3 | Wĩrute Kuuma Kũrĩ Andũ Magwetetwo Bibilia-inĩ

BIBILIA NĨ ĨTAARAGĨRIA ŨHORO WA . . . Arũme na atumia ehokeku arĩa ‘maarĩ andũ o ta ithuĩ.’—JAKUBU 5:17.

Ũguo nĩ Kuuga Atĩa?

Bibilia ĩrĩ na ũhoro mũingĩ wa athuri na atumia arĩa maagereire maũndũ o ta marĩa tũgeragĩra. Tũgĩthoma ũhoro wao thĩinĩ wa Bibilia, no tuone mũndũ wahiũranirie na ũritũ ta ũrĩa tũragerera.

Kũhũthĩra Ũtaaro wa Rĩandĩko Rĩu Kũngĩteithia Atĩa?

Ithuothe nĩ twendaga kũigua atĩ arĩa angĩ nĩ marataũkĩrũo nĩ ithuĩ. Nĩ tũbataraga ũndũ ũcio makĩria rĩrĩa tũrahiũrania na thĩna wa kĩĩmeciria. Tũgĩthoma Bibilia nĩ tuonaga ũhoro wa andũ meeciragia o ta ithuĩ na makagerera maũndũ o ta marĩa tũragerera. Ũndũ ũcio nĩ ũtũmaga tuone atĩ andũ angĩ manacemania na thĩna o ta ũrĩa tũragerera, na kwoguo tũkaaga kuona tũrĩ oiki rĩrĩa tũrahiũrania na mĩtangĩko.

Bibilia ĩrĩ na ciugo nyingĩ ciaugirũo nĩ andũ maaiguaga makinyĩte mũico na matarĩ na mwĩhoko. Hihi ũrĩ wekora ũkiuga, ‘Ndingĩhota gũkirĩrĩria rĩngĩ’? Andũ ta Musa, Elija, na Daudi nĩ maaiguaga ũguo.—Ndari 11:14; 1 Athamaki 19:4; Thaburi 55:4.
Bibilia nĩ yaragia ũhoro wa mũtumia ũmwe wetagwo Hana ũrĩa waiguaga arĩ na “marũrũ maingĩ mũno” tondũ ndaarĩ na ũhoti wa kũgĩa ciana na nĩ aanyũrũragio mũno nĩ mũiruwe.—1 Samueli 1:6, 10.
Bibilia nĩ yarĩtie ũhoro wa mũthuri wetagwo Ayubu wacemanirie na ũndũ mũritũ ta ũrĩa tũngĩkorũo tũkĩgerera. O na gũtuĩka aarĩ na wĩtĩkio mũrũmu, kũrĩ hĩndĩ aarĩ na mĩtangĩko mĩnene nginya akiuga: “Nĩ thũũrĩte muoyo wakwa; ndikwenda gũthiĩ na mbere gũtũũra.”—Ayubu 7:16.

Kwĩruta ũrĩa andũ acio magwetetwo thĩinĩ wa Bibilia maarũire na mwĩcirĩrie ũtagĩrĩire na magĩtooria, no gũtũhe hinya ũrĩa tũrabatara wa kũhiũrania na mĩtangĩko itũ.

Ũrĩa Bibilia Ĩteithĩtie Kevin

Ũrĩa Hutagio nĩ Mũrimũ wa Bipolar Disorder

“Ndĩ hakuhĩ gũkinyia mĩaka 50, nĩ ndamenyekire atĩ ndarĩ na mũrimũ mũnene wa meciria ũtũmaga mũndũ rĩmwe aigue acanjamũkĩte mũno na rĩrĩa rĩngĩ arĩ na ihooru mũno (bipolar disorder). Kũrĩ hĩndĩ njiguaga atĩ no hote kũhiũrania na ũndũ o wothe ingĩcemania naguo ũtũũro-inĩ. No hĩndĩ ĩngĩ narĩo, njiguaga nogetio biũ nĩ ũtũũro.”

Ũrĩa Bibilia Ĩndeithagia

“Mũndũ ũmwe ũgwetetwo nĩ Bibilia wagereire ũndũ ta ũrĩa ngeragĩra nĩ mũtũmwo Petero. Nĩ eekire mahĩtia maatũmire aigue atarĩ kĩene. No handũ ha gwĩciria mũno ũhoro wĩgiĩ mahĩtia make, Petero aaikarire hakuhĩ na arata maamũrũmbũyagia. Rĩrĩa mũrimũ wa bipolar disorder wahinyĩrĩria mũno, nĩ njiguaga nditũhĩirũo nĩ ũndũ wa mahĩtia makwa na ngaigua itarĩ kĩene. No o ta Petero, nĩ ndĩrutĩte gũikara hakuhĩ na arata arĩa makoragwo mehaarĩirie kũndeithia gũthiĩ na mbere na ũtũũro.

“Mũndũ ũngĩ ũgwetetwo thĩinĩ wa Bibilia ũnyũmagĩrĩria mũno nĩ Mũthamaki Daudi. Nĩ aatangĩkaga kaingĩ na akerira nĩ ũndũ wa mahĩtia marĩa eekĩte tene. O ta Daudi, o na niĩ rĩmwe nĩ njĩkaga kana ngauga maũndũ ngũcoka kwĩrira thutha ũcio. Ciugo cia Daudi thĩinĩ wa Thaburi ya 51 nĩ cinyũmagĩrĩria mũno. Thĩinĩ wa mũhari wa 3, Daudi aaugire ũũ: ‘Nĩ njũĩ wega mahĩtia makwa, na mehia makwa makoragwo mbere yakwa hingo ciothe.’ Ũguo no taguo njiguaga rĩrĩa mũrimũ wakwa ũhinyĩrĩirie tondũ ndihotaga gũkorũo na mawoni mega kwĩyerekera. Ningĩ mũhari-inĩ wa 10 Daudi aahoire ũũ: ‘Atĩrĩrĩ Ngai, nyũmbĩra ngoro theru, na wĩkĩre thĩinĩ wakwa roho mwerũ, mũrũmu.’ Nĩ hũthagĩra ciugo o ta icio ngĩhoya Ngai nĩguo andeithie kwĩyona na njĩra ĩrĩa yagĩrĩire. Naguo mũhari wa 17 nĩ ũnyũmagĩrĩria mũno. Ugaga ũũ: ‘Ngoro ĩthuthĩkĩte na ĩkahehenjeka, wee Ngai ndũngĩmĩrega.’ Mũhari ũcio nĩ ũũheaga ũũma atĩ Ngai nĩ anyendete.

“Gwĩciria ũhoro wĩgiĩ andũ arĩa magwetetwo Bibilia-inĩ na ũrĩa Ngai andeithĩtie ihinda-inĩ rĩrĩ, nĩ gwĩkĩraga hinya kĩĩrĩgĩrĩro gĩakwa kĩa mahinda mokĩte. Nĩ gũtũmaga njĩtĩkie ciĩranĩro cia Bibilia na ũndũ ũcio ũkandeithia kwaga gũkua ngoro.”