Etukulwa 5
Jesus okwa dalwa naini, nokwa dalelwa peni?
OMUPANGELI wOuhamba waRoma, Omukesari Augustus, okwa li a yandja elombwelo kovanhu kutya ove na okuya koilando oko va dalelwa opo ve ke lishangife. Onghee hano, Josef naye okwa li a ya koshilando oko a dalelwa, kuBetlehem.
Opa li ovanhu vahapu ovo va li va ya kuBetlehem ve ke lishangife. Molwaashi Josef naMaria kava li va mona apa tava kala, ova ka kala moshiunda shoimuna. Moshiunda shoimuna omo omo mwa li mwa dalelwa Jesus. Maria okwa li a tonyena okahanana, Jesus, melapi ndele te ka nangeke metemba lokulila oimuna.
Osha yela kutya Omukesari Augustus okwa li a wilikwa kuKalunga opo a tote po omhango yokulishangifa paveta. Osho osha li she shi ninga tashi shiiva opo Jesus a dalelwe muBetlehem, oshilando osho sha li sha xunganekwa nale mOmishangwa kutya omo tamu ka dalelwa omupangeli omuudanekwa.
Oufiku omo Jesus a dalwa kawa li tuu wa fimana! Ovafita ovo va li va nangela oimuna yavo moixwa ova li va holokelwa kouyelele. Ouyelele oo owa li oshinge shaJehova. Ovafita ovo ova li va lombwelwa komweengeli, a ti: “Inamu tila, taleni ame ohandi mu udifile ehafo linene tali ningi lovanhu aveshe. Onena tuu eli mwa dalelwa Omukulili moshilando shaDavid, Oye tuu ou Kristus Omwene. Nedidiliko mu mu koneke oleli: otamu ka mona okaana ka tonyenwa momalapi [ndele] oka nangekwa mepeta lokulila oimuna.” Ombadilila, ovafita ova li va holokelwa kovaengeli vahapu tava imbi tava ti: “Efimano laKalunga mokombadambada nombili kombada yedu movanhu e va hokwa.”
Eshi ovaengeli va ya, ovafita ova li va lombwelafana tava ti: “Tu yeni hano kuBetlehem tu ka tale eshi sha ningwa ko, Omwene e shi tu hololela.” Ova li va ya meendelelo, nova li naanaa va hanga Jesus ponhele opo pa li pa tongwa komweengeli. Eshi ovafita va hokololela vamwe osho va li va lombwelwa komweengeli, ovanhu aveshe ovo va li ve shi uda ova li ve shi kuminwa. Maria okwa li a tuvikila nokudiinina eendjovo odo momutima waye.
Ovanhu vahapu kunena ova itavela kutya Jesus okwa dalwa mo 25 Desemba. Ndele muDesemba okwa li haku kala taku lokwa noku na outalala muBetlehem. Ovafita kava li tava dulu okukala va nangela oimuna yavo moixwa oufiku pefimbo opo. Natango, Omukesari waRoma osha yela kutya ka li ta ka pula ovanhu ovo va li va hala nale oku mu tukululila oshibofa va ye molweendo ve ke lishangife mokati kokufu. Hano osha yela kutya Jesus okwa dalwa muSeptemba ile muOktoba lwaapo. Lukas 2:1-20; Mika 5:1.
▪ Omolwashike Josef naMaria va li va ya kuBetlehem?
▪ Oshiningwanima shikumwifi shilipi sha li sha ningwa moufiku omo Jesus a dalwa?
▪ Otu shi shii ngahelipi kutya Jesus ina dalwa mo 25 Desemba?