Ũrĩa Mũũmbi Aguũrĩtie Ciĩranĩro Ciake

Kuuma rĩrĩa andũ moombirũo, Mũũmbi witũ anaranĩria na andũ kũgerera kũrĩ araika na anabii. Makĩria ma ũguo, nĩ aandĩkithirie ndũmĩrĩri na ciĩranĩro ciake. Ciĩranĩro icio cia Ngai nĩ ihutĩtie ũtũũro waku wa mahinda mokĩte. Nĩ kũ tũngĩona ciĩranĩro icio cia Ngai mahinda-inĩ maya?

Ndũmĩrĩri ya Ngai harĩ ithuĩ ĩrĩ thĩinĩ wa Maandĩko Matheru. (2 Timotheo 3:16) Ngai aahũthĩrire anabii na njĩra ĩrĩkũ kwandĩka ndũmĩrĩri yake? (2 Petero 1:21) Ngai eekĩrire ndũmĩrĩri yake meciria-inĩ ma andĩki, nao magĩcoka makĩmĩandĩka. Ũndũ ta ũcio nĩ wĩkĩkaga ũmũthĩ. Mũhũũri biacara angĩra karani wake amwandĩkĩre marũa, tuugaga marũa macio nĩ ma mũhũũri biacara ũcio. Na njĩra o ta ĩyo, o na akorũo Ngai aahũthĩrire andũ kwandĩka ndũmĩrĩri yake, we nĩwe Mũtungi wa Maandĩko Matheru.

KIUGO KĨA NGAI NĨ GĨKINYAGĨRA ANDŨ AINGĨ

Kiugo kĩa Ngai nĩ gĩa bata mũno ũũ atĩ endaga andũ othe magĩthome na mataũkĩrũo nĩkĩo. Ũmũthĩ, ‘ũhoro wake mwega wa tene na tene’ nĩ ũkinyagĩra “ndũrĩrĩ ciothe na mĩhĩrĩga na thiomi.” (Kũguũrĩrio 14:6) Nĩ ũndũ wa ũteithio wa Ngai, Maandĩko Matheru nĩ monekaga marĩ mothe kana icunjĩ ciamo na thiomi makĩria ma 3,000, na gũtirĩ ibuku rĩngĩ rĩonekaga na thiomi nyingĩ ũguo thĩinĩ wa thĩ.