Ũrĩa Jehova Atũteithagia Gũkirĩrĩria

1. Tũrabatara ũkirĩrĩria nĩkĩ na nĩ ũteithio ũrĩkũ twĩ naguo? (1 Petero 5:10)

MATUKŨ-INĨ maya maritũ ma kũrigĩrĩria, nĩ tũrabatara gũkorũo na ũkirĩrĩria. Andũ amwe nĩ marahiũrania na mĩrimũ mĩũru. Angĩ nao marĩ na kĩeha gĩa gũkuĩrũo nĩ mũndũ mendete. Nao angĩ nĩ maracemania na ũkararia kuuma kũrĩ andũ ao a famĩlĩ, kana kuuma kũrĩ anene a thirikari. (Mat. 10:​18, 36, 37) Korũo na ma atĩ Jehova no agũteithie gũkirĩrĩria, gũtekũmakania igerio rĩrĩa ũragerera.—Thoma 1 Petero 5:10.

2. Tũrutaga kũ hinya wa gũkirĩrĩria moritũ?

² Gũkirĩrĩria nĩ ũhoti wa kũũmĩrĩria rĩrĩa tũragerera moritũ, rĩrĩa tũranyarirũo, kana rĩrĩa tũrahiũrania na igerio, tũrĩ na mwĩhoko atĩ maũndũ nĩ mekwagĩra. Tũtingĩhota gũkirĩrĩria na hinya witũ ithuĩ ene; no nginya tũbatare ũteithio wa Jehova, ũrĩa ũtũheaga “hinya ũrĩa ũkĩrĩte wa ndũire.” (2 Kor. 4:7) Gĩcunjĩ-inĩ gĩkĩ, nĩ tũkwarĩrĩria njĩra inya iria Jehova ahũthagĩra gũtũteithia gũkirĩrĩria. Ningĩ nĩ tũkuona ũrĩa tũngĩka nĩguo tũgunĩke biũ kuumana na njĩra icio.

MAHOYA

3. Nĩ kĩĩ kĩngĩtũma tuuge atĩ mahoya nĩ kĩheo kĩa magegania?

³ Jehova nĩ atũheete kĩheo kĩa magegania kĩngĩtũteithia gũkirĩrĩria. O na gũtuĩka tũrĩ andũ ehia, nĩ atũhingũrĩire njĩra ya kwaranĩria nake. (Ahib. 4:16) Ta wĩcirie ũndũ ũyũ: No tũhote kwaria na Jehova hĩndĩ o yothe na tũmwĩre ũndũ o wothe. Ningĩ gũtirĩ rũthiomi tũtangĩhũthĩra tũkĩaria nake, na gũtiramakania kũrĩa tũrĩ, o na angĩkorũo tũrĩ kũndũ tũraigua tũrĩ oiki kana njera. (Jona 2:​1, 2; Atũm. 16:​25, 26) O na tũngĩkorũo na mĩtangĩko mĩingĩ ũũ atĩ nĩ tũraga ciugo cia gũtaarĩria ũrĩa tũraigua, Jehova no ataũkagĩrũo nĩ ũrĩa tũrenda kuuga. (Rom. 8:​26, 27) Hatarĩ nganja mahoya nĩ kĩheo kĩa magegania!

4. Nĩ kĩĩ kĩngĩtũma tuuge atĩ Jehova nĩ endaga tũmũhoe atũteithie gũkirĩrĩria?

⁴ Jehova akĩhũthĩra Kiugo gĩake, atwĩrĩte atĩ “tũngĩhoya ũndũ o na ũrĩkũ kũringana na wendi wake, nĩ atũiguaga.” (1 Joh. 5:14) Hihi no tũhoe Jehova atũteithie gũkirĩrĩria? Ĩĩ no twĩke ũguo, tondũ ũndũ ũcio nĩ ũratwarana na wendi wake. Tũngiuga ũguo nĩkĩ? Tondũ rĩrĩa twakirĩrĩria magerio, Jehova nĩ ahotaga gũcokeria ũrĩa ũmũnyũrũragia, na nĩwe Shaitani. (Thim. 27:11) Makĩria ma ũguo, Bibilia yugaga atĩ Jehova nĩ endaga mũno kuonania “hinya wake nĩ ũndũ wa arĩa meheanĩte na ngoro yao yothe harĩ we.” (2 Maũ. 16:9) Kwoguo no tũkorũo na ma atĩ Jehova nĩ akoragwo na ũhoti na wendi wa gũtũteithia gũkirĩrĩria.—Isa. 30:18; 41:10; Luk. 11:13.

5. Mahoya mangĩtũteithia atĩa kũgĩa na thayũ wa meciria? (Isaia 26:3)

⁵ Bibilia yugaga atĩ rĩrĩa twahoya igũrũ rĩgiĩ mĩtangĩko itũ, ‘thayũ wa Ngai ũrĩa ũkĩrĩte ũtaũku wothe nĩ ũrĩgitagĩra ngoro citũ na ũhoti witũ wa gwĩciria.’ (Afil. 4:7) Ũndũ ũcio nĩ wa bata nĩkĩ? Andũ arĩa matatungatagĩra Jehova o nao nĩ macemanagia na mathĩna, na aingĩ ao nĩ mahũthagĩra njĩra itiganĩte magĩcaria thayũ wa meciria. Njĩra imwe mahũthagĩra itigaga meciria mao marĩ ũtheri ũũ atĩ no makorũo ũgwati-inĩ wa gũtharĩkĩrũo nĩ ndaimono. (Ringithania Mathayo 12:​43-45.) No thayũ ũrĩa Jehova atũheaga twamũhoya nĩ ũkĩrĩte thayũ o wothe mũndũ angĩgĩa naguo angĩhũthĩra njĩra ta icio cia kũhooreria meciria. Ningĩ rĩrĩa twahoya Jehova tuonanagia nĩ tũmwĩhokete biũ, na nĩ atũheaga “thayũ wa gũtũũra.” (Thoma Isaia 26:3.) Njĩra ĩmwe Jehova atũheaga thayũ nayo nĩ gũtũteithia kũririkana maandĩko marĩa matũũmagĩrĩria. Maandĩko macio nĩ matũteithagia kũigua tũhooreire tondũ nĩ matũririkanagia atĩ Jehova nĩ atwendete na nĩ endaga gũtũteithia.—Thab. 62:​1, 2.

6. Nĩ maũndũ ta marĩkũ ũngĩgweta mahoya-inĩ maku? (Ningĩ rora mbica.)

⁶ Ũrĩa ũngĩka. Rĩrĩa wacemania na igerio, “ikagĩria Jehova mũrigo waku” na ũmũhoe akũhe thayũ. (Thab. 55:22) Ningĩ no ũmũhoe akũhe ũũgĩ ũrĩa ũrabatara nĩguo ũhote kũhiũrania na igerio rĩu. (Thim. 2:​10, 11) Makĩria ma gũthaitha Jehova agũteithie gũkirĩrĩria, ndũkariganĩrũo kũmũcokagĩria ngatho. (Afil. 4:6) Roraga maũndũ marĩa maronania atĩ Jehova nĩ aragũtiirĩrĩra igerio-inĩ rĩaku, na ũkamũcokeria ngatho nĩ ũndũ wa ũteithio wake. Ndũkareke moritũ marĩa ũragerera matũme wage kuona irathimo iria wĩ nacio.—Thab. 16:​5, 6.

KIUGO KĨA NGAI

7. Kwĩruta Bibilia kũngĩtũteithia atĩa gũkirĩrĩria?

⁷ Jehova nĩ atũheete Kiugo gĩake nĩguo atũteithie gũkirĩrĩria. Bibilia nĩ ĩkoragwo na mĩhari mĩingĩ ĩrĩa ĩtũteithagia gũkorũo na ma atĩ Jehova nĩ arĩtũteithagia. Kwa ngerekano, Mathayo 6:8 yugaga ũũ: “Ithe wanyu nĩ amenyaga maũndũ marĩa mũbataraga o na mũtanamũhoya.” Jesu nĩwe waugire ciugo icio, na nĩ oĩ Jehova wega gũkĩra mũndũ ũngĩ o wothe. Kwoguo no tũkorũo na ma biũ atĩ rĩrĩa tũrathĩnĩka, Jehova nĩ amenyaga kĩrĩa tũrabatara, na nĩ arĩtũteithagia. Bibilia nĩ ĩkoragwo na mĩhari ĩngĩ mĩingĩ ta ĩyo ĩrĩa ĩtũheaga hinya wa gũkirĩrĩria.—Thab. 94:19.

8. (a) Heana ngerekano ya ũtaaro ũmwe wa Bibilia ũngĩtũteithia gũkirĩrĩria. (b) Tũngĩka atĩa nĩguo tũhotage kũririkana motaaro ma Bibilia rĩrĩa twamabatara?

⁸ Motaaro ma Bibilia no matũteithie gũkirĩrĩria. No matũhe ũũgĩ ũrĩa tũrabatara nĩguo tũtue matua mega. (Thim. 2:​6, 7) Kwa ngerekano, Bibilia ĩtwĩkĩraga ngoro tũtigatangĩke nĩ ũndũ wa rũciũ, handũ ha ũguo tũhiũranie na o mũthenya na mĩtangĩko yaguo. (Mat. 6:34) Tũngĩthomaga Bibilia o mũthenya na tũgecũrania kĩrĩa twathoma, nĩ ũrĩkoragwo ũrĩ ũndũ mũhũthũ kũririkana motaaro ma Bibilia rĩrĩa twamabatara.

9. Ngʼano cia Bibilia itũteithagia atĩa kũgĩa na ma atĩ Jehova nĩ arĩtũteithagia?

⁹ Ningĩ Bibilia nĩ ĩkoragwo na ngʼano cia andũ meehokete Jehova na makĩamũkĩra ũteithio wake. (Ahib. 11:​32-34; Jak. 5:17) Rĩrĩa twecũrania ngʼano ta icio, nĩ tũgĩaga na ma atĩ Jehova “nĩ rĩũrĩro ritũ na hinya witũ, ũteithio wonekaga na ihenya hĩndĩ ya mĩtangĩko.” (Thab. 46:1) Ningĩ rĩrĩa twecũrania ũrĩa ndungata icio cia Jehova cioonanirie wĩtĩkio na ũkirĩrĩria o na igĩcemanagia na moritũ, nĩ tũtindĩkagwo kwĩgerekania nacio.—Jak. 5:​10, 11.

10. Tũngĩka atĩa nĩguo tũgunĩke biũ kuumana na Bibilia?

¹⁰ Ũrĩa ũngĩka. Thomaga Bibilia o mũthenya, na ũkandĩka handũ maandĩko marĩa ũrona mangĩgũteithia. Ningĩ andũ aingĩ nĩ monete atĩ gũthoma rĩandĩko rĩa o mũthenya rũcinĩ, nĩ kũmaheaga ũndũ wa gwĩkĩra ngoro mangĩĩcũrania mũthenya ũcio. Mwarĩ wa Ithe witũ ũmwe wĩtagwo Mariea nĩ oonire ũũma wa ũndũ ũcio rĩrĩa aarũmbũyagia aciari ake eerĩ arĩa maarĩ na mũrimũ wa kansa. Nĩ kĩĩ kĩamũteithirie gũkirĩrĩria mĩeri-inĩ ĩrĩa maatooririo biũ nĩ mũrimũ ũcio? Aaugire, “Ndaathomaga rĩandĩko rĩa o mũthenya rũcinĩ, na ngarĩĩcũrania. Ũndũ ũcio nĩ wandeithagia gwĩcũrania o mũthenya ũhoro wĩgiĩ Jehova na maũndũ mega marĩa atũrutaga kũgerera Kiugo gĩake, handũ ha gwĩciria tu ũhoro wĩgiĩ mathĩna makwa.”—Thab. 61:2.

AARĨ NA ARIŨ A ITHE WITŨ

11. Tũiguaga atĩa rĩrĩa twamenya atĩ o na aarĩ na ariũ a Ithe witũ nĩ mahotete gũkirĩrĩria magerio?

¹¹ Jehova nĩ atũheete aarĩ na ariũ a Ithe witũ nĩguo atũteithie gũkirĩrĩria. Kũmenya tu atĩ ‘thiritũ yothe ya ariũ a Ithe witũ nĩ ĩracemania na mĩnyamaro o ta itũ,’ nĩ gũtũheaga ũũma atĩ tũtirĩ oiki. (1 Pet. 5:9) Kwoguo, no tũkorũo na ma atĩ ũndũ o wothe mũritũ tũragerera, andũ angĩ manacemania naguo na makahota kũũkirĩrĩria. Ũndũ ũcio ũronania atĩ o na ithuĩ no tũhote gũkirĩrĩria!—Atũm. 14:22.

12. Aarĩ na ariũ a Ithe witũ mangĩtũteithia atĩa, na ithuĩ tũngĩmateithia atĩa? (2 Akorintho 1:​3, 4)

¹² Aarĩ na ariũ a Ithe witũ nĩ matwĩkĩraga ngoro hĩndĩ ĩrĩa tũrakirĩrĩria moritũ. Ũguo nĩguo gwathiire harĩ mũtũmwo Paulo. Kaingĩ nĩ aacokagĩria ngatho arĩa maamũteithĩtie rĩrĩa aarĩ rungu rwa kĩoho kĩa nyũmba, na akamagweta na marĩĩtwa. Aarĩ na ariũ a Ithe witũ acio nĩ moomagĩrĩria Paulo, makamwĩkĩra ngoro, na makamũhe ũteithio ũrĩa aabataraga. (Afil. 2:​25, 29, 30; Kol. 4:​10, 11) O na ũmũthĩ aarĩ na ariũ a Ithe witũ no matwĩkĩre ngoro, na matũteithie gũkirĩrĩria mahinda maritũ. O na ithuĩ no tũmateithie na njĩra ta ĩyo rĩrĩa macemania na moritũ.—Thoma 2 Akorintho 1:​3, 4.

13. Nĩ kĩĩ gĩateithirie mwarĩ wa Ithe witũ Maya gũkirĩrĩria?

¹³ Mwarĩ wa Ithe witũ ũmwe wĩtagwo Maya kuuma Russia nĩ eekĩrirũo ngoro mũno nĩ aarĩ na ariũ a Ithe witũ. Mũciĩ wake nĩ waururirio mwaka-inĩ wa 2020, na thutha-inĩ agĩtwarũo igooti-inĩ nĩ ũndũ wa kũhunjĩria arĩa angĩ maũndũ marĩa etĩkĩtie. Aaugire ũũ: “Ihinda-inĩ rĩu ndaathirĩtwo nĩ hinya na ngakorũo na mĩtangĩko mĩingĩ, aarĩ na ariũ a Ithe witũ nĩ maahũũragĩra thimũ, makanyandĩkĩra ndũmĩrĩri na marũa, na ciugo ciao nĩ ciandeithirie gũkorũo na ma atĩ nĩ manyendete mũno. Mbere ĩyo nĩ ndoĩ atĩ ngoragwo famĩlĩ-inĩ ya aarĩ na ariũ a Ithe witũ manyendete, no kuuma mwaka wa 2020 nĩ ndagĩire na ma biũ na ũndũ ũcio.”

14. Ũngĩka atĩa nĩguo ũgunĩke biũ kuumana na ũteithio wa aarĩ na ariũ a Ithe witũ? (Ningĩ rora mbica.)

¹⁴ Ũrĩa ũngĩka. Rĩrĩa ũragerera ũndũ mũritũ, ndũkeyamũranie na aarĩ na ariũ a Ithe witũ. Ndũgetigĩre kũhoya athuri a kĩũngano ũteithio. No makorũo matariĩ ta “handũ ha kwĩhitha rũhuho, handũ ha kwĩgitia mbura ya kĩhuhũkanio.” (Isa. 32:2) Ningĩ ririkana atĩ aarĩ na ariũ a Ithe witũ arĩa angĩ o nao no marakirĩrĩria moritũ. Rĩrĩa wateithia arĩa angĩ nĩ ũrĩgĩaga na gĩkeno kĩrĩa kĩrĩgũteithagia gũkirĩrĩria magerio maku.—Atũm. 20:35.

KĨĨRĨGĨRĨRO GITŨ

15. (a) Kĩĩrĩgĩrĩro gĩateithirie Jesu atĩa? (Ahibirania 12:2) (b) Kĩĩrĩgĩrĩro gĩtũteithagia atĩa ũmũthĩ?

¹⁵ Jehova nĩ atũheete kĩĩrĩgĩrĩro kĩrũmu, kĩrĩa gĩtũteithagia gũkirĩrĩria. (Rom. 15:13) Ririkana atĩ kĩĩrĩgĩrĩro nĩ gĩateithirie Jesu gũkirĩrĩria mũthenya ũrĩa warĩ mũritũ makĩria ũtũũro-inĩ wake gũkũ thĩ. (Thoma Ahibirania 12:2.) Jesu nĩ aamenyaga atĩ wĩhokeku wake nĩ ũngĩateithĩrĩirie gũtheria rĩĩtwa rĩa Jehova. Ningĩ nĩ eerĩgagĩrĩra mũno ihinda rĩrĩa angĩgaacoka igũrũ kũrĩ Ithe, na rĩrĩa agaatungata hamwe na ariũ a Ithe Ũthamaki-inĩ wa igũrũ. Na njĩra o ta ĩyo, kĩĩrĩgĩrĩro gitũ gĩa gũgaatũũra tene na tene thĩinĩ wa thĩ njerũ nĩ gĩtũteithagia gũkirĩrĩria moritũ o mothe tũngĩcemania namo thĩinĩ wa thĩ ĩno ya Shaitani.

16. Kĩĩrĩgĩrĩro gĩateithirie atĩa mwarĩ wa Ithe witũ ũmwe gũkirĩrĩria, na weruta atĩa kuumana na ciugo ciake?

¹⁶ Ta wĩcirie ũrĩa kĩĩrĩgĩrĩro gĩateithirie mwarĩ wa Ithe witũ ũmwe wĩtagwo Anna wa kuuma Russia, rĩrĩa mũthuri wake aanyitirũo na agĩikio rũmande etereire ciira wake wambĩrĩrie. Anna aaugire ũũ: “Kũhoya nĩ ũndũ wa kĩĩrĩgĩrĩro gitũ na gwĩcũrania igũrũ rĩakĩo nĩ kũndeithagia ndigakue ngoro mũno. Nĩ njũĩ atĩ moritũ maya matigũtũũra. Jehova nĩ egũtooria thũ ciake, na tũkenere irathimo iria atwĩrĩire.”

17. Tũngĩonania ngatho atĩa nĩ ũndũ wa kĩĩrĩgĩrĩro kĩrĩa Jehova atũheete? (Ningĩ rora mbica.)

¹⁷ Ũrĩa ũngĩka. Caragia mahinda ma gwĩcũrania igũrũ rĩgiĩ kĩĩrĩgĩrĩro kĩa magegania kĩrĩa Jehova atwĩrĩire. Hũũraga mbica ũrĩ thĩinĩ wa thĩ njerũ ũgĩkenera irathimo iria igaakorũo kuo. Tweka ũguo, moritũ marĩa tũrĩcemanagia namo marĩonekaga marĩ ma ‘ihinda inini na mũhũthũ.’ (2 Kor. 4:17) Ningĩ, wĩrutanĩrie kũhunjĩria arĩa angĩ ũhoro wĩgiĩ maũndũ marĩa wĩtĩkĩtie. Geria gwĩciria ũrĩa ũrĩ ũndũ mũritũ harĩ o kũhiũrania na mathĩna thĩinĩ wa thĩ ĩno ya Shaitani, tondũ matiũĩ muoroto wa Ngai wa ihinda rĩũkĩte. Ũngĩambĩrĩria ndeereti nguhĩ hamwe nao, no warahũre wendi wao wa kũmenya makĩria ũhoro wĩgiĩ kĩĩrĩgĩrĩro gitũ kĩa Ũthamaki wa Ngai.

18. Nĩkĩ no tũkorũo na ma na ciĩranĩro cia Jehova?

¹⁸ Thutha wa Ayubu gũkirĩrĩria magerio maingĩ arĩ mwĩhokeku, eerire Jehova ũũ: “Rĩu nĩ menyete atĩ no ũhote gwĩka maũndũ mothe na atĩ gũtirĩ ũndũ ũbangĩte gwĩka ũngĩkũrema.” (Ayub. 42:2) Ayubu nĩ eerutĩte atĩ gũtirĩ ũndũ ũngĩgirĩrĩria Jehova kũhingia muoroto wake. Kũririkana ũndũ ũcio no gũtũhe hinya wa gũthiĩ na mbere gũkirĩrĩria. Ta wĩcirie ngerekano ya mũtumia ũkoretwo arĩ mũrwaru kwa ihinda iraihu, na agakua ngoro tondũ mandagĩtarĩ maingĩ nĩ maremetwo kũmũrigita. No agacemania na ndagĩtarĩ ũmwe ũrĩ na ũmenyeru, ũrahota kũmenya thĩna wake, na akamũtaarĩria ũrĩa ekũmũrigita. Mũtumia ũcio no aigue ahoorera na arĩ na gĩkeno, o na akorũo no oe ihinda agĩkahona. Kũmenya atĩ arĩ na mwĩhoko wa kũhona no kũmũteithie gũkirĩrĩria. Na njĩra o ta ĩyo, gũkorũo na ma na kĩĩrĩgĩrĩro gitũ kĩa ihinda rĩũkĩte gĩa Paradiso nĩ gũtũteithagia gũthiĩ na mbere gũkirĩrĩria.

19. Tũrabatara gwĩka atĩa nĩguo tũhote gũkirĩrĩria?

¹⁹ O ta ũrĩa tuona, Jehova nĩ atũteithagia gũkirĩrĩria magerio kũgerera mahoya, Kiugo gĩake, aarĩ na ariũ a Ithe witũ, na kĩĩrĩgĩrĩro gitũ. Tũngĩka ũrĩa wothe tũngĩhota nĩguo tũgunĩke biũ kuumana na njĩra icio, Jehova nĩ arĩtũteithagia kũhiũrania na moritũ o mothe tũngĩcemania namo, nginya rĩrĩa arĩniina mathĩna mothe thĩinĩ wa thĩ.—Afil. 4:13.