“Tunga oukwaneumbo woye”
1 Momaputuko aeshe mounyuni, omaukwaneumbo otaa te ka po. Ounyuni waSatana ouyadi oukengeleledi nokuhe na eenghedi. (1 Joh. 5:19) Osho otashi ulike nghee sha fimana ‘okutunga omaukwaneumbo etu’ nosho yo okuhonga vamwe nghee ve na okuninga ngaho. — Omayel. 24:3, 27, NW.
2 Omafinamhango Ombibeli ohae tu amene: Opo oukwaneumbo woye u kale wa hafa shili, omwa pumbwa okutula moilonga omafinamhango Ombibeli. Omafinamhango oo e li paushili ohaa etele oshilyo keshe shoukwaneumbo ouwa meembinga adishe dokukalamwenyo. Omaukwaneumbo oo haa tula moilonga omafinamhango Ombibeli otaa ka kala a hafa notaa ka kala e na ombili yopakalunga. — Yelekanifa naJesaja 32:17, 18.
3 Omafinamhango oo taa dulu oku tu kwafela tu tunge omaumbo etu oku li membo Osho tashi dulu okukwafela oukwaneumbo u kale wa hafa shili. Pexulilo letukulwa keshe ope na oshimhungu osho tashi divilike omafinamhango oo oilyo youkwaneumbo i na okudimbuluka. Oimhungu ihapu oya hovela nepulo eli: “Ongahelipi omafinamhango aa Ombibeli taa dulu okukwafela . . . ?” Osho ohashi kwafele omunhu a yukife elitulemo komadiladilo aKalunga opo a kale ha tale ko oinima ngaashi Kalunga he i tale ko. — Jes. 48:17.
4 Shiiva nawa embo olo. Lihonga okukonga omafinamhango oo taa dulu oku ku kwafela ngeenge opa holoka omaupyakadi. Embo olo ola kundafana oinima ngaashi kutya omunhu oo ta diladila okuhombola ile okuhombolwa oshike e na okutala kusho momunhu oo a hala okuhombola (etukulwa eti-2), oshike hashi eta ehafo lashili mohombo (etukulwa-3), nghee ovadali tava dulu okutekula ovana vavo vomido omulongo nasha va ka kale ovakulunhu ve na oshinakuwanifwa nohava tila Kalunga (etukulwa eti-6), nghee to dulu okwaamena oukwaneumbo woye komanwefemo mai (etukulwa eti-8), omafinamhango oo taa dulu okukwafela omaukwaneumbo oo e na omudali umwe a pondole (etukulwa eti-9), ekwafo lopamhepo komaukwaneumbo oo e na oshilyo osho hashi nu sha pitilila nomu na elongifo leenghono (etukulwa eti-12), osho tamu dulu okuninga po ngeenge ohombo i li pokuteka (etukulwa eti-13), osho hatu dulu okuninga po opo tu fimaneke ovadali ovanamido (etukulwa eti-15) nosho yo osho mu na okuninga opo mu ka kale nomwenyo waalushe mu li oukwaneumbo (etukulwa eti-16).
5 Longifa nawa embo olo Oukwaneumbo: Ngeenge inamu konakona nale embo olo noukwaneumbo woye, mbela itamu dulu okuninga ngaho paife? Kaleni yo hamu endulula omatukulwa oo taa ungaunga nomaupyakadi nosho yo omashongo oo e mu taalela, nokudiladila pamwe neilikano nghee tamu dulu okutula moilonga omayele oo e li momatukulwa oo. Kakele kaasho, ninga eenghendabala da mana mo opo u yandje embo Osho tashi dulu okukwafela oukwaneumbo u kale wa hafa shili moukalele kovanhu vahapu ngaashi tashi dulika.
6 Omaukwaneumbo oo e na eliyandjo lometilokalunga otaa ka pamekwa pamhepo notaa ka kala a hangana, nokungaho otaa ka dula okuungaunga nomaponokelo aSatana. (1 Tim. 4:7, 8; 1 Pet. 5:8, 9) Katu na tuu olupandu eshi tu na omayele oo dja kuKalunga Omutoti woukwaneumbo!