Jesus ta dalelwa moshiunda shoimuna

MBELA ou shi shii kutya okahanana oko olyelye? Heeno, oJesus. Jesus okwa li a dalelwa moshiunda shoimuna, monhele omo hamu idililwa oimuna. Ngaashi u shi wete mefano omo, Maria ota nangeke Jesus metemba lokulila eendongi noimuna ikwao. Ndele mbela omolwashike Maria naJosef ve li monhele omo mu na oimuna? Ounona ihava dalelwa meenhele da tya ngaho, hasho mbela?

Heeno, ounona ihava dalelwa moyuunda yoimuna. Ndele moshiunda omo ova ya mo ashike molwetomheno eli: Omupangeli waRoma, Omukesari Augustus, okwa li a tota po omhango kutya ovanhu aveshe nava ye koilando oko va dalelwa opo omadina avo a ka shangwe momambo. Josef okwa li a dalelwa muBetlehem, nomolwaasho ve uya kuBetlehem. Ashike eshi Josef naMaria va fika muBetlehem, kava li va mona onhele yokunangala. Onghee hano, ova li va ka nangala moshiunda shoimuna. Jesus okwa ka dalwa mefiku olo tuu olo. Ndele ngaashi u shi wete mefano omo, Jesus ka li e na oupyakadi washa.

Mbela ou wete ovafita voimuna ovo ve uya okutala Jesus? Fimbo ovafita ovo va li tava lifa eedi oufiku mepya, ohaluka ova li va minikilwa kouyelele wa twa oo wa li we va dingilila. Ouyelele oo owa li woshinge shomweengeli. Ovafita ovo ova li va tila neenghono eshi va mona omweengeli oo. Ndele omweengeli okwa ti kuvo: ‘Inamu tila! Onda hala oku mu lombwela onghundana iwa kutya Omwene Kristus okwa dalelwa nena eli muBetlehem. Oye ta ka xupifa ovanhu. Otamu ke mu mona a dingilwa momalapi nokwa nangekwa metemba lokulila oimuna.’ Ombadilila, puvo ope uya ovaengeli vahapu ndele tava hambelele Kalunga. Onghee hano, ovafita voimuna ova li va ya meendelelo, ndele tava ka tala Jesus.

Mbela ou shi shii kutya omolwashike Jesus e li omunhu e likalekelwa? Mbela ou shi shii kutya Jesus oye naanaa lyelye? Dimbuluka kutya otwe lihonga kombinga yOmona waKalunga omudalwa wotete mehokololo lotete lembo eli. Omona waKalunga oo okwa li ha longo pamwe naJehova mokushita eulu nedu nosho yo oinima ikwao aishe. Jesus oye Omona waKalunga omudalwa wotete.

Jehova okwa li a lundululila omwenyo wOmona waye moshidalelo shaMaria okudja meulu. Okudja opo, okaana oka hovela okukula medimo laMaria ngaashi ashike ounona aveshe hava kulile momadimo ooina. Ndelenee okaana aka oka li Omona waKalunga. Hauxuuninwa, Jesus okwa ka dalelwa moshiunda shoimuna muBetlehem. Mbela paife ou wete kutya omolwashike ovaengeli va li tava lombwele ovanhu nehafo shi na sha nokudalwa kwaJesus?