Ovanyasha—Jehova ita ka dimbwa oilonga yeni!

“Kalunga ke fi omuhenouyuki a dimbwe ngeno oilonga yeni nohole yeni mokufimanekifa edina laye, eshi mwa yakulile ovayapuki ndee hamu shi ningi natango.”—OVAHEBERI 6:10.

1. Ongahelipi omambo Ombibeli Ovaheberi naMalakia taa ulike kutya Jehova okwa pandula oilonga yoye?

MBELA owa longa nale oshilonga shonghenda omolwakaume koye ndele ino pandulwa? Otashi dulu okuyahameka unene ngeenge oilonga yokuyandja nehalo liwa otai talika ko yongaho ile osho shii unene, ongeenge tai dimbuwa filufilu. Ndele kape na tuu eyooloko ngeenge hatu longele Jehova nomutima aushe! Ombibeli otai ti: “Kalunga ke fi omuhenouyuki a dimbwe ngeno oilonga yeni nohole yeni mokufimanekifa edina laye, eshi mwa yakulile ovayapuki ndee hamu shi ningi natango.” (Ovaheberi 6:10) Diladila kutya osho otashi ti ngahelipi. Jehova ote ke shi tala ko lelalela shi li oshilonga shi he fi shiyuki kuye—shi li enyono—ngeenge okwa dimbwa osho wa ninga naasho to twikile okuninga moilonga yaye. Ke fi tuu Kalunga e na olupandu!—Malakia 3:10.

2. Oshike tashi ningi okulongela Jehova kwe likalekelwa shili?

² Ou na omhito ye likalekelwa yokwiilikana nokulongela Kalunga oo e na olupandu. Molwaashi ope na ashike omamiliyona a hamano ovaitaveli vakweni mokati kovanhu omamiliyona omayovi ahamano mounyuni aushe, oufembanghenda woye oo owa pumba shili. Natango, oushili kutya oto pwilikine nokulinyenga ketumwalaka longhundana iwa ou li oumbangi kutya Jehova oku na ko nasha naave pauhandimwe. Doshili, Jesus okwa ti: “Kape na ou ta dulu okuuya kuame okuninga Tate, ou a tuma nge, te mu shili.” (Johannes 6:44) Heeno, Jehova ota kwafele ovanhu pauhandimwe va mone ouwa meyambo laKristus.

Pandula oufembanghenda woye munene

3. Ovana vaKora ova ulika ngahelipi olupandu lavo omolwoufembanghenda wokulongela Jehova?

³ Ngaashi sha kundafanwa moshitukulwa sha tetekela, ou li pondodo ye likalekelwa okuhafifa omutima waJehova. (Omayeletumbulo 27:11) Osho oshinima osho u he na nande okukwata okahetengi. Mulimwe lomomapsalme avo a nwefwa mo, ovana vaKora ova ulika olupandu lavo omolwoufembanghenda wokulongela Jehova. Ohatu lesha taku ti: “Efiku limwe alike momikala doye li dule omafiku eyovi [pamwe pe lili, NW]. Okukala konhu yeumbo laKalunga kange oku dulile nge okukala meenduda dovalunde.”—Epsalme 84:11.

4. (a) Oshike tashi dulu okuningifa vamwe va tale ko okulongela Jehova kwa fa taku ngabeke? (b) Omonghedi ilipi Jehova ha ulike kutya okwa hala okudidilika nokupa ovapiya vaye ondjabi?

⁴ Mbela osho u udite ngaho shi na sha noufembanghenda woye wokulongela Xo womeulu? Doshili, omafimbo amwe otashi dulika tashi monika sha fa okulongela kwoye Jehova taku ngabeke emanguluko loye. Oshoshili kutya okukala pamafinamhango Ombibeli otashi pula okuliyamba mwene. Ndele xuuninwa, keshe osho Jehova te ku pula oshi na sha nouwa woye. (Epsalme 1:1-3) Kakele kaasho, Jehova oku wete eenghendabala doye nota ulike olupandu laye omolwoudiinini woye. Doshili, Paulus okwa shanga kutya Jehova ‘ava tave mu kongo ote va pe ondjabi.’ (Ovaheberi 11:6) Jehova ota kongo eemhito opo e shi ninge. Omuprofeti omuyuki muIsrael shonale okwa ti: “Omesho Omwene taa tale edu alishe, opo a kwafe neenghono ovo have liameke kuye nomutima aushe.”—2 Omafimbo 16:9.

5. (a) Onghedi imwe yomeenghedi diwa oilipi omo to dulu okuulika kutya owe liameka kuJehova nomutima woye aushe? (b) Omolwashike okupopya navamwe shi na sha neitavelo loye tashi dulika ku monike kudjuu?

⁵ Onghedi imwe yomeenghedi diwa omo to dulu okuulika kutya owe liameka kuJehova nomutima woye aushe oyo okupopya navamwe kombinga yaye. Mbela owa mona nale omhito yokupopya novanafikola vakweni vamwe kombinga yeitavelo loye? Tete, okuninga ngaho otashi dulu okumonika sha fa tashi teya omukumo, nediladilo olo otali dulu okweeta oumbada wonhumba. Otashi dulika u pule to ti: ‘Ongahelipi ngeenge ova yolo nge? Ongahelipi ngeenge ova popi nai elongelokalunga lange?’ Jesus okwa dimina kutya hakeshe umwe ta ka pwilikina ketumwalaka lOuhamba. (Johannes 15:20) Ndelenee osho inashi hala okutya owa nunwa u kale nonghalamwenyo yokushekwa nokutondwa. Mepingafano naasho, ovanyasha vahapu vEendombwedi ova mona ovo tava pwilikine nova mona nokuli efimano linene koomakula vavo omolwokudiinina eitavelo lavo.

“Jehova ote ke ku kwafela”

6, 7. (a) Ongahelipi okakadona kamwe komido 17 ka li ka dula okuyandja oundombwedi kovanafikola vakwao? (b) Oshike we lihonga moshimoniwa shaJennifer?

⁶ Ndele mbela ongahelipi to dulu okukala u na ouladi okupopya shi na sha neitavelo loye? Omolwashike ito tokola toko okukala ho popi oshili ngeenge ovanhu tave ku pula shi na sha nelongelokalunga loye? Tala koshimoniwa shaJennifer womido 17. Okwa ti: “Onda li pomusha kofikola. Oukadona poshitaafula shetu ova tameka okukundafana kombinga yelongelokalunga nakamwe komoukadona oka pula nge kutya ondi li melongelokalunga lilipi.” Mbela Jennifer okwa li a tila okuyandja enyamukulo? Okwa dimina ta ti: “Heeno, molwaashi kanda li ndi shii kutya otave ke linyenga ngahelipi.” Mbela Jennifer okwa ninga ngahelipi? Okwa twikila ta ti: “Onda lombwela oukadona ovo kutya ondi li umwe womEendombwedi daJehova. Tete ova li tava monika va kumwa. Osha yela kutya ova li va diladila kutya Eendombwedi daJehova inadi fa ovanhu vakwao. Osho oshe ve linyengifa va pule nge omapulo, nonda dula okuyelifa amwe omomaudeko a puka oo va li ve na. Nokuli nokonima yefiku olo, vamwe vomoukadona ove uya kwaame omafimbo nomafimbo va pule nge.”

⁷ Mbela Jennifer okwa li e lipa oushima omolwokulongifa omhito opo a popye shi na sha neitavelo? Hasho nande! Okwa ti: “Onda li ndi udite nawa shi na sha naasho eshi omusha wa pita. Paife oukadona ovo ove shii sha shi na sha nEendombwedi daJehova kutya odo oolyelye naanaa.” Paife Jennifer ota yandje omayele aa a yela taa ti: “Ngeenge oho mono shidjuu okuyandja oundombwedi kovanafikola vakweni ile kovahongi, ilikana meendelelo. Jehova ote ke ku kwafela. Oto ka kala wa hafa molwaashi owa longifa nawa omhito yoye opo u yandje oundombwedi.”—1 Petrus 3:15.

8. (a) Ongahelipi eilikano la kwafela Nehemia eshi kwa li a taalela onghalo inai teelelwa? (b) Omeenghalo dilipi kofikola odo tashi dulika wa pumbwa okwiilikana momutima pauxupi kuJehova?

⁸ Didilika kutya Jennifer ota ladipike ‘okwiilikana meendelelo’ kuJehova ngeenge omhito yokuyandja oundombwedi shi na sha neitavelo loye tai li eta. Osho osho naanaa Nehemia omupindili wohamba Artasasta yaPersia a ninga eshi kwa li a taalela onghalo inai teelelwa. Nehemia okwa li ta monika a nyika oluhodi molwaashi okwa li a lombwelwa shi na sha nonghalo yOvajuda nokwa uda kutya ekuma nosho yo oivelo yaJerusalem oya li ya hanauka po. Ohamba oya didilika kutya Nehemia okwa li ta monika e na oshisho, omolwaasho oya pula Nehemia kutya oshike sha puka. Fimbo ina nyamukula, Nehemia okwa ilikana omolwewiliko. Opo nee okwa pula epitikilo e na ouladi opo a shune kuJerusalem a ka kwafele okutungulula oshilando osho sha teka po. Artasasta okwa dimina eindilo laNehemia. (Nehemia 2:1-8) Oto lihongo mo shike omo? Ngeenge oho kala u udite wa tila ngeenge omhito yokuyandja oundombwedi shi na sha neitavelo loye ya holoka po, ino efa omhito yoye yokuninga eilikano lomomutima. Petrus okwa shanga ta ti: ‘Oshisho sheni shi dikeni Jehova, osheshi Oye te mu file oshisho.’—1 Petrus 5:7; Epsalme 55:23.

“Mu hangike alushe mu shii kunyamukula”

9. Ongahelipi Leah womido 13 kwa li a dula okuyandja omambo oYoung People Ask e li 23?

⁹ Tala koshimoniwa shikwao. Leah womido 13, okwa li ta lesha embo Questions Young People Ask—Answers That Worka pefimbo lokafudo komusha kofikola. Okwa ti: “Vamwe okwa li tava tale nge, nodiva ongudu yovanhu oya li ya fikama konima yange tai tale. Ova tameka okupula kutya embo olo oli na sha nashike naanaa.” Pexulilo lefiku olo, oukadona vane ova li va pula Leah embo loYoung People Ask. Diva oukadona ovo ova li va pa vakwao embo olo opo va leshe mo yo, nokonima vakwao navo ova li va hala ve limonene omambo oo. Momukokomoko woivike oyo ya landula ko, Leah okwa yandja omambo oYoung People Ask e li 23 kovanafikola vakwao nokookahewa kavo. Mbela osha li shipu kuLeah okupopya eshi vamwe ve mu pula tete shi na sha nembo olo kwa li ta lesha? Hasho nande! Okwa dimina ta ti: “Tete onda li nda tila. Ndele nande ongaho, onda ilikana nonda li ndi shi shii kutya Jehova okwa li e li pamwe naame.”

10, 11. Ongahelipi okakadona okanyasha Okaisrael ka li ka dula okukwafela ondjai yoita Omuarami e lihonge kombinga yaJehova, nomalunduluko elipi a ninga konima yaasho?

¹⁰ Oshimoniwa shaLeah otashi dulu oku ku dimbulukifa onghalo ya faafana oyo ya li ya shakenekwa kokakadona okanyasha Okaisrael oko ka li ka twalwa moupika kuAram (Siria). Naeman ondjai yoita Omuarami, okwa li omunashilundu. Omukainhu waye otashi dulika oye a tameka eenghundafana odo de linyengifa okakadona oko kanini ka popye shi na sha neitavelo lako. Oka ti: “Ngeno omwene wange a ile komuprofeti winya e li muSamaria, opo nee winya ta kufa po oudu waye woshilundu.”—2 Eehamba 5:1-3.

¹¹ Omolwouladi wokakadona oko okanyasha, Naeman okwa shiiva kutya “kombada yedu alishe kape na Kalunga kamwe, muIsrael amuke.” Okwa ninga nokuli etokolo kutya ita ka “yamba vali exwikiloyambo ile etomenoyambo kookalunga vamwe, kOmwene aeke.” (2 Eehamba 5:15, 17) Jehova okwa nangeka shili noupuna ouladi wokakadona oko kanini. Ota dulu nota ka ninga sha faafana kovanyasha kunena. Leah osho a ningilwa. Konima yefimbo, ovanafikola vakwao vamwe ove uya kuye ndele tava ti kutya embo Young People Ask otali va kwafele shi na sha nomikalo davo. Leah okwa ti: “Onda li nda hafa, molwaashi onda li ndi shi shii kutya onda li handi kwafele vamwe ve lihonge shihapu kombinga yaJehova noku va kwafela va lundulule onghalamwenyo yavo.”

12. Ongahelipi to dulu okupamekwa opo u popile eitavelo loye?

¹² Oto dulu okukala noimoniwa ya faafana naayo yaJennifer naLeah. Shikula ekumaido laPetrus, olo a shanga kutya u li Omukriste ou na alushe ‘okuhangika u shii okunyamukula keshe tuu ou te ku pula ekanghameno leteelelo eli li li mwoove, ndelenee shi ninga nengungumano netilo.’ (1 Petrus 3:15) Ongahelipi to dulu oku shi ninga? Hopaenena onghatu yOvakriste vomefelemudo lotete ovo va ilikana kuJehova opo e va kwafele va udife “nouladi aushe.” (Oilonga 4:29) Opo nee kala u na ouladi mokupopya navamwe kombinga yeitavelo loye. Otashi dulika u ka kale wa kumwa koidjemo. Kakele kaasho, oto ka hafifa omutima waJehova.

Eevidio nosho yo eeprojeka de likalekelwa

13. Eemhito dilipi ovanyasha vamwe va longifa okuyandja oundombwedi? (Tala oimhungu pepandja 14 no 15.)

¹³ Ovanyasha vahapu ova yelifila ovanafikola vakwao ile ovahongi eitavelo lavo mokulongifa eevidio. Omafimbo amwe, ova longifa nawa eemhito deeprojeka dofikola va fimanekife Jehova. Pashihopaenenwa, ovamati vavali vomido 15, ve li Eendombwedi daJehova, ova li va pewa oshinakuwanifwa shi li oshitukulwa shotundi yavo yondjokonona younyuni va shange ehokololo li na sha nalimwe lomomalongelokalunga omounyuni. Ovo vavali ove limanga kumwe va shange ehokololo lavo shi na sha nEendombwedi daJehova, tava longifa embo Jehovah’s Witnesses—Proclaimers of God’s Kingdom li li odjo yavo.b Ova li yo ve na okuyandja ehokololo tava popi oule wominute nhano. Konima yefimbo, omuhongi novalihongi ova li ve na omapulo mahapu nomolwaasho ovamati ovo ova li va fikama komesho yongudu oule wominute 20 da wedwa po. Oule woivike konima yaasho, ovanafikola vakwao ova twikila oku va pula omapulo kombinga yEendombwedi daJehova.

14, 15. (a) Omolwashike oumbada wokutila ovanhu u li omwiyo? (b) Omolwashike u na okukala u na elineekelo shi na sha nokulombwela vamwe kombinga yeitavelo loye?

¹⁴ Ngaashi oimoniwa ya tetekela tai shi ulike, omanangeko noupuna manene otaa dulu okumonika mokulombwela vamwe kombinga yeitavelo loye u li umwe womEendombwedi daJehova. Ino efa oumbada wokutila ovanhu u ku imbe oufembanghenda nehafo loye lokukwafela vamwe va shiive Jehova. Ombibeli otai ti: “Okutila omunhu taku tele omwiyo. Ndelenee ou [te] lineekele Omwene, ota ka amenwa.”—Omayeletumbulo 29:25.

¹⁵ Dimbuluka kutya u li Omukriste omunyasha ou na osho oomakula voye va pumbwa unene—onghedi yokukalamwenyo iwa paife nosho yo eudaneko lomwenyo waalushe monakwiiwa. (1 Timoteus 4:8) Shihokwifa, mOilongo yaHangana—omo tashi dulika u diladile kutya ovanhu vahapu kave na ko nasha ile kutya otava diladila unene shi na sha noilonga yomounyuni—ekonakono limwe ola holola kutya hanga etata lovanyasha ohali tale ko elongelokalunga sha kwata moiti, noshititatu otashi ti kutya eitavelo lomalongelokalunga olo “enwefemo la fimana unene” monghalamwenyo yavo. Onghalo oyo otashi dulika ya faafana moitukulwa imwe ihapu mounyuni. Omolwaashi tashi dulika oomakula voye kofikola va ka kale va hafa okupwilikina osho to popi shi na sha nOmbibeli.

U li omunyasha, ehena popepi naJehova

16. Oshike sha kwatelwa mo mokuhafifa Jehova kakele kokupopya navamwe shi na sha naye?

¹⁶ Doshili, okuhafifa omutima waJehova osha kwatela mo shihapu shi he fi ashike okupopya kombinga yaye. Owa pumbwa yo okutwifa kumwe elihumbato loye nomifikamhango daye. Omuyapostoli Johannes okwa shanga ta ti: “Ohole yokuhola Kalunga oyo tuu ei nokutya, tu diinine oipango yaye. Noipango yaye kai fi idjuu.” (1 Johannes 5:3) Osho oto ke shi mona kutya oshoshili ngeenge owa ehene popepi naJehova. Mbela ongahelipi to dulu oku shi ninga?

17. Ongahelipi to dulu okweehena popepi naJehova?

¹⁷ Longifa efimbo u leshe Ombibeli nosho yo oileshomwa ye likolelela kOmbibeli. Apa ngoo pe fike okulihonga kwoye kombinga yaJehova, opo ngoo pe fike okudulika kuye taku ka kala kupu nosho yo okupopya navamwe shi na sha naye. Jesus okwa ti: “Omunhu muwa oha pitifa mo memona liwa lomutima waye ouwa, . . . osheshi osho shi yadi omutima, okanya ohake shi popi.” (Lukas 6:45) Onghee hano yadifa omutima woye noinima iwa. Omolwashike ito tula po omalalakano e na sha naasho? Otashi dulika to dulu okuxwepopaleka okulilongekidila okwoongala kweongalo oshivike tashi uya. Elalakano loye tali shikula otali dulu okukala okukufa ombinga mokuyandja omulombo u li pauxupi tau di komutima. Doshili, osha fimanenena yo kwoove okutula moilonga oinima oyo to lihongo.—Ovafilippi 4:9.

18. Nokuli nongeenge oto mono oixuna komapataneko, oshike osho to dulu okukala we lineekela?

¹⁸ Omanangeko noupuna oo taa di mokulongela Jehova otaa kalelele—doshili, oaalushe. Doshili, omafimbo amwe oto dulu okushakeneka omapataneko ile omasheko onhumba molwokukala u li umwe womEendombwedi daJehova. Ndele diladila shi na sha naMoses. Ombibeli otai ti kutya okwa li “a taalela kondjabi.” (Ovaheberi 11:24-26) Naave oto dulu okukala nelineekelo kutya Jehova ote ke ku pa ondjabi omolweenghendabala odo to ningi u lihonge kombinga yaye nosho yo okupopya shi na sha naye. Doshili, ita ka ‘dimbwa nande oilonga yoye nohole yoye mokufimanekifa edina laye.’—Ovaheberi 6:10.

[Omashangelo opedu]

Oto dimbuluka?

• Omolwashike to dulu okukala noushili kutya Jehova okwa pandula oilonga yoye?

• Eenghedi dilipi dokuyandja oundombwedi kofikola vamwe va mona kutya odi na omupondo?

• Ongahelipi to dulu okupamekwa opo u yandje oundombwedi kovanafikola vakweni?

• Ongahelipi to dulu okweehena popepi naJehova?

[Oshimhungu pepandja  20]

Nokuli nounona vanini otava tange Jehova!

Ongudu onhinhano yooAmber womido omulongo oya li tai lesha embo li na sha nomaponokelo aNazi okuponokela Ovajuda pefimbo lOita Itivali yOunyuni. Amber okwa tokola okweetela omuhongi waye ovidio Purple Triangles. Omuhongi okwa li a kumwa eshi a shiiva kutya Eendombwedi daJehova nado oda li yo da hepekwa koshi yepangelo laNazi. Omuhongi okwa ulikila ongudu aishe ovidio oyo.

Alexa eshi a li e na omido hetatu okwa shangela ongudu yavo onhumwafo ta yelifa kutya omolwashike iha kufa ombinga mokudana kwavo Okrismesa. Omuhongi waye okwa li yo a kumwa nomolwaasho okwa leshifa Alexa onhumwafo mokule komesho yongudu yavo nosho yo meengudu dimwe vali di li mbali. Pexulilo okwa ti: “Onda longwa ndi kale hai fimaneke vamwe ovo ve na eitavelo la yooloka ko kulange, nohandi mu pandula eshi tamu fimaneke etokolo lange lokuhadana Okrismesa.”

Diva konima yokutameka ondodo yotete, Eric okwa ya nEmbo Lyandje lyOmahokololo gOmbimbeli kofikola nokwa pula epitikilo opo e li ulikile ovanafikola vakwao. Omuhongi waye okwa ti: “Ondi na ediladilo liwa. Omolwashike ito leshele ongudu ehokololo?” Eric osho a ninga. Konima yaasho, okwa pula aveshe ovo va li va hala embo olo va ulike. Ovanhu omulongo navahetatu—mwa kwatelwa omuhongi—osho va ninga. Eric paife oku udite kutya oku na oshitukulwa shaye she likalekelwa shokuyandja oundombwedi.

Whitney womido omuwoi okwa hafa omolwoshileshomwa Jehovah’s Witnesses and Education.c Okwa ti: “Shito meme okwa kala ha yandje oshileshomwa osho kovahongi vange omudo keshe, ndele omudo ou onde shi ninga ame mwene. Omolwekwafo loshileshomwa osho, omuhongi wange okwa hoolola nge ndi li ‘omunafikola a shiya ko moshivike.’”

[Omashangelo opedu]

[Oshimhungu pepandja  21]

Eenghalo odo vamwe va longifa okupopya kombinga yeitavelo lavo

Ngeenge va pewa oilonga yokuyandja ehokololo lofikola ile oprojeka, vamwe ova hoolola oshipalanyole osho she va pitika va yandje oundombwedi

Ovanyasha vahapu ova yandja ovidio ile oshileshomwa komuhongi wavo osho tashi tu kumwe noshikundafanwa osho tashi kundafanwa mongudu

Ovanyasha vamwe ngeenge tava lesha Ombibeli ile oshileshomwa she likolelela kOmbibeli pefimbo lefudo, ovanyasha vamwe vakwao ohave uya puvo oku va pula omapulo

[Efano pepandja 12]

Ovo ve na owino otava dulu okukwafela okudeula ovanyasha va longele Jehova