Oshimhungu shomapulo

◼ Oshike tashi dulu oku tu kwafela tu kwate nawa efimbo lokwoongala olo la tulwa po?

Efimbo ohali endelele neenghono ngeenge omunhu to ningi oshinima shonhumba shiwa pamwe nookaume koye. Omolwetomheno olo, otashi dulu okukala eshongo okuyandja oitukulwa yokwoongala moule wefimbo olo la tulwa po. Ndele mbela oshike tashi dulu oku tu kwafela tu mane okwoongala pefimbo?

Okwoongala naku hovele pefimbo. Ngeenge ovanhu aveshe va ongala, oshiwa okupula ovapwilikini va kale omutumba peenhele davo fimbo ku na omunute umwe ile mbali opo okwoongala ku dule okuhovela pefimbo olo la tulwa po nopalandulafano. (Omuud. 3:1) Okwoongala oko kwa kwatela mo ovanhu vanini, ngaashi elongekido loilonga yomomapya, oku na okuningwa pefimbo ndele kaku na okuteelelwa ovanhu ovo tashi dulika itava fiki pefimbo.

Kala we lilongekida nawanawa. Oshinima sha fimanenena osho hashi kwafele omunhu a kwate nawa efimbo lokwoongala olo la tulwa po osho okulilongekida komesho yefimbo. Kala u shii nawa elalakano loshipopiwa shoye. Didilika oitwa oyo ya fimana noku i divilika. Ino yandja elitulemo kouyelele inau pumbiwa. Etwalemo loye nali kale li li paunafangwa. Ngeenge oshipopiwa osha kwatela mo omauliko ile omapulapulo, unganeka ovanhu ve liendife po komesho yefimbo. Ngeenge to lilongekida oshipopiwa shoye, longifa ovili u tale ngeenge osha wana mo ngoo mefimbo olo wa pewa, to liendifa po to popi mokule.

Unganeka nawa ouyelele woye. Kutya nee oshitukulwa osho to yandje oshi li molupe loshipopiwa ile eenghundafana novapwilikini, otashi ke ku kwafela ngeenge owa unganeke ouyelele woye moutukulwa. Tokola kutya oto ka longifa ominute di fike peni mokatukulwa keshe nokushanga ominute odo to ka longifa mombapila omo mu na ouyelele woye. Opo nee eshi to yandje oshipopiwa, kala to shilipaleke efimbo loye. Ngeenge oshipopiwa osha kwatela mo eenghundafana novapwilikini, henuka okupa ovanhu vahapu eemhito pehovelo opo uha ka endelele neenghono eshi taku ka kundafanwa ouyelele wa fimanenena oo u li koxuuninwa. Omukwatelikomesho wEkonakono lOshungonangelo oku na okukwata nawa efimbo opo a dule okupula omapulo eendululo koxuuninwa. Oku na yo okulungama aha longife po efimbo olo la nuninwa eimbilo neilikano laxuuninwa.

Okwoongala naku pwe pefimbo. Ngeenge okwoongala okwa kwatela mo oitukulwa ihapu, ngaashi Okwoongala kwoPailonga, omupopi keshe oku na okukala e shii kutya oshitukulwa shaye oshi na ominute ngapi. Oshike tashi dulu okuningwa po ngeenge efimbo lokwoongala ola pwa po? Omumwatate umwe ile vahapu, otava dulu okulongifa efimbo lixupi mokuyandja ashike elitulemo kouyelele oo wa fimana nokuteta mo ouyelele umwe moipopiwa yavo. Okuninga ngaho ohaku ulike kutya omunhu oku li omuhongi omunekeka.

Tu li ovapwilikini, ohatu dulu okukwafela omumwatate oo ta kwatele komesho, mokuyandja omatyekosha e li pauxupi nokwa yukilila oshitwa. Onghee hano, atusheni ohatu dulu okukwafela opo okwoongala ku ningwe ‘keenghedi diwa nokeshikulafano.’ — 1 Kor. 14:40.