Ngai nĩ Akũrũmbũyagia
TONDŨ Bibilia yumĩte kũrĩ Ngai, nĩyo ĩngĩtũhe ũtaaro ũrĩa mwega biũ. O na gũtuĩka Bibilia ti ibuku rĩa maũndũ ma ũrigitani, no ĩtũteithie kũhiũrania na moritũ, mĩtangĩko ya meciria, ruo rwa ngoro, na mathĩna ma mwĩrĩ na ma kĩĩmeciria.
Ũndũ wa bata makĩria, Bibilia ĩtwĩraga atĩ Jehova Ngaia o we Mũũmbi witũ, nĩ ataũkagĩrũo nĩ meciria maitũ na ũrĩa tũiguaga na kũu thĩinĩ gũkĩra mũndũ ũngĩ o wothe. Akoragwo ehaarĩirie biũ gũtũteithia kũhiũrania na ũndũ o wothe mũritũ tũngĩcemania naguo. Kwa ngerekano, ta rora ũrĩa mĩhari ĩno ĩĩrĩ ya Bibilia yugĩte:
“Jehova akoragwo hakuhĩ na arĩa mathuthĩkĩte ngoro; nĩ ahonokagia arĩa mahehenjekete roho.”—THABURI 34:18.
“Nĩ gũkorũo niĩ Jehova Ngai waku, nĩ nyitĩte guoko gwaku kwa ũrĩo, na ngakwĩra atĩrĩ, ‘Ndũgetigĩre. Nĩ ngũgũteithia.’”—ISAIA 41:13.
No hihi Jehova atũteithagia atĩa kũhiũrania na mathĩna ma kĩĩmeciria? Icunjĩ iria irũmĩrĩire nĩ igũgũteithia kuona ũrĩa Jehova atũteithagia na njĩra nyingĩ itiganĩte.
a Jehova nĩrĩo rĩĩtwa rĩa Ngai.—Thaburi 83:18.