Kĩrĩa Gĩtũmaga Mbaara na Ngũĩ Ciage Gũthira

MEHIA

Ngai oombire aciari aitũ a mbere, Adamu na Hawa, na mũhianĩre wake. (Kĩambĩrĩria 1:27) Ũguo nĩ kuuga nĩ mangĩahotire kwĩgerekania na ngumo cia Ngai, ta thayũ na wendo. (1 Akorintho 14:33; 1 Johana 4:8) O na kũrĩ ũguo, Adamu na Hawa nĩ maagire gwathĩkĩra Ngai, na kwoguo makĩhia. Nĩ ũndũ ũcio, ithuothe nĩ twagaire mehia na gĩkuũ. (Aroma 5:12) Mehia macio matũmaga tũkorũo na mwerekera wa gũthugunda kana gwĩka maũndũ moru.—Kĩambĩrĩria 6:5; Mariko 7:​21, 22.

THIRIKARI CIA ANDŨ

Ngai ndaatũũmbire tũrĩ na ũhoti wa kwĩyatha. Bibilia yugaga ũũ: “Mũndũ tiwe wagĩrĩirũo o na gũtongoria ikinya rĩake.” (Jeremia 10:23) Nĩ ũndũ ũcio, thirikari cia andũ itingĩhota kweheria mbaara na ngũĩ kaimana.

SHAITANI NA NDAIMONO CIAKE

Bibilia yugaga atĩ “thĩ yothe ĩkoragwo rungu rwa hinya wa ũrĩa mũũru.” (1 Johana 5:19) “Ũrĩa mũũru” nĩ Shaitani ũrĩa Mũcukani, na nĩwe mũũragani ũrĩa mũnene. (Johana 8:44) Marĩ na ndaimono ciake, nĩo macogagĩra mbaara na ngũĩ thĩinĩ wa thĩ.—Kũguũrĩrio 12:​9, 12.