Jesus okwa dalelwa peni nonaini?

Omukesari Augustus, omupangeli waRoma, okwa li a yandja elombwelo kutya ovanhu aveshe vomouhamba waye nave ke lishangife. Onghee Josef naMaria ova li ve na okuya kuBetlehem, osho sha li kolukadi laJerusalem.

Ovanhu vahapu ova li va ya kuBetlehem opo ve ke lishangife. Molwaashi oshilando osha li shi yadi, Josef naMaria ova li ashike va mona onhele yokukala moshuunda shoimuna, omo Jesus a dalelwa. Maria okwe mu tonyena momalapi ndele te mu nangeke metemba lokulila oimuna.

Kalunga oku na okukala oye a longekida Omukesari Augustus a yandje elombwelo lokulishangifa. Omolwashike mbela? Omolwaashi Jesus okwa li e na okudalelwa muBetlehem, moshilando omo mwa li hamu di xekulululwa David. Omishangwa oda hangwa da xunganeka kutya moshilando osho omo tamu ka dalelwa Omupangeli oo a udanekwa. — Mika 5:2.

Oufiku oo kawa li tuu we likalekelwa! Ovafita ovo va li va nangela oimuna yavo moixwa ova li va holokelwa kouyelele. Ouyelele oo owa li oshinge shaJehova. Omweengeli waKalunga okwa li e va lombwela a ti: “Inamu tila, taleni, ondi mu na onghundana iwa oyo tai ka etela ovanhu aveshe ehafo linene. Nena eli omwa dalelwa omuxupifi, Kristus Omwene, moshilando shaDavid. Otamu ka mona edidiliko eli: Otamu ka hanga Okaana ka tonyenwa melapi noka nangekwa metemba lokulila oimuna.” Ohaluka, ope uya vali ongudu yovaengeli tai ingida tai ti: “Efimano olaKalunga Omukombadambada, nombili kombada yedu otai ka kala mokati kovanhu ovo a hokwa.” — Lukas 2:10-14.

Eshi ovaengeli va dja po puvo, ovafita ova lombwelafana tava ti: “Natu yeni paife kuBetlehem tu ka tale kutya oshike sha ningwa ko, ngaashi Jehova e tu hololela.” (Lukas 2:15) Ova ya tava endelele, nova hanga Okaana Jesus ke li opo omweengeli e va lombwela. Eshi ovafita va hokolola osho va lombwelwa komweengeli, ovanhu aveshe ova li va kumwa. Maria okwa li a hafela eendjovo odo ndele te di tuvikile momutima waye.

Ovanhu vahapu kunena ova itavela kutya Jesus okwa dalwa mo 25 Desemba. Ashike moitukulwa yaBetlehem, muDesemba omwa li hamu kala odula noutalala. Nomafimbo amwe ohaku kala oikangwameva (o-snow). Pefimbo olo osha li shidjuu okuhanga ovafita va nangela oimuna yavo moixwa. Natango, kasha li pandunge komupangeli waRoma a lombwele ovanhu ovo va li inava hala okukala koshi yepangelo laye va ende oinano ile moutalala wamemememe opo ve ke lishangife. Osha yela kutya Jesus okwa dalwa lwopuOktoba.