KUUMA NGOTHI-INĨ
Rĩrĩa Mũndũ Wendete Akua
“Ngai arekire wendi wake. . . . Tiga . . . kũrĩra.”
Ciugo icio ciahehereirũo mũtumia wĩtagwo Bebe. Aarĩ mathiko-inĩ ma baba wao, ũrĩa wakuĩte kuumana na aksidenti ya barabara.
Bebe nĩ eendete baba wao mũno. Ciugo icio ciaaririo nĩ mũrata wa famĩlĩ yao arĩ na ngoro njega, no handũ ha kũhoreria Bebe nĩ kũmũũraga ciamũragire ngoro. Aaikaraga akĩĩraga atĩ, “Baba ndaragĩrĩire gũkua.” Rĩrĩa Bebe aandĩkire maũndũ macio ibuku-inĩ thutha wa mĩaka ĩigana ũna, no aarĩ na ihooru.
O ta ũrĩa Bebe aacokire kuona, ihinda iraihu no rĩhĩtũke mũndũ atarĩ arathirũo nĩ ihooru, makĩria angĩkorũo ũcio ũkuĩte ararĩ mũrata wake wa hakuhĩ. Thĩinĩ wa Bibilia, gĩkuũ gĩĩtĩtwo “thũ ya mũico.” (1 Akorintho 15:26) Gĩkuũ gĩũkaga ũtũũro-inĩ witũ na tũtingĩhota gũgĩĩthema, na o na tũterĩgĩrĩire gĩgatũtigithũkania na endwa aitũ. Gũtirĩ mũndũ ũngĩĩthema moimĩrĩro ma kĩo. Nĩ ũndũ ũcio, tũtibatiĩ kũmaka tũngĩona atĩ tũtirahota kũhiũrania na gĩkuũ na moimĩrĩro ma kĩo.
No kũhoteke waneyũria ũũ: ‘Mũndũ aikaraga ihinda rĩigana atĩa angĩgaathirũo nĩ ihooru? Mũndũ angĩhiũrania atĩa na ihooru? Ingĩũmĩrĩria andũ arĩa makuĩrĩirũo na njĩra ĩrĩkũ? Hihi nĩ harĩ kĩĩrĩgĩrĩro harĩ endwa aitũ arĩa makuĩte?’