Etukulwa 1
Mbela oukwaneumbo otau dulu ngoo okukala wa hafa shili?
1. Omolwashike omaulikumwe ovanhu a pumbwa omaukwaneumbo a kola?
OUKWANEUMBO oo elongekido likulukulu kombada yedu, nomaukwaneumbo ohaa dana onghandangala ya fimanenena momaulikumwe ovanhu. Ondjokonona aishe oye shi ulika kutya omaukwaneumbo a kola ohaa ningifa omaulikumwe ovanhu a kale yo a kola. Oukwaneumbo oo elongekido dingi omo ounona tava dulu okutekulwa nawa fiyo va ninga ovakulunhu.
2-5. (a) Ounona ohava kala ve udite ngahelipi ngeenge ve li momaukwaneumbo a hafa? (b) Omaupyakadi amwe elipi haa holoka po momaukwaneumbo?
2 Oukwaneumbo wa hafa ohau kala eameno koilyo youkwaneumbo. Diladila nee ngeno koukwaneumbo oo wa hafa filufilu. Konima youvalelo, ovadali ovanahole ohava kala tava xungile novana vavo, tashi dulika tava kundafana kombinga yoiningwanima oyo ya ningwa momukokomoko wefiku olo. Ounona ohava kala tava hepaululile xe naina kombinga yaasho sha ningwa po kofikola. Eenghundafana da tya ngaho ohadi pepaleke oilyo youkwaneumbo nohadi i kwafele i kale ye lilongekidila efiku lomongula eshi tai ka ya kutya nee okoilonga ile okofikola.
3 Ngeenge oukwaneumbo owa hafa shili, ounona ohava kala ve na elineekelo kutya xe naina otave ke va fila oshisho ngeenge tava vele, tashi dulika nokuli ngeenge kamwe komuvo oka tulwa meembete koshipangelo xe ile ina ote ke ka kalela. Ounona va tya ngaho ihava kala ve na outile okupula omayele ile ekwafo kovadali vavo ngeenge va hangwa komaupyakadi pefimbo lounyasha wavo. Kashi na nee mbudi kutya otava shakeneke omaupyakadi a tya ngahelipi mounyuni, ounona ovo ohava kala ve udite va amenwa.
4 Ngeenge ounona va kulu, otashi dulika va ka hombole ile va ka hombolwe nokuhovela omaukwaneumbo avo vene. Epopyo limwe lOshijapani otali ti: “Omunhu ohe ke shi mona mo ashike kutya oku na oshikolo sholupandu kovadali vaye ngeenge e na okaana.” Omolwolupandu la tya ngaho nomolwohole, ovadalwa ovo va kula ohava ningi eenghendabala opo omaukwaneumbo avo a kale a hafa nohava file oshisho ovadali vavo ovanamido. Ovadali vavo ovanamido ohava kala va hafa eshi ve na outekulu.
5 Osho sha popiwa metetekelo otashi dulika shi ku diladilife kutya: ‘Ame ondi hole oukwaneumbo wetu, ndelenee inau hafa ngaashi oukwaneumbo oo wa popiwa metetekelo. Ame nomuholike wange ohatu longo eevili da yoolokafana noihatu monafana lela momukokomoko wefiku. Ngeenge hatu popi, luhapu ohatu kala ashike hatu kundafana omaupyakadi e na sha noimaliwa.’ Ile otashi dulika u tye: ‘Ovana vange novatekulu vange ohava kala koshilando shimwe shi lili noihandi va mono nandenande.’ Omolweenghalo di lili noku lili odo itatu dulu okupangela, otashi dulika omaukwaneumbo amwe aha kale a hafa filufilu ngaashi oukwaneumbo oo wa hokololwa metetekelo. Ndele nande ongaho, ope na omaukwaneumbo oo a hafa shili. Mbela oshike tashi dulu okukwafela oukwaneumbo opo u kale wa hafa shili? Fimbo inatu nyamukula epulo olo, natu ka kundafaneni epulo limwe la fimana.
OUKWANEUMBO OSHIKE NAANAA?
6. Embo eli otali kundafana kombinga yomaukwaneumbo a tya ngahelipi?
6 Omaukwaneumbo mahapu ohaa kala a fikama po mutate nameme nounona vavo. Ovakulunhu vovadali otashi dulika va kale ve li kuvo vene, ve na eumbo lavo. Nonande omaukwaneumbo a tya ngaho otashi dulika a kale e na ekwatafano novapambele vao vokokule, ihaa kala e udite e na oshinakuwanifwa shi na sha novapambele va tya ngaho. Onghee hano, ngeenge taku popiwa oukwaneumbo membo eli, luhapu otau ulike koukwaneumbo oo wa fikama po mutate nameme nounona. Ashike kunena ope na omaukwaneumbo omaludi e lili noku lili oo a kundafanwa yo membo eli, ngaashi oukwaneumbo omo mu na omudali umwe, oukwaneumbo oo wa tungwa po kovadali ovo va hombola nova etelela ounona mohombo nosho yo omaukwaneumbo omo ovadali vehe li pamwe omolwomatomheno onhumba ile ongadi.
7. Ovanhu vamwe ohava kala momaukwaneumbo a tya ngahelipi?
7 Ovanhu vahapu ohava kala pamwe novapambele vavo vokokule meumbo limwe. Momaukwaneumbo a tya ngaho, ovadali ovanamido otashi dulika va kale tava filwa oshisho kovana vavo ovo va kula. Otashi dulika va file oshisho yo ovapambele vavo vamwe. Pashihopaenenwa, otashi dulika oilyo youkwaneumbo oo i file oshisho nokufutila ofikola ovana vovamwaina, eemhedi davo ile ovapambele vavo vamwe vokokule. Omafinamhango oo a kundafanwa membo eli otaa longo yo komaukwaneumbo a tya ngaho.
OMAUPYAKADI OO HAA HANGE OMAUKWANEUMBO KUNENA
8, 9. Omaupyakadi elipi oo haa holoka po momaukwaneumbo moilongo imwe, oo taa ulike kutya eenghalo momaukwaneumbo otadi ende tadi lunduluka?
8 Shinyikifa oluhodi kunena, eenghalo momaukwaneumbo mahapu otadi ende da yuka kowii. Pashihopaenenwa, omafimbo amwe omukulukadi otashi dulika a kale hadi meumbo limwe novapambele vomushamane nokulonga meumbo koshi yewiliko lovapambele va tya ngaho. Peemhito dimwe, ovakulukadi ohava kala ve na oilonga yokulikongela omboloto, ndele nande ongaho, ohava kala va teelelwa va wanife po yo oilonga yomeumbo ngaashi shi na okukala. Epulo olo la holoka po moilongo ihapu ololo kutya: Omukainhu oo ha longo oilonga yokulikongela omboloto oku na okukala ha longo shi fike peni meumbo mokuyelekanifa noilyo ikwao youkwaneumbo?
9 Moilongo imwe, ovanhu onghee ngoo ve li momaukwaneumbo oshikulushonale omo mu na ovapambele vahapu, ashike ekwatafano lavo ohali kala la kola. Ndelenee kunena, omolwenwefemo lokoilongo yokuEuropa naAmerika nomolweenghalo dopamaxupilo, omaukwaneumbo a tya ngaho otaa ende taa ninipala. Nomolwaasho, ovanhu vahapu ohave shi tale ko shi li omutengi okufila oshisho ovapambele ovanamido, ponhele yoku shi tala ko shi li oshinakuwanifwa ile oufembanghenda. Ovanhu vamwe ohava ningi nokuli onyanya ovadali vavo ovanamido. Okuninga onyanya ovakulupe oshinima osho sha sha moilongo ihapu kunena.
10, 11. Oinima vali imwe ilipi tai ulike kutya eenghalo momaukwaneumbo otadi ende tadi lunduluka moilongo ihapu?
10 Kunena, eehombo dihapu otadi teka. Monakudiwa, ovalihomboli ova li hava kala pamwe fiyo kaume kopahombo umwe a fya. Ndele kunena, oto hange ovanhu tava hombola ndele konima yefimbo lixupi tava hengafana nokukonga ovakainhu vamwe ve lili ile va dimine ovalumenhu vamwe ve lili. Vamwe oto hange tava hengafana nokuhombolafana novanhu vamwe ve lili oikando noikando. Kunena ope na yo omaukwaneumbo mahapu omo mu na ashike omudali umwe.
11 Ovanhu vahapu kave na vali ohokwe momaukwaneumbo oshikulushonale. Vamwe otava dala ashike ounona nonande inava hombola ile inava hombolwa. Vamwe ohava kala ashike pamwe inava hombola. Eenghalo da tya ngaho odi li apeshe mounyuni.
12. Ounona ohava kumwa ngahelipi keenghalo odo tadi ende tadi lunduluka momaukwaneumbo kunena?
12 Ongahelipi kombinga younona? Moilongo ihapu, ovanhu vahapu, unene tuu ovanyasha vomido omulongo nasha, ohava mono ounona inava hombola ile inava hombolwa. Oukadona vahapu vomido omulongo nasha ohava kala ve na ounona vahapu ve na ooxe va yoolokafana. Omishangwahokololo dihapu mounyuni otadi kundaneke kutya ope na ounona omamiliyona mounyuni aushe ovo hava kala momapandavanda, vehe na apa tava di. Vahapu ova ya onhapo omolwomahepeko momaukwaneumbo ile va tewatewa mo momaumbo molwaashi ovo ve na oku va fila oshisho kave na vali eshi tave va pe.
13. Omaupyakadi amwe oo e li apeshe elipi haa ningifa omaukwaneumbo aha kale a hafa?
13 Omaukwaneumbo mahapu oku li shili moupyakadi kunena. Kakele koinima oyo ya tumbulwa metetekelo, ope na yo eenghalo vali odo hadi holoka momaukwaneumbo. Pashihopaenenwa, ovanyasha vahapu vomido omulongo nasha ohava tukula ounashibofa, ovadali vamwe ohava hepeke ounona, ovalihomboli vamwe ohava ningafana nai, ovadali vamwe ohava kala eengholwe. Omaupyakadi a tya ngaho nosho yo makwao amwe e lili ohaa ningifa omaukwaneumbo mahapu aha kale a hafa. Ounona vahapu nosho yo ovakulunhu ihava kala ve udite ve li meameno momaukwaneumbo avo.
14. (a) Vamwe ohava diladila kutya oshike tashi etifa omaupyakadi momaukwaneumbo kunena? (b) Omushiivimhango umwe womefelemudo lotete okwa hokolola ngahelipi eenghalo dokunena, neenghalo odo a xunganeka oda kuma ngahelipi omaukwaneumbo?
14 Oshike lela tashi etifa omaupyakadi a tya ngaho? Vamwe ohava ti kutya omolwaashi ovakainhu vahapu kunena hava longo oilonga yokulikongela omboloto. Vamwe ohava ti kutya omolwaashi elihumbato lopaenghedi kunena ola xutuka. Vamwe natango ohava yandje omatomheno amwe e lili. Omido omayovi avali lwaapo da pita, omushiivimhango umwe a li a shiivika nawa okwa li a xunganeka shi na sha nomaupyakadi oo kwa li taa ka hanga omaukwaneumbo eshi a ti: “Omomafiku axuuninwa otape ke uya omafimbo madjuu, osheshi ovanhu tava kala nokulihola vo vene, ovanalwisho voimaliwa, ovalitangi, novalinenepeki novasheki, ve he neduliko kovakulunhu, ve he shii kupandula, ve he neitavelo, ve he nohole, ve he nombili, ovalundili, ovahenalidiliko, ovakwanyanya, ovatondi vouwa, ovakengeleledi, ovahayavala, ovafulalali, ohole yavo yokuhola ouhalu mwii i dule ei yokuhola Kalunga.” (2 Timoteus 3:1-4) Mbela ope na oo ehe wete kutya eendjovo odo otadi wanifwa kunena? Molwaashi eenghalo osho di li ngaho kunena, itashi kumwifa eshi momaukwaneumbo mahapu mu na omaupyakadi.
OSHO TASHI DULU OKUKWAFELA OMAUKWANEUMBO A KALE A HAFA SHILI
15-17. Oshishangomwa eshi otashi ka divilika omayele oo a dja modjo ilipi oyo tai dulu okukwafela oukwaneumbo u kale wa hafa shili?
15 Ovanhu vahapu ohava yandje omayele e na sha nanghee oukwaneumbo tau dulu okukala wa hafa shili. Pashihopaenenwa, ovanamido ohava yandje omayele e likolelela komifyuululwakalo. Mupya munene, ovayandjimayele vopanhu ohava yandje omayele taa kondjifafana, nefimbo limwe omayele oo a talika ko taa longo kunena, ohaa ka talika ko a kwisha monakwiiwa.
16 Ndele mbela openi tapa hangwa lela omayele e shii okulineekelwa, oo taa dulu okuwilika omaukwaneumbo? Mbela ngeenge owa lombwelwa kutya omayele a tya ngaho otaa hangwa membo olo la shangwa omido 1 900 lwaapo da pita, oto ke a tambula ko ngoo? Ile oto ka diladila kutya embo la tya ngaho ola kwisha nokali na ekwafo lasha? Oushili oyoo kutya ngeenge owa konakona embo olo oto ka mona kutya oshike tashi dulu okukwafela omaukwaneumbo a kale a hafa shili.
17 Embo olo olo Ombibeli. Ope na oumbangi muhapu wa kola oo tau ulike kutya Ombibeli oya nwefwa mo kuKalunga. Omushangwa umwe mOmbibeli otau ti: “Omishangwa adishe da yandjwa keenghono dOmhepo yaKalunga odi shii kulonga nokukumaida nokupukulula nokutekula mouyuki.” (2 Timoteus 3:16) Oshishangomwa eshi otashi ke mu ladipika mu li oukwaneumbo opo mu konakone nghee Ombibeli tai dulu oku mu kwafela mu ‘pukulule,’ ile tu tye, mu yukife oinima moukwaneumbo weni nomu pongolole po omaupyakadi oo hamu shakeneke kunena.
18. Omolwashike hatu dulu okukala nelineekelo kutya omayele Ombibeli otaa dulu okuxwepopaleka eehombo?
18 Ngeenge owa limbililwa oushili oo kutya Ombibeli otai dulu okukwafela omaukwaneumbo a kale a hafa shili, diladila kwaashi: Ombibeli oya nwefwa mo kOmutotipo wohombo. (Genesis 2:18-25) Ombibeli oya ti kutya edina laye oJehova. (Exodus 15:3, OB-1954) Jehova oye Omushiti noye ‘Xe, oo epata keshe li na oshikolo shomwenyo kuye.’ (Ovaefeso 3:14, 15, NW) Jehova okwa kala yo ta tale eenghalo domaukwaneumbo e lili noku lili mondjokonona aishe yovanhu. Oku shii omaupyakadi oo taa dulu okuholoka po momaukwaneumbo nokwa yandja omayele oo taa dulu okukwafela ovanhu va pongolole po omaupyakadi a tya ngaho. Mondjokonona aishe, ovanhu ovo va kala tava tula moilonga omafinamhango Ombibeli ova dula okuxwepopaleka eenghalo momaukwaneumbo avo nokukala va hafa lela.
19-21. Oimoniwa yokunena ilipi tai ulike kutya Ombibeli otai dulu okukwafela ovanhu va xwepopaleke eehombo davo?
19 Pashihopaenenwa, omukulukadi umwe muIndonesia okwa li a pikwa kokundobola. Oule womido dihapu, okwa kala iha file oshisho ounona vaye vatatu nokwa kala ha tanguna luhapu nomushamane waye. Ndele lwanima okwa ka hovela okukala ha konakona Ombibeli. Mokweendela ko kwefimbo, omukulukadi oo okwa li a tambula ko osho Ombibeli tai hongo. Eshi a tula moilonga omafinamhango oo e li honga mOmbibeli, nonande okwa li she mu pula eenghendabala, okwa li a ninga omukulukadi muxwepo. Osho okwa li sha ningifa oukwaneumbo wavo aushe u kale wa hafa shili.
20 Omukulukadi umwe muSpania okwa ti: “Konima eshi twa kala pamwe oule wodula okudja eshi twa hombola, otwa ka kala tu na oupyakadi wa kwata moiti.” Omukulukadi oo nomushamane waye kava li ve na omalalakano a faafana nokava li naanaa hava popi okuninga shapo tava tanguna. Nonande ova li ve na okamonakadona kanini, ova li va tokola okutopoka paveta. Ndele fimbo inava katuka onghatu ya tya ngaho, ova li va ladipikwa va konakone Ombibeli. Ova konakona omayele oo taa yandjwa kOmbibeli e na sha novashamane nosho yo ovakulukadi nove a tula moilonga. Osho osha li she va kwafela va kale hava kundafana nombili, noshidjemo, oukwaneumbo wavo owa ka kala wa hangana nowa ka kala wa hafa shili.
21 Ombibeli otai dulu yo okukwafela ovanamido. Pashihopaenenwa, diladila koshimoniwa eshi shovalihomboli vonhumba vokuJapani. Omushamane okwa li ha handuka diva nomafimbo amwe okwa li ha denge omukulukadi waye. Ovanakadona vavo ova li va hovela okukonakona Ombibeli nonande ovadali ovo ova li have va pataneke. Konima yefimbo, omushamane naye okwa ka kala ha konakona Ombibeli pamwe novanakadona. Pefimbo opo, omukulukadi okwa kala natango te va pataneke. Ndele mokweendela ko kwefimbo, omukulukadi oo okwa li a mona nghee omafinamhango Ombibeli a kwafela omushamane waye novanakadona. Pashihopaenenwa, ovanakadona ova li tave mu file oshisho nawa, nomushamane okwa li a ninga omunambili. Omalunduluko a tya ngaho okwa li e linyengifa omukulukadi naye a hovele okukonakona Ombibeli. Naye okwa ka kwafelwa a ninge omukulukadi omuxwepo. Omukulukadi oo omunamido okwa kala ha popi lwoikando ta ti: “Paife otwa ninga ovalihomboli vashili.”
22, 23. Omolwashike taku dulu okutiwa kutya Ombibeli otai dulu okukwafela ovanhu vomoiwana aishe va kale va hafa shili momaukwaneumbo avo?
22 Oimoniwa oyo oi li ashike imwe yomoimoniwa ihapu yaavo va kwafelwa va kale va hafa shili momaukwaneumbo avo. Ovanhu ovo tava hafele onghalamwenyo youkwaneumbo ova tambula ko omayele Ombibeli noku a tula moilonga. Ovanhu va tya ngaho navo ova dingililwa ashike keenghalo odo da palamena keshe umwe womufye, ngaashi elongifo leenghono, oluhaelo nosho yo oudjuu wopamaxupilo. Kakele kaasho, navo inava wanenena ngaashi ashike ovanhu aveshe. Ashike otava hafele onghalamwenyo momaukwaneumbo avo molwaashi ohava kendabala alushe okuninga oinima metwokumwe nehalo lOmutotipo woukwaneumbo, Jehova. Jehova Kalunga okwa popya okupitila mOmbibeli a ti: “Aame Omwene Kalunga koye, ou handi ku longo eshi tashi ku wapalele, ndele handi ku tula mondjila ei u nokweenda nayo.” — Jesaja 48:17.
23 Nonande Ombibeli oya pwa okushangwa omido omayovi avali lwaapo da pita, omayele ayo otaa longo fiyo okunena. Kakele kaasho, Ombibeli oya nuninwa ovanhu aveshe, ndele kai fi embo lovatilyane, ngaashi vamwe hava diladila. Jehova oye a shita ‘oiwana aishe yovanhu okupitila momunhu umwe,’ noku shii nawa oshitwe yomunhu keshe. (Oilonga 17:26) Onghee hano, omafinamhango Ombibeli otaa longo kovanhu aveshe. Ngeenge omwe a tula moilonga moukwaneumbo weni, otamu dulu okukala mwa hafa shili.
OTO NYAMUKULA NGAHELIPI OMAPULO AA?
Oshike tashi ningilwa omaukwaneumbo mahapu kunena? — 2 Timoteus 3:1-4.
Olyelye Omutotipo woukwaneumbo? — Ovaefeso 3:14, 15, NW.
Oshike tashi dulu okukwafela omaukwaneumbo a kale a hafa shili? — Jesaja 48:17.
[Efano pepandja 4]