? Hihi nĩ ndĩrĩhotaga gũthiĩ mĩcemanio yothe, gũthiĩ ũtungata, na kũhũthĩra mahinda hamwe na aarĩ na ariũ a Ithe witũ?’ Ningĩ angĩkorũo ũrĩ na ciana, nĩ ũbatiĩ kwĩyũria kĩũria gĩkĩ kĩa bata: ‘Ingĩhota atĩa kũrera ciana ciakwa “ngĩcirũngaga na ngĩcitaaraga na njĩra ya Jehova” ndĩ kũraihu nacio?’ (Ef. 6:4) Ũgĩtua matua rũmagĩrĩra mwĩcirĩrie wa Jehova, no ti wa andũ a famĩlĩ kana arata arĩa matatĩĩte ithimi cia Bibilia.c Tony, ũrĩa ũikaraga mwena wa ithũĩro wa Asia, nĩ eetĩirũo mawĩra maigana ũna marĩ na mũcara mwega nja wa bũrũri wao. O na kũrĩ ũguo, thutha wa kũhoya igũrũ rĩgiĩ ũndũ ũcio na kũwarĩrĩria hamwe na mũtumia wake, nĩ aatuire itua rĩa kũrega mawĩra macio na magĩthuura kũnyihanyihia mahũthĩro mao. Tony aaugire: “Nĩ ũndũ wa gũtua itua rĩu, nĩ ngĩĩte na mweke wa gũteithia andũ aigana ũna kũmenya Jehova, na ciana citũ nĩ ikenagĩra gũtungatĩra Jehova irĩ na kĩyo. Tũrĩ na famĩlĩ yakwa nĩ twĩrutĩte atĩ tũngĩathĩkagĩra ciugo cia Mathayo 6:​33, Jehova nĩ arĩtũrũmbũyagia.”

RĨRĨA TŨRECIRIA MABATARO MAITŨ MA IHINDA RĨŨKĨTE

13. Tũngĩka atĩa ihinda-inĩ rĩrĩ nĩguo tũkaahota kũhingia mabataro maitũ matukũ-inĩ ma ũkũrũ?

¹³ Ningĩ no tuonanie kana nĩ twĩhokete Jehova rĩrĩa tũreciria ũrĩa tũkaahingia mabataro maitũ matukũ-inĩ ma ũkũrũ. Bibilia nĩ ĩtwĩkĩraga ngoro kũruta wĩra na kĩyo nĩguo tũhote kũiga mbeca tũngĩhũthĩra thutha-inĩ. (Thim. 6:​6-11) Kwoguo nĩ wega kwĩigĩra kĩndũ nĩ ũndũ wa ihinda rĩũkĩte, angĩkorũo tũrĩ na ũhoti ũcio. Mbeca nĩ ikoragwo irĩ ũgitĩri na gĩkĩro kĩna. (Koh. 7:12) O na kũrĩ ũguo, gũcaria mbeca tiguo ũndũ ũrĩa tũbataire gwĩkĩrĩra mũno ũtũũro-inĩ.

14. Ahibirania 13:5 ĩngĩtũteithia atĩa tũkĩbanga ũrĩa tũkaahingia mabataro maitũ ihinda-inĩ rĩũkĩte?

¹⁴ Jesu nĩ aaheanire ngerekano ĩronania atĩ mũndũ ũreigĩra mbeca no ti “mũtongu maitho-inĩ ma Ngai” ndakoragwo akĩonania ũũgĩ. (Luk. 12:​16-21) Ma nĩ atĩ, gũtirĩ mũndũ ũĩ ũhoro wa rũciũ. (Thim. 23:​4, 5; Jak. 4:​13-15) Ningĩ nĩ harĩ ũritũ tũcemanagia naguo nĩ ũndũ wa gũkorũo tũrĩ arũmĩrĩri a Jesu. Jesu aaugire atĩ no mũhaka tũkorũo twĩhaarĩirie ‘gũtiga’ indo citũ ciothe nĩguo tũtuĩke arutwo ake. (Luk. 14:​33, kohoro ka magũrũ-inĩ.) Akristiano a karine ya mbere arĩa maarĩ Judea nĩ meetĩkĩrire makenete kũũrũo nĩ indo ciao. (Ahib. 10:34) O na mahinda-inĩ maya, aarĩ na ariũ a Ithe witũ aingĩ nĩ morĩtwo nĩ indo ciao nĩ ũndũ wa kũrega kwĩingĩrania na maũndũ ma gĩũteti. (Kũg. 13:​16, 17) Makoragwo mehaarĩirie kũũrũo nĩ indo ciao tondũ nĩ metĩkĩtie biũ kĩĩranĩro gĩkĩ kĩa Jehova: “Ndirĩ hĩndĩ ngaagũtiga, na ndirĩ hĩndĩ ngaagũtirika.” (Thoma Ahibirania 13:5.) Kwoguo nĩ twĩrutanagĩria kũbanga ũrĩa tũkaahingia mabataro maitũ ihinda-inĩ rĩũkĩte, tũrĩ na ma atĩ o na kũngiumĩra ũndũ tũterĩgĩrĩire, Jehova nĩ arĩtũrũmbũyagia.

15. Aciari Akristiano magĩrĩirũo gũkorũo na mawoni marĩkũ maigananĩru kwerekera ciana ciao? (Ningĩ rora mbica.)

¹⁵ Mabũrũri-inĩ mamwe, andũ arĩa mahikanĩtie nĩ mathuuraga kũgĩa ciana nĩgetha ikaamahe ũteithio wa kĩĩmbeca maakũra. Na njĩra ĩyo, monaga ciana ciao itariĩ ta mĩthithũ ya ũkũrũ. No Bibilia yonanagia atĩ aciari nĩo magĩrĩirũo kũhingĩria ciana ciao mabataro. (2 Kor. 12:14) Ma nĩ atĩ, rĩmwe aciari no mabatare ũteithio o ũrĩa marakũra, na ciana nyingĩ nĩ ikoragwo na wendi wa kũmateithia. (1 Tim. 5:4) No aciari Akristiano nĩ moĩ atĩ no makorũo na gĩkeno kĩnene mangĩteithia ciana ciao gũtuĩka ndungata cia Jehova, handũ ha gũcirera marĩ na muoroto wa gũgaateithio nĩcio thutha-inĩ.—3 Joh. 4.

16. Aciari mangĩhaarĩrĩria ciana ciao atĩa nĩguo ikaahota kwĩrũgamĩrĩra cianeneha? (Aefeso 4:28)

¹⁶ Ũkĩruta ciana ciaku ũrĩa ingĩhota gũkerũgamĩrĩra ihinda rĩũkĩte, reke cione kũgerera kĩonereria gĩaku ũrĩa ingĩhoka Jehova. Kuuma marĩ o anini mateithie kuona bata wa kũruta wĩra na kĩyo. (Thim. 29:21; thoma Aefeso 4:28.) O ũrĩa maraneneha, mateithie kwĩrutanĩria mathomo-inĩ. Nĩ wega aciari gũthuthuria motaaro ma Bibilia nĩguo mahote gũteithia ciana ciao gũtua matua maigananĩru megiĩ gĩthomo. Ũndũ ũcio no ũteithie ciana ciao ikaahota kwĩrũgamĩrĩra na kwĩheana biũ ũtungata-inĩ wa Jehova.

17. Nĩ ũndũ ũrĩkũ tũngĩkorũo na ma naguo?

¹⁷ Nĩ tũkoragwo na ma atĩ Jehova nĩ arĩ ũhoti na wendi wa gũtũhingĩria mabataro maitũ. O ũrĩa tũrakuhĩrĩria mũthia wa mũtabarĩre ũyũ wa maũndũ, noguo tũrabatara kwĩhoka Jehova makĩria. No gũtekũmakania ũndũ ũrĩa ũngĩhaanĩka, rekei tũthiĩ na mbere kwĩhoka atĩ Jehova nĩ arĩhũthagĩra hinya wake gũtũhingĩria mabataro maitũ. Tũrĩ na ma atĩ, guoko kwa Jehova kũrĩ hinya na gũtambũrũkie gũtikoragwo gwĩ gũkuhĩ ũndũ angĩremwo gũtũteithia.