Okudivilika oitwa oyo ya fimanenena

OITWA ya fimanenena yomoshipopiwa oilipi? Kai fi ashike oitwa ihokwifa oyo hai popiwa ashike ngahenya pakafimbo, ndele oyo omadiladilo a fimanenena oo haa ndjadjukununwa oule wokafimbo. Oitwa oyo oyo omadiladilo oo tae ku kwafele u hange elalakano loye.

Opo oitwa oyo ya fimanenena i ka kale i liwetikile mo moshipopiwa shoye, owa pumbwa okuhoolola nokuunganeka ouyelele woye nawa. Ngeenge owa kongo ouyelele u na sha noshipopiwa shoye, oto ka mona ouyelele muhapu u dulife pwaao wa pumbwa oku ka longifa. Oshike tashi ka ufa kutya owa pumbwa ouyelele u fike peni?

Tete, diladila shi na sha novapwilikini voye. Mbela ove na osho ve shii kombinga yoshikundafanwa shoye ile kave na eshi ve shii kombinga yasho? Mbela vahapu vomuvo ova itavela osho Ombibeli tai ti shi na sha noshikundafanwa osho ile inave shi itavela? Omashongo elipi hava shakeneke mokukalamwenyo kwavo kwakeshe efiku eshi tava kendabala okutula moilonga osho Ombibeli tai ti kombinga yoshikundafanwa osho? Oshitivali, kaleka momadiladilo elalakano olo wa hala okuhanga eshi to ka kundafana novapwilikini. Oinima oyo ivali oyo nai ku wilike kutya ou na okulongifa ouyelele u fike peni nokuhoolola ashike oo tau wapalele filufilu.

Ngeenge owa pewa oshipopiwadutilo shi na oshipalanyole nosho yo oitwa oyo ya fimanenena, oinima oyo oyo u na okulongifa. Ndelenee oshipopiwa shoye oto ke shi yandja ashike nawa ngeenge owa kaleke momadiladilo omayele oo a yandjwa metetekelo eshi to ndjadjukununa oshitwa keshe sha fimanenena. Ngeenge ino pewa oshipopiwadutilo, oto dulu okuhoolola ove mwene oitwa oyo ya fimanenena.

Ngeenge ou na oitwa oyo ya fimanenena momadiladilo nowa unganeka nawa omadiladilo oo e li koshi yoitwa oyo, otashi ka kala shipu kwoove okuyandja oshipopiwa. Ovapwilikini voye navo otashi dulika yo ve ke likole mo shihapu.

Eenghedi di lili noku lili omo to dulu okuunganeka ouyelele woye. Oto dulu okuunganeka oshipopiwa shoye meenghedi di lili noku lili. Ngeenge owa shiiva eenghedi odo, oto ka mona kutya dihapu domudo ohadi pondola she likolelela kelalakano olo wa hala okuhanga.

Onghedi imwe omo to dulu okuunganeka ouyelele woye ongaashi okundjadjukununa oitwa i lili noku lili palandulafano. (Oshitwa keshe sha fimanenena osha pumbiwa molwaashi otashi kwafele ovapwilikini va ude ko oshikundafanwa osho, ile shi ku kwafele u hange elalakano loshipopiwa shoye.) Onghedi ikwao oyo okuhokolola oiningwanima palandulafano layo. (Pashihopaenenwa, ngeenge oto hokolola oiningwanima oyo ya tetekela Eyelu, oto dulu okushikulifa ko oiningwanima oyo ya tetekela ehanauno laJerusalem mo 70 O.P., opo nee oto dulu okushikulifa ko oiningwanima yopefimbo letu.) Onghedi onhinhatu oyoyo yokupopya osheetifi noshidjemo shoshinima shonhumba. (Ngeenge to longifa onghedi oyo, oto dulu okupopya kombinga yonghalo yonhumba oyo i li po, kashi na nee mbudi kutya oto hovele to popi osheetifi ile oto popi shi na sha nonghalo oyo.) Onghedi onhine oya kwatela mo okupopya to longifa omakondjifafano. (Oto dulu okuyelifa eyooloko olo li li pokati koinima iwa naayo ii.) Omafimbo amwe, oto dulu okulongifa eenghedi dokuunganeka ouyelele woye di dulife puimwe moshipopiwa.

Eshi Stefanus a li ta lundilwa mOmhangu yopombada yOvajuda, okwa li a yandja oshipopiwa sha denga mbada, e shi yandja ta longifa onghedi yokupopya oiningwanima palandulafano layo. Eshi to lesha oshipopiwa osho shi li mOilonga 7:2-53, didilika kutya Stefanus okwa hoolola oitwa oyo e na okulongifa. Tete, Stefanus okwa li a yelifa nawa kutya ota hokolola ondjokonona oyo ovapwilikini vaye itava dulu okupataneka. Opo nee okwa li a popya kutya nonande ovamwaina vaJosef kava li ve mu hokwa, Kalunga okwa li e mu longifa a mangulule oshiwana shaye. Opo nee okwa li a popya kutya Ovajuda kava li hava dulika kuMoses, oo Kalunga a li a nangeka po e va wilike. Lwanima, okwa li a divilika kutya ovo va dipaifa Jesus Kristus ova li ve na oikala ya fa oyo ya li i niwe kOvajuda vopefimbo lonale.

Ino longifa oitwa ihapu ya fimanenena. Ino pumbwa oitwa ihapu ya fimanenena ngeenge to ndjadjukununa oshipalanyole. Luhapu oitwa oyo ihai kala ya konda po puitano. Osho osho shi na okukala ngaho kutya nee oto yandje oshipopiwa shominute 5, 10, 30 ile di dulife opo. Ino kendabala okudivilika oitwa ihapuihapu. Ovapwilikini otava ka koneka ashike oitwa inini yomoshipopiwa shoye. Apa ngoo pe fike oule woshipopiwa, opo ngoo tapa ka kala pe fike okuyelifa kwoye nawa moule oitwa oyo ya fimanenena.

Kutya nee oto ka kundafana oitwa ya fimanenena i fike peni, keshe shimwe shi ndjadjukununa nawanawa. Kwafela ovapwilikini va dilonge koshitwa keshe sha fimanenena opo ve shi koneke.

Oshipopiwa shoye nashi kale shipu okuudiwa ko. Osho haalushe she likolelela kouhapu wouyelele oo to yandje. Ngeenge owa unganeka nawa ouyelele woye koshi yoitwa inini ya fimanenena, opo nee to i kundafana kooshimwe, ovanhu otava ka dula okushikula noupu noitava ka dimbwa noupu oitwa oyo.

Oitwa oyo ya fimanenena nai kale i liwetikile mo. Ngeenge ouyelele woye owa unganekwa nawa, itashi ka kala shidjuu okudivilika oitwa oyo ya fimanenena eshi to yandje oshipopiwa shoye.

Onghedi ya fimanenena omo to dulu okudivilika oitwa oyo ya fimanenena oyo okuyandja omaumbangi, okulongifa omishangwa nosho yo ouyelele mukwao oo tau ku kwafele u yukife elitulemo komadiladilo oo a fimanenena noku a divilika. Oitwa aishe oyo i li koshi yoitwa oyo ya fimanenena oi na okuyelifa, okuyambidida ile okudivilika oshitwa osho sha fimanenena. Moshipopiwa shoye ino weda mo ouyelele oo itau wapalele molwaashi ashike ngeno uhokwifa. Ngeenge to ndjadjukununa oitwa oyo tai yambidida oitwa oyo ya fimanenena, ulika nghee ya pambafana filufilu noitwa oyo ya fimanenena. Ino efa ovapwilikini ovo va diladile vo vene kutya oya pambafana ngahelipi. Oto dulu okuulika nghee ya pambafana mokweendulula oitya ya fimanenena oyo tai holola oitwa oyo ya fimanenena, ile u kale to endulula enenediladilo loshitwa keshe sha fimanenena efimbo nefimbo.

Ovapopi vamwe ohava divilike oitwa oyo ya fimanenena moku i tumbulwa kooshimwe. Nonande oyo oi li onghedi imwe omo to dulu okudivilika oitwa oyo ya fimanenena, osho inashi hala okutya ku na okuhoolola noukeka nokuunganeka nawa ouyelele woye.

Oto dulu okutumbula oshitwa sha fimanenena tete ofimbo ino yandja ouyelele oo tau shi yambidida. Osho otashi ka kwafela ovapwilikini va mone kutya osho tashi shikula ko osha fimana shi fike peni, notashi ka divilika yo oshitwa osho sha fimanenena. Oto dulu okudivilika oshitwa moku shi ngonga konima eshi we shi ndjadjukununa.

Ngeenge u li moukalele. Omafinamhango oo twa kundafana metetekelo itaa longo ashike shi na sha noipopiwa ndele otaa longo yo ngeenge to kundafana navamwe moukalele. Ngeenge to lilongekida, kaleka momadiladilo omaupyakadi onhumba oo ovanhu vomoshitukulwa sheni hava kala tave lipula nao. Hoolola oshipalanyole osho tashi ke ku kwafela u yelife nghee Ombibeli tai ulike kutya oupyakadi oo otau ka kandulwa po ngahelipi. Oto dulu okuhoolola oitwa ivali ya fimanenena opo u ndjadjukunune oshipalanyole osho. Tokola kutya omishangwa dilipi to ka longifa opo u yambidide oitwa oyo. Opo nee diladila kutya oto ka hovela ngahelipi eenghundafana deni. Okulilongekida kwa tya ngaho otaku ke ku kwafela u tifuke apa sha pumbiwa eshi tamu kundafana. Otashi ke ku kwafela yo u popye oinima oyo omuneumbo ta ka dula okudimbuluka.