Mabuku Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata
© 2023 Watch Tower Bible and Tract Society of Pennsylvania
MACHI 4-10
MŨTHITHŨ KUUMA KIUGO-INĨ KĨA NGAI | THABURI 16-17
“Jehova, Kĩhumo Gĩakwa kĩa Wega”
w08 2/15 3 kĩb. 2-3
Igaga Jehova Mbere Yaku Hingo Ciothe
Ithuothe no twĩrute maũndũ maingĩ kuumana na andũ moĩkaine wega thĩinĩ wa Bibilia ta Iburahimu, Sara, Musa, Ruthu, Daudi, Esiteri, mũtũmwo Paulo, na angĩ. No ningĩ no tũgunĩke kuumana na ngʼano cia andũ matoĩkaine mũno. Gwĩcũrania ngʼano iria irĩ thĩinĩ wa Bibilia no gũtũteithie gwĩka kũringana na ciugo ici cia mwandĩki wa Thaburi: “Njigaga Jehova mbere yakwa hingo ciothe. Tondũ arĩ guoko-inĩ gwakwa kwa ũrĩo, gũtirĩ hĩndĩ ngenyenyeka.” (Thb. 16:8) Twagĩrĩirũo gũtaũkĩrũo atĩa nĩ ciugo icio?
Kaingĩ Mũthigari aanyitaga rũhiũ rwa njora na guoko kwa ũrĩo na kwoguo guoko kũu gũtiakoragwo kũgitĩirũo nĩ ngo ĩrĩa aanyitaga na guoko kwa ũmotho. No mũthigari ũngĩ angĩarũire arĩ hakuhĩ nake mwena wa ũrio, nĩ aamũgitagĩra. Tũngĩigaga Jehova meciria-inĩ na tũgekaga wendi wake, nĩ arĩtũgitagĩra. Kwoguo rekei tuone ũrĩa gwĩcũrania ngʼano iria irĩ Bibilia-inĩ kũngĩkĩra wĩtĩkio witũ hinya nĩgetha tũigage “Jehova mbere [itũ] hingo ciothe.”
Kũmaatha Maũndũ ma Bata Maandĩko-inĩ
it-2 714
Kĩũma kĩa Riitho
Rĩrĩa kiugo gĩa Kĩhibirania ʼi·shohnʹ (Gũc 32:10; Thi 7:2) kĩahũthĩrũo hamwe na ʽaʹyin (riitho), kĩngĩtaũrũo kiugo gwa kiugo kiugĩte “mũndũ mũnini wa riitho.” O nakĩo kiugo bath (mwarĩ) kĩhũthĩrĩtwo thĩinĩ wa Macakaya 2:18 kuuga “mwarĩ wa riitho,” na ciugo icio cierĩ ikoragwo ikĩaria ũhoro wa kĩũma kĩa riitho. Ciugo icio cierĩ (ʼi·shohnʹ bath-ʽaʹyin) ĩhũthĩrĩtũo thĩinĩ wa Thaburi 17:8 irĩ cia gũtĩtĩrithia, na ciataũrũo kiugo gwa kiugo ciugĩte, “mũndũ mũnini, mwarĩ wa riitho” (“kĩũma kĩa riitho”). Ciugo icio ikoragwo ikĩaria ũhoro wa kabica ka mũndũ, karĩa eyonaga kĩũma-inĩ kĩa riitho rĩa mũndũ ũcio ũngĩ.
Riitho nĩ rĩororo mũno, na nĩ rĩhiũhaga kwĩhinga rĩngĩingĩra kĩndũ gĩtagĩrĩire, nginya karũcuĩrĩ kanini kana karũkũngũ. No mũhaka gĩcunjĩ kĩa riitho kĩrĩa kĩhumbagĩra kĩũma kĩa riitho kĩgitĩrũo, tondũ kĩngĩtihio kana kĩgĩe thĩna nĩ ũndũ wa mũrimũ, mũndũ no age kuona wega kana atuĩke mũtumumu. Nĩkĩo Bibilia ĩhũthagĩra ciugo “kĩũma kĩa riitho rĩaku” kwaria ũhoro wa kĩndũ kĩagĩrĩire kũrũmbũiyo na kũgitĩrũo na njĩra nene. Ũguo nĩguo watho wa Ngai wagĩrĩire kũgitĩrũo. (Thi 7:2) Ũhoro-inĩ wĩgiĩ ũrĩa Ngai aarũmbũyagia Aisiraeli arĩ ta ithe wao, Gũcokerithia Maathani 32:10 yugaga atĩ aagitĩrire rũrĩrĩ rũu “ta kĩũma kĩa riitho rĩake.” Daudi aahoire Ngai akĩmwĩra amũgitĩre na amũrũmbũiye “ta kĩũma kĩa riitho.” (Thb 17:8) Eendaga Jehova ahiũhe kuoya ikinya amũteithie atharĩkĩrũo nĩ thũ.—Ringithania na Zek 2:8.
MACHI 11-17
MŨTHITHŨ KUUMA KIUGO-INĨ KĨA NGAI | THABURI 18
“Jehova Nĩwe . . . Ũrĩa Ũũhonokagia”
w09 5/1 14 kĩb. 4-5
Gĩkeno Kĩrĩa Kiumaga Kũrĩ Jehova Nĩkĩo Mwĩgitio Witũ
Ningĩ Bibilia nĩ ĩringithanagia Jehova na indo itarĩ muoyo. Nĩ ĩmwĩtaga “Rwaro rwa Ihiga rwa Isiraeli,” “ndũmba . . . ya ihiga,” na “mwĩgitio.” (2 Samueli 23:3; Thaburi 18:2; Gũcokerithia Maathani 32:4) Aringithanagio na indo icio nĩkĩ? O ta ũrĩa rwaro rwa ihiga rũkoragwo rũrũmĩte na rũtingĩeherio harĩa rũrĩ, no taguo Jehova Ngai akoragwo arĩ mwĩgitio mũrũmu harĩ wee.
Ibuku rĩa Thaburi rĩringithanagia Jehova na indo itiganĩte, rĩkĩenda kuonania ngumo ngũrani iria akoragwo nacio. Kwa ngerekano, Thaburi 84:11 yugaga atĩ Jehova nĩ “riũa na ngo” tondũ nĩwe Kĩhumo gĩa ũtheri, muoyo, hinya, na ũgitĩri. Nayo Thaburi 121:5 yugaga “Jehova nĩwe kĩĩruru guoko-inĩ gwaku kwa ũrĩo.” O ta ũrĩa handũ he na kĩĩruru hangĩgitĩra mũndũ kuumana na riũa ihiũ, no taguo Jehova angĩgitĩra ndungata ciake kuumana na riũa rĩa mathĩna, akahaana ta amahe kĩĩruru rungu rwa “guoko” gwake kana “mathagu” make.—Isaia 51:16; Thaburi 17:8; 36:7.
it-2 1161 kĩb. 7
Mũgambo
Ngai nĩ aiguaga mũgambo wa ndungata ciake. Andũ arĩa matungatagĩra Ngai na roho na ma, no mamũkaĩre marĩ na ma atĩ nĩ aiguaga mũgambo wao, gũtekũmakania rũthiomi rũrĩa marahũthĩra. O na mangĩaga kũmũhoya na mũgambo ũraiguĩka mamũhoe na ngoro, no “aiguaga” mathaithana mao tondũ Ngai nĩ oĩ ngoro cia andũ. (Thb 66:19; 86:6; 116:1; 1Sa 1:13; Ne 2:4) Ngai nĩ aiguaga kĩrĩro kĩa andũ marathĩnĩka arĩa mamũkayagĩra makĩhoya ũteithio. Ningĩ nĩ aiguaga mũgambo wa arĩa mamũkararagia na makabangĩra ndungata ciake maũndũ moru, na nĩ amenyaga mĩoroto ya ngoro ciao.—Kĩa 21:17; Thb 55:18, 19; 69:33; 94:9-11; Je 23:25.
Kũmaatha Maũndũ ma Bata Maandĩko-inĩ
it-1 432 kĩb. 2
Kerubi
Akerubi matiahaanaga ta mĩcongo mĩnene yarĩ na mathagu ĩrĩa yathathayagio nĩ ndũrĩrĩ iria ciathiũrũrũkĩirie Aisiraeli ta ũrĩa andũ amwe maugaga. Kũringana na ũrutani wa Ayahudi a tene ũrĩa ũnyitagwo mbaru nĩ andũ aingĩ (o na gũtuĩka Bibilia ndĩheanĩte ũhoro ũcio), Akerubi acio maarĩ na mũhianĩre wa mũndũ. Maathondeketwo na njĩra ya mwanya mũno, na maarũgamagĩrĩra araika arĩa makoragwo marĩ na riri mũnene. Maacongetwo kũringana na “mũhaano” ũrĩa Musa oonirio nĩ Jehova we mwene. (Tham 25:9) Mũtũmwo Paulo aataarĩirie ũhoro wao akiuga ũũ: “Akerubi marĩ na riri maahumbĩrĩte gĩkunĩko kĩa ũiguano.” (Ahi 9:5) Akerubi acio maarũgamagĩrĩra gũkorũo kuo kwa Jehova. Aaugire ũũ: “Hau nĩho ndĩrĩkuumagĩrĩra na ngakwarĩria ndĩ igũrũ rĩa gĩkunĩko kĩu. Gatagatĩ ka akerubi acio erĩ marĩ igũrũ rĩa ithandũkũ rĩa Ũira.” (Tham 25:22; Nda 7:89) Nĩkĩo Bibilia yugaga atĩ Jehova aakoragwo aikarĩte “igũrũ rĩa [kana gatagatĩ-inĩ ka] akerubi.” (1Sa 4:4; 2Sa 6:2; 2Ath 19:15; 1Ma 13:6; Thb 80:1; 99:1; Isa 37:16) Akerubi acio maarũgamagĩrĩra “mũhianĩre wa ngaari ya mbarathi” ĩrĩa Jehova aatwarithagia (1Ma 28:18), namo mathagu maarũgamagĩrĩra ũgitĩri na ũhoti wa gũthiĩ handũ na ihenya. Nĩkĩo rĩrĩa Daudi aainire igũrũ rĩgiĩ ũrĩa Jehova aathiire kũmũteithia na ihenya, aaugire ũũ “Ookire ombũkĩte arĩ igũrũ rĩa kerubi” na “agĩikũrũka thĩ arĩ igũrũ rĩa mathagu ma kĩũmbe kĩa roho.”—2Sa 22:11; Thb 18:10.
MACHI 25-31
MŨTHITHŨ KUUMA KIUGO-INĨ KĨA NGAI | THABURI 22
Kũmaatha Maũndũ ma Bata Maandĩko-inĩ
w06 11/1 29 kĩb. 7
Kuonania Gĩtĩo Harĩ Mĩcemanio Itũ
Nĩ harĩ njĩra cigana ũna tũngĩonania nacio atĩ nĩ tũtĩĩte mĩcemanio itũ. Njĩra ĩmwe nĩ gũkorũo kuo hĩndĩ ĩrĩa kũrainwo nyĩmbo cia Ũthamaki. Nyĩmbo nyingĩ ikoragwo ciandĩkĩtwo ta arĩ mahoya, kwoguo ciagĩrĩire kũinwo na njĩra ya gĩtĩo. Mũtũmwo Paulo aagwetire ciugo cia Thaburi 22 iria ciugaga ũũ ikĩaria ũhoro wĩgiĩ Jesu: “Nĩ ngũmenyithania rĩĩtwa rĩaku kũrĩ ariũ a Ithe witũ; nĩ ngũkũgooca na rwĩmbo ndĩ thĩinĩ wa kĩũngano.” (Ahibirania 2:12) Kwoguo nĩ twagĩrĩirũo gũkorũo tũikarĩte thĩ mũikarĩri gĩtĩ atananyita andũ ũgeni maine rwĩmbo, na tũgecũrania igũrũ rĩgiĩ ciugo iria tũraina. Rekei kũina gwitũ kũhaane ta kwa mwandĩki wa Thaburi ũrĩa waugire ũũ: “Nĩ ngũgooca Jehova na ngoro yakwa yothe thĩinĩ wa kĩgomano kĩa andũ arĩa arũngĩrĩru o na kĩũngano-inĩ.” (Thaburi 111:1) Kũinĩra Jehova nyĩmbo cia kũmũgooca nĩ gĩtũmi kĩmwe kĩbatiĩ gũtũma tũkinyage mĩcemanio-inĩ tene na tũgaikara nginya mũico.
Goocaga Jehova “Thĩinĩ wa Kĩũngano”
O ta mahinda ma tene, ũmũthĩ andũ nĩ makoragwo na mĩeke ya gũtaarĩria wĩtĩkio wao marĩ “thĩinĩ wa kĩũngano.” Mweke ũmwe ithuothe tũkoragwo naguo nĩ kũheana macokio rĩrĩa kuorio ciũria mĩcemanio-inĩ ya kĩũngano. Ũndũ ũcio nĩ ũkoragwo na ũguni mũnene. Kwa ngerekano, macokio marĩa monanagia ũrĩa tũngĩtooria kana twĩtheme mathĩna, nĩ mateithagia ariũ a Ithe witũ gũtua itua irũmu rĩa kũrũmĩrĩra motaaro ma Bibilia. Macokio marĩa mataaragĩria Maandĩko marĩa monanĩtio kana magataarĩria maũndũ marĩa mũndũ aronire agĩka ũthuthuria, no matũme arĩa angĩ mende kwagagĩria wĩruti wao.
ĨPURO 8-14
MŨTHITHŨ KUUMA KIUGO-INĨ KĨA NGAI | THABURI 26-28
Ũrĩa Daudi Eekaga Nĩguo Atũũrie Wĩkindĩru Wake
w04 12/1 14 kĩb. 8-9
Thiagĩra Njĩra-inĩ ya Wĩkindĩru
Daudi aahoire akiuga ũũ: “Ndakũhoya ũũthuthurie wee Jehova, na ũngerie; ũtherie methugunda makwa ma thĩinĩ biũ o hamwe na ngoro yakwa.” (Thaburi 26:2) Ngoro ya mũhaano ĩrũgamĩrĩire mũndũ wa na thĩinĩ, ũguo nĩ kuuga kĩrĩa gĩtindĩkaga mũndũ gwĩka maũndũ, ũrĩa araigua na kũu thĩinĩ, na ũhoti wake wa gwĩciria. Rĩrĩa Daudi eerire Jehova amũthuthurie, aamwĩraga arore ũrĩa methugunda make ma thĩinĩ biũ mahaana, o hamwe na ũrĩa araigua ngoro-inĩ.
9 Daudi eendaga methugunda make na ngoro yake itherio. Jehova atheragia atĩa ũmũndũ witũ wa na thĩinĩ? Daudi aainire akiuga ũũ: “Nĩ ngũgooca Jehova, o we ũũheete ũtaaro. O na ũtukũ, methugunda makwa ma thĩinĩ biũ nĩ manũngaga.” (Thaburi 16:7) Eendaga kuuga atĩa? Atĩ ũtaaro wa Ngai nĩ waingĩraga thĩinĩ wake biũ, ũkarũnga methugunda make ma thĩinĩ. No gũthiĩ ũguo nginya harĩ ithuĩ tũngĩcũrania ũtaaro ũrĩa tũheagwo kũgerera Kiugo kĩa Ngai, andũ arĩa ahũthagĩra gũtũruta, na ithondeka rĩake, na tũreke ũingĩre thĩinĩ witũ biũ. Tũngĩhoyaga Jehova kaingĩ atũtherie na njĩra ĩyo, o na ithuĩ nĩ tũrĩhotaga gũthiĩra njĩra-inĩ ya wĩkindĩru.
w04 12/1 15 kĩb. 12-13
Thiagĩra Njĩra-inĩ ya Wĩkindĩru
Daudi nĩ aagwetire ũndũ ũngĩ wamũteithirie kũrũmia wĩkindĩru wake akiuga ũũ: “Ndinyitanagĩra [kana, ndikaraga thĩ] na andũ a maheeni, na nĩ ndĩĩthemaga arĩa mehithaga ũrĩa matariĩ. Nĩ thũire thiritũ ya arĩa mekaga maũndũ moru, na nĩ ndegaga kũnyitanĩra na andũ aganu.” (Thaburi 26:4, 5) Daudi ndangĩetĩkĩrire nginya gũikarania na andũ aganu. Nĩ aathũire thiritũ njũru.
Ĩ ithuĩ na ithuĩ? Hihi nĩ tũregaga kũnyitanĩra na andũ arĩa maragia maheeni tabarĩra-inĩ cia TV, video-inĩ, thenema-inĩ, Intaneti-inĩ, kana kũndũ kũngĩ? Hihi nĩ twĩthemaga arĩa mehithaga ũrĩa matariĩ? Andũ amwe arĩa tũthomaga nao kana arĩa tũrutaga wĩra nao, no mende tũgĩe ũrata nao marĩ na muoroto mũũru. Hihi no twende kũgĩa na ũrata wa hakuhĩ hamwe na andũ arĩa matarũmagĩrĩra ũhoro wa ma? O na aregenyũki no metue atĩ nĩ andũ ega, mahithe muoroto ũrĩa makoragwo naguo wa gũtũma tũtige gũtungatĩra Jehova. Ĩ kũngĩkorũo na andũ kĩũngano-inĩ maratũũra ũtũũro wa ũhinga? O nao makoragwo makĩhitha ũrĩa mahaana. Jayson, ũrĩa ũkoragwo arĩ ndungata ya kĩũngano, aarĩ na arata ta acio arĩ mwĩthĩ. Aaugire ũũ igũrũ rĩao: “Mũthenya ũmwe, ũmwe wao aanjĩrire ũũ: ‘Gũtiramakania ũrĩa tũreka rĩu, tondũ rĩrĩa thĩ njerũ ĩgooka, tũgaakorũo tũrĩ akuũ. Tũtikaamenya kana nĩ harĩ ũndũ tũrorũo nĩguo.ʼ” Jayson aacokire akiuga ũũ: “Ciugo icio nĩ ciatũmire ndĩcirie kerĩ. Niĩ ndingĩenda gũkorũo nguĩte rĩrĩa thĩ njerũ ĩgaakinya.” Nĩ ũndũ ũcio agĩtiga kũnyitanĩra na arata ta acio. Mũtũmwo Paulo aaheanire mũkaana ũyũ: “Mũtikahĩtithio. Thiritũ njũru nĩ ithũkagia mĩtugo mĩega.” (1 Akorintho 15:33) Nĩ ũndũ wa bata mũno twĩtheme thiritũ njũru!
w04 12/1 16 kĩb. 17-18
Thiagĩra Njĩra-inĩ ya Wĩkindĩru
Gĩikaro kĩrĩa kĩamũre, kĩrĩa gĩakoragwo na kĩgongona gĩa kũrutĩra magongona, nĩkuo andũ maathiaga gũthathaĩria thĩinĩ wa Isiraeli. Nĩ ũndũ wa ũrĩa Daudi aaiguaga akenetio nĩ gĩikaro kĩu, aaugire ũũ mahoya-inĩ: “Atĩrĩrĩ Jehova, nĩ nyendete nyũmba ĩrĩa ũikaraga, kũndũ kũrĩa riri waku ũikaraga.”—Thaburi 26:8.
Hihi nĩ twendete gũcemania kũndũ kũrĩa tũrutagwo igũrũ rĩgiĩ Jehova? O Nyũmba ya Ũthamaki hamwe na mũbango wayo wa kũrutana maũndũ ma kĩĩroho, nĩyo ĩkoragwo ĩrĩ kũndũ kũrĩa ũhoro wa ma ũrutanagĩrũo gĩcigo-inĩ kĩrĩa ĩrĩ. Ningĩ nĩ tũkoragwo na igomano cia thikũ ithatũ na igomano cia mũthiũrũrũko. Igomano-inĩ icio nĩ tũheagwo “iririkania” cia Jehova. Tũngĩĩruta ‘gũcienda mũno’ nĩ tũrĩiguaga tũkĩhĩahĩa gũthiĩ mĩcemanio, na twathiĩ kuo tũgathikĩrĩria na kinyi. (Thaburi 119:167) Nĩ tũiguaga tũcanjamũkĩte twĩ hamwe na aarĩ na ariũ a Ithe witũ tondũ nĩ matũcanjamũraga, na magatũteithia gũtũũra njĩra-inĩ ya wĩkindĩru.—Ahibirania 10:24, 25.
Kũmaatha Maũndũ ma Bata Maandĩko-inĩ
w06 7/15 28 kĩb. 15
Jehova nĩ Ahonokagia Mũndũ Ũrĩa Ũranyamarĩka
Daudi aainire akiuga ũũ: “O na baba na maitũ mangĩndiganĩria, Jehova nĩ ekũnyamũkĩra.” (Thaburi 27:10) Nĩ twĩkĩragwo ngoro mũno kũmenya atĩ wendo wa Jehova nĩ ũkĩrĩte wa mũciari o wothe. O na gũtuĩka kũregwo, kũnyarirũo, kana gũtiganĩrio nĩ mũciari nĩ kũrĩ ruo, ũndũ ũcio ndũhutagia ũrĩa Jehova akũrũmbũyagia. (Aroma 8:38, 39) Ririkana atĩ Ngai agucagĩrĩria andũ arĩa endete. (Johana 3:16; 6:44) Gũtekũmakania maũndũ marĩa wanekwo nĩ andũ, Ithe witũ wa igũrũ nĩ akwendete mũno!
ĨPURO 15-21
MŨTHITHŨ KUUMA KIUGO-INĨ KĨA NGAI | THABURI 29-31
Kũrũngwo nĩ Njĩra ya Ngai ya Gũtuonia Wendo
it-1 802 kĩb. 3
Ũthiũ
‘Kũhitha ũthiũʼ kũrũgamagĩrĩra maũndũ matiganĩte gũkĩringana nĩ ũndũ ũrĩkũ ũrarĩrĩrio. Rĩrĩa Jehova Ngai ahitha ũthiũ wake, kaingĩ ũndũ ũcio wonanagia atĩ nĩ eheria gwĩtĩkĩrĩka gwake kana hinya wake. Ũndũ ũcio no ũkorũo uumanĩte na kwaga gwathĩka kwa mũndũ kana gĩkundi kĩa andũ, ta rũrĩrĩ rwa Isiraeli. (Ayu 34:29; Thb 30:5-8; Isa 54:8; 59:2) Rĩmwe rĩrĩa Jehova ahitha ũthiũ wake, ũndũ ũcio wonanagia kwaga kuonania hinya wake kũgerera ciĩko kana ciugo, agĩeterera ihinda rĩrĩa rĩagĩrĩru harĩ we rĩkinye. (Thb 13:1-3) Rĩrĩa Daudi eerire Ngai “ndũkarore [kana, hitha ũthiũ waku ndũkone] mehia makwa,” aamwĩraga amuohere kana amwehererie mehia make.—Thb 51:9; ringithania na Thb 10:11.
Kũmaatha Maũndũ ma Bata Maandĩko-inĩ
w06 5/15 19 kĩb. 13
Matemo Kuuma Ibuku-inĩ rĩa Mbere rĩa Thaburi
31:23—Mũndũ mwĩtĩi arĩhagwo atĩa na njĩra nene? Marĩhi marĩa mararĩrĩrio rĩandĩko-inĩ rĩrĩ nĩ kũherithio. Rĩrĩa mũndũ mũthingu ahĩtia atekwenda, arĩhagwo na njĩra ya kũrũngwo nĩ Jehova. No tondũ mũndũ mwĩtĩi ndatiganaga na mĩthiĩre yake mĩũru, aheagwo iherithia iritũ, na kwoguo agakorũo arĩhĩtwo na njĩra nene.—Thimo 11:31; 1 Petero 4:18.
ĨPURO 22-28
MŨTHITHŨ KUUMA KIUGO-INĨ KĨA NGAI | THABURI 32-33
Wagĩrĩirũo Kuumbũra Mehia Maritũ Nĩkĩ?
w01 6/1 30 kĩb. 1
Kuumbũra Mehia nĩ Gũtũmaga Mũndũ Acokwo nĩ Thayũ
Rĩrĩa Daudi aaumbũrire mehia make, ndaacokire kwĩyona atarĩ kĩene rĩngĩ. Ciugo iria aandĩkire thaburi-inĩ itiganĩte ciĩgiĩ kuumbũra mehia, cionanagia ũrĩa aaiguire acokwo nĩ thayũ na agĩtua itua irũmu rĩa gũtungatĩra Ngai arĩ mwĩhokeku. Ngerekano ĩmwe nĩ Thaburi 32. Aaugire ũũ mũhari-inĩ wa mbere: “Gũkena nĩ mũndũ ũrĩa woheirũo mahĩtia make, ũrĩa mehia make mahumbĩrĩtwo.” O na mũndũ angĩkorũo ekĩte mehia maritũ atĩa, no agĩe na gĩkeno angĩĩrira kuuma ngoro. Njĩra ĩmwe mũndũ angĩonania atĩ nĩ erirĩte kuuma ngoro, nĩ gwĩtĩkĩra mahĩtia make ta ũrĩa Daudi eekire. (2 Samueli 12:13) Ndaageririe gwĩtetera harĩ Jehova kana gũcokereria arĩa angĩ mahĩtia. Mũhari wa gatano uugaga ũũ: “Na niĩ ngĩkumbũrĩra mehia makwa; ndiahumbĩrire mahĩtia makwa. Ngiuga atĩrĩ: ‘Nĩ ngumbũrĩra Jehova mehia makwa.ʼ Nawe ũkĩnjohera mahĩtia ma mehia makwa.” Mũndũ angiumbũra mehia make atekũhithĩrĩra nĩ acokagwo nĩ thayũ, na thamiri yake ndĩbatiĩ kũmũthĩnia rĩngĩ nĩ ũndũ wa mahĩtia ma tene.
Kũmaatha Maũndũ ma Bata Maandĩko-inĩ
w06 5/15 20 kĩb. 1
Matemo Kuuma Ibuku-inĩ rĩa Mbere rĩa Thaburi
33:6; kohoro ka magũrũ-inĩ—“Roho” kana “mĩhũmũ” ya kanua ka Jehova nĩ kĩĩ? Nĩ roho mũtheru, kana hinya wa Ngai wa gwĩka maũndũ, ũrĩa aahũthĩrire kũũmba igũrũ rĩrĩa tuonaga na maitho. (Kĩambĩrĩria 1:1, 2) Wĩtagwo roho wa kanua gake tondũ o ta mĩhũmũ ĩrĩ na hinya, no ũtũmwo ũkahingie maũndũ kũndũ kũraihu.
ĨPURO 29–MĨĨ 5
MŨTHITHŨ KUUMA KIUGO-INĨ KĨA NGAI | THABURI 34-35
‘Goocaga Jehova Mahinda Mothe’
w07 3/1 22 kĩb. 11
Nĩ Tũtũũgĩriei Rĩĩtwa rĩa Jehova twĩ Hamwe
“Ndĩrĩgoocaga Jehova mahinda mothe; ndĩrĩmũgoocaga na mĩromo yakwa hĩndĩ ciothe.” (Thaburi 34:1) Rĩrĩa Daudi aaikaraga werũ-inĩ akĩũrĩra Saulu, no mũhaka akorũo nĩ aatangĩkaga mũno nĩ ũndũ wa indo cia kĩĩmwĩrĩ. No ciugo icio aaugire ironania atĩ ndaarekaga mĩtangĩko yake ĩgirie agooce Jehova. Kĩu nĩ kĩonereria kĩega harĩ ithuĩ rĩrĩa twacemania na moritũ. Tũrĩ cukuru, wĩra-inĩ, hamwe na aarĩ na ariũ a Ithe witũ, kana ũtungata-inĩ, ũndũ ũrĩa tũbatiĩ gwĩkĩrĩra mũno nĩ kũgooca Jehova. Ta wĩcirie itũmi nyingĩ iria tũkoragwo nacio cia kũmũgooca. Kwa ngerekano, no twĩrute na tũkenere maũndũ maingĩ tũngĩĩrorera ũũmbi wa magegania wa Jehova. Ningĩ ta wĩcirie maũndũ marĩa ahingĩtie kũgerera gĩcunjĩ gĩa gũkũ thĩ gĩa ithondeka rĩake. Jehova nĩ ahũthĩrĩte andũ ehokeku kũhingia maũndũ manene mahinda-inĩ maya, o na gũtuĩka ti akinyanĩru. Mawĩra ma Jehova mahaana atĩa, makĩringithanio na ma andũ arĩa matũũgagĩrio thĩinĩ wa thĩ? No twĩtĩkanie na ciugo ici cia Daudi: “Gũtirĩ ũngĩ ũhaana tawe harĩ ngai iria ingĩ, wee Jehova, gũtirĩ mawĩra mangĩ matariĩ ta maku.”—Thaburi 86:8.
w07 3/1 22 kĩb. 13
Nĩ Tũtũũgĩriei Rĩĩtwa rĩa Jehova twĩ Hamwe
“Nĩ ndĩrĩĩrahaga nĩ ũndũ wa Jehova; andũ arĩa ahooreri marĩiguaga ũhoro ũcio magakena.” (Thaburi 34:2) Thĩinĩ wa rĩandĩko rĩu, Daudi ndeerahaga nĩ ũndũ wa maũndũ marĩa aahingĩtie. Kwa ngerekano, ndeerahire nĩ ũndũ wa ũrĩa aahotire gwĩtua mũgũrũki arĩ mbere ya mũthamaki wa Gathu. Nĩ aamenyaga atĩ Jehova nĩwe wamũgitĩrire arĩ Gathu, na nĩwe wamũteithirie kũhonoka. (Thimo 21:1) Kwoguo Daudi ndeerahaga nĩ ũndũ wake mwene, no eerahaga nĩ ũndũ wa Jehova. Ũndũ ũcio nĩ watũmaga andũ arĩa ahooreri magucĩrĩrio kwenda Jehova. O na Jesu nĩ aatũũgagĩria rĩĩtwa rĩa Jehova, na ũndũ ũcio nĩ watũmaga andũ arĩa enyihia na arĩa meehaarĩirie kũrutwo magucĩrĩrio harĩ Jehova. Ũmũthĩ, andũ ahooreri kuuma ndũrĩrĩ ciothe nĩ magucagĩrĩrio harĩ kĩũngano kĩa Akristiano aitĩrĩrie maguta gĩa thĩ yothe, kĩrĩa Jesu arĩ we mũtwe wakĩo. (Akolosai 1:18) Andũ acio ahooreri nĩ mahutagio ngoro rĩrĩa maigua rĩĩtwa rĩa Ngai rĩkĩgoocithio nĩ andũ ake enyihia, na rĩrĩa maigua ndũmĩrĩri ya Bibilia, ĩrĩa mateithagio gũtaũkĩrũo kũgerera roho mũtheru wa Ngai.—Johana 6:44; Atũmwo 16:14.
w07 3/1 23 kĩb. 15
Nĩ Tũtũũgĩriei Rĩĩtwa rĩa Jehova twĩ Hamwe
“Ndatuĩririe ũhoro harĩ Jehova, nake akĩnjokeria. Aahonokirie kuuma harĩ maũndũ mothe marĩa maanjĩkĩraga guoya.” (Thaburi 34:4) Ũndũ ũcio warĩ wa bata mũno harĩ Daudi. Nĩkĩo aacokire akiuga ũũ: “Mũndũ ũcio ũtarĩ hinya aakaĩire Jehova, nake akĩmũigua. Aamũhonokirie kuuma harĩ mĩtangĩko yake yothe.” (Thaburi 34:6) Rĩrĩa twĩ hamwe na aarĩ na ariũ a Ithe witũ, nĩ tũkoragwo na mĩeke mĩingĩ ya gũtaarĩria maũndũ ma gwĩkĩra ngoro megiĩ ũrĩa Jehova atũteithĩtie gũkirĩrĩria moritũ. Ũndũ ũcio nĩ wĩkĩraga hinya wĩtĩkio wa aarĩ na ariũ a Ithe witũ, o ta ũrĩa ciugo cia Daudi ciekĩraga hinya wĩtĩkio wa andũ arĩa maarĩ hamwe nake. Arata a Daudi ‘maarorire Jehova magĩkenga; mothiũ mao matingĩaconorithirio.ʼ (Thaburi 34:5) O na gũtuĩka mooragĩra Mũthamaki Saulu, matiaiguaga maconokete. Maarĩ na ma atĩ Ngai aarĩ hamwe na Daudi, na nĩkĩo mothiũ mao maakengaga. O na ũmũthĩ, andũ arĩa erũ kĩũngano-inĩ, hamwe na arĩa matungatĩire Jehova ihinda iraihu, nĩ mamwĩhokaga amateithie. Nĩ ũndũ wa kwĩyonera ũrĩa amateithagia, mothiũ mao nĩ makengaga na magatua itua irũmu rĩa gũtũũra marĩ ehokeku.
Kũmaatha Maũndũ ma Bata Maandĩko-inĩ
w06 5/15 20 kĩb. 2
Matemo Kuuma Ibuku rĩa Mbere rĩa Thaburi
35:19—Daudi eendaga kuuga atĩa rĩrĩa aahoire Jehova atĩ ndakareke arĩa mamũthũire maunanĩre maitho? Kuunanĩra maitho kũngĩonanirie atĩ thũ cia Daudi nĩ ciakenaga nĩ ũndũ wa kũgaacĩrithia mĩbango yacio ya gwĩka Daudi maũndũ moru. Kwoguo Daudi aahoyaga ũndũ ũcio ndũgekĩke.