Okulongifa ouyelele oo wa pewa

OMBIBELI otai faafanifa eongalo lopaKriste nolutu lomunhu. Oshinhimbu keshe sholutu osha fimana, nonande oinhimbu “aishe kai na oshilonga shimwe ashike.” Metwokumwe naasho, otu na okuwanifa po noudiinini oshinakuwanifwa keshe osho twa pewa. Osho otashi tu pula tu kale tu udite ko nawa nokulilongekidila nawa ouyelele oo hatu ka longifa moshipopiwa shetu, nokatu na okutala ko oshikundafanwa osho twa pewa inashi fimana, hatu diladila kutya oikundafanwa ikwao otai ka kala ihokwifa i dulife osho twa pewa. (Rom. 12:4-8) Ongudu yomupiya omudiinini nomunaendunge oi na oshinakuwanifwa shoku tu pa eendja dopamhepo “pefimbo.” (Mat. 24:45) Ohatu ulike kutya otu na olupandu omolwefiloshisho la tya ngaho, ngeenge eshi hatu yandje oipopiwa yetu ohatu longo metwokumwe nomalombwelo oo twa pewa, hatu longifa ounghulungu wetu. Okuninga ngaho otaku kwafele opo oinima i kale tai ende nawa meongalo.

Osho tu na okukwatela mo. Ngeenge owa pewa oshikundafanwa shonhumba osho u na oku ka kundafana mofikola, shilipaleka kutya oto ka kundafana oshikundafanwa osho, ndele hainima imwe i lili. Luhapu otashi dulika u pewe ouyelele wokondadalunde oo to ka longifa. Ngeenge ino pewa ouyelele wokondadalunde oko oshipopiwa shoye shi na okukala sha kanghamena, oto dulu okukonga omauyelele moishangomwa oyo wa hala. Ashike, eshi to lilongekida oshipopiwa shoye, shilipaleka kutya ouyelele woye aushe ou li metwokumwe noshikundafanwa osho wa pewa. Eshi to hoolola kutya oto ka kwatela mo ouyelele ulipi moshipopiwa shoye, owa pumbwa yo okudiladila shi na sha novapwilikini voye.

Konakona noukeka odjo omo mwa dja ouyelele woye nosho yo omishangwa odo di li mo. Opo nee diladila nghee to dulu oku ka longifa ouyelele oo nomupondo opo u etele ovapwilikini ouwa. Hoolola mo oitwa ivali ile itatu mouyelele oo opo u ke i longife i li oitwa oyo ya fimanenena moshipopiwa shoye. Sha faafana, mouyelele oo wa pewa, hoolola mo omishangwa odo wa hala oku ka lesha nokukundafana.

Oto ka longifa ouyelele u fike peni? Longifa ashike ouyelele oo u wete kutya oto ka dula okuungaunga nao nomupondo. Ino longifa ouyelele muhapu oo tau ku imbi u honge monghedi tai pondola. Ngeenge ouyelele wonhumba itau ku kwafele u hange elalakano loye, ino u longifa. Yandja ashike elitulemo koitukulwa oyo tai ku kwafele u hange elalakano loye, nokulongifa ashike ouyelele oo tau hongo notau etele ovapwilikini ouwa. Onghedi yokupopya ei otai ku kwafele u longife ouyelele oo wa pewa eshi to yandje oshipopiwa shoye, ndele hakumona kutya oto dulu okulongifa ouyelele u fike peni oo wa pewa.

Oshipopiwa shoye kashi na ashike okukala engongo louyelele oo wa pewa u longife. Ou na okuyelifa oitwa yonhumba, okuyelifa etulomoilonga layo noto dulu yo okuyandja oihopaenenwa i na sha nanghee tai dulu okutulwa moilonga. Oto dulu okulongifa oitwa ya wedwa po opo u ndjadjukunune oitwa ya fimana youyelele oo wa pewa ponhele yokupingena po ouyelele oo.

Ovamwatate ovo va wana okuhonga meongalo otashi dulika va ka pewe oipopiwa mOkwoongala kwoPailonga. Ove shii efimano lokulongifa ouyelele oo va pewa ponhele yoku u pingena po naumwe u lili. Sha faafana, ovamwatate ovo hava yandje oipopiwa yomoipafi ohava pewa oipopiwadutilo oyo ve na okulongifa. Oipopiwadutilo oyo ohai va pe omhito yokuhoolola kutya ouyelele ulipi tava ka longifa, ndele ohai va ulikile kutya oitwa ya fimanenena oyo ve na okuyelifa oilipi nosho yo omishangwa oko kwa kanghamena oshipopiwa. Okulihonga okukala ho longifa omauyelele oo wa pewa otaku ku kwafele u ninge omupopi omunekeka, nokungaho oto ka dula okulineekelelwa oufembanghenda wokuyandja oipopiwa peemhito dimwe di lili.

Edeulo la tya ngaho otali dulu oku ku kwafela u ninge omakonakonombibeli taa twikile. Oto ke lihonga okuyandja elitulemo kouyelele oo tau kundafanwa, ponhele yokulongifa ouyelele umwe u lili nokudivilika oinima imwe oyo ihokwifa okuuda, ndele inai pumbiwa opo ovapwilikini va ude ko oshikundafanwa. Ngeenge ou udite ko elalakano loshileshwa eshi, ito ka kala u udite wa mangwa, u kale u udite kutya ito dulu okuweda po nande omayelifilo asha oo taa dulu okukwafela omukonakoni.