Nĩa Matũũraga Ciikaro-inĩ cia Roho?

Mũtumia ũmwe Rũraya akaingĩra kanitha anyitĩte rũthariũ, na agaturia ndu na gĩtĩo kĩnene mbere ya mũhianano wa Maria. Famĩlĩ ĩmwe thĩinĩ wa Afrika, ĩgaita gacohi mbĩrĩra-inĩ ya mũndũ wao mahete gĩtĩo. Mwanake ũmwe thĩinĩ wa Amerika akehinga kũrĩa irio na agecũrania, akĩĩhoka kwaranĩria na mũraika ũrĩa etĩkĩtie atĩ nĩwe ũmũgitagĩra. Mũtungatĩri ũmwe thĩinĩ wa Asia agacina maratathi me na marangi ngũrani marĩ ta igongona kũrĩ maroho ma andũ arĩa maakuire.

NĨ ŨNDŨ ũrĩkũ ũhaanaine harĩ andũ acio othe? Othe metĩkĩtie atĩ nĩ kũrĩ ciũmbe njũgĩ ciikaro-inĩ cia roho iria cingĩarĩrio, na atĩ nĩ irĩ ũhoti wa kũingĩrĩra na njĩra nene mĩtũũrĩre ya andũ. Hatarĩ nganja, wĩtĩkio ũcio ti mũgeni kana wa kũgegania. Ũndũ ũrĩa wa kũgegania nĩ atĩ kũrĩ mawĩtĩkio matiganĩte megiĩ nĩa matũũraga ciikaro-inĩ cia roho.

Aithĩramu mahoyaga o Ngai ũmwe​​—⁠Allah.a Andũ a ndini iria ciĩĩtaga cia Gĩkristiano moigaga atĩ Ngai nĩ Ũtatũ: Ngai Ithe, Ngai Mwana, na Ngai Roho Mũtheru. Ahĩndĩ meetĩkĩtie atĩ kwĩ ngai makiri maingĩ. Andũ angĩ nao moigaga atĩ maroho maikaraga he nyamũ, mĩtĩ, mahiga, na njũũĩ. Angĩ nao metĩkagia maũndũ marĩa mathomaga mabuku-inĩ, monaga thĩinĩ wa video na TV igũrũ rĩgiĩ araika, ndaimono, na ciũmbe ingĩ cia roho.

O ta ũrĩa kwĩ mawĩtĩkio ngũrani megiĩ ngai, noguo kũrĩ mawoni ngũrani ma ũrĩa andũ mangĩaranĩria nacio. Gwĩciria kwega gũtwĩraga atĩ njĩra icio ciothe itingĩkorũo irĩ njega. Ta wĩcirie ũndũ ũyũ: Ũtanamba kũhũũra thimũ-rĩ, nĩ ũbataraga kũmenya nũũ ũrahũũrĩra na ũkorũo na ma atĩ ũrĩa ũrahũũrĩra nĩ mũndũ wĩ ho na nĩegwĩtĩkĩra kwaranĩria nawe. Kũhũũrĩra thimũ mũndũ ũtakoragwo ho nĩ ũndũ wa tũhũ mũtheri. O na ũũru makĩria, kũhũũrĩra thimũ mũndũ ũretua mũndũ ũngĩ no akorũo arĩ ũgwati.

Kwoguo-rĩ, nũũ hihi ũtũũraga ciikaro-inĩ cia roho? Bibilia nĩĩcokagia kĩũria kĩu, na makĩria ma ũguo nĩ ĩtaaragĩria nũũ twagĩrĩiruo kwaranĩria nake na tũngĩĩrĩgĩrĩra atũcokerie atĩa. Thiĩ na mbere gũthoma. No ũgegio nĩ ũrĩa Bibilia yugĩte igũrũ rĩgiĩ ũndũ acio.

[Kohoro ka magũrũ-inĩ]