OSHITWA 14

Okudivilika oitwa oyo ya fimana

Ovaheberi 8:1

ENGONGO: Kwafela ovapwilikini voye va shikule eshi to yandje oshipopiwa nokuyelifa nghee oitwa ya fimana tai tu kumwe noshipopiwa ashishe nosho yo noshipalanyole.

NGHEE U NA OKU SHI NINGA:

Kala u na elalakano. Diladila ngeenge oshipopiwa shoye osha nuninwa okulombwela, okutomha ile okuladipika ovapwilikini, opo nee to shi dutu nawa. Shilipaleka kutya oitwa aishe oyo ya fimana otai ku kwafele u hange elalakano loye.

Lipula kutya: ‘Omapulo ile omalimbililo elipi tashi dulika ovapwilikini vange ve na kombinga yoshikundafanwa osho? Openi tashi dulika tava ka kala ve na omalipulo ile va limbililwa?’ Unganeka oitwa yoye melandulafano she likolelela komapulo oo opo ovapwilikini voye va dule okushikula, okuuda ko nokutambula ko osho to va hongo.
Divilika oshipalanyole shoshipopiwa shoye. Eshi to yandje oshipopiwa shoye, yukifa elitulemo koshipalanyole mokweendulula oitya oyo ya pamba oshipalanyole ile eesinonime.
Oitwa yoye nai kale ya yela noipu okuudiwa ko. Hoolola ashike oitwa oyo ya fimana noya pambafana noshipalanyole opo u dule okuhonga nomupondo meni lefimbo olo wa pewa. Ninipika omuvalu woitwa ya fimana, yelifa nawa oshitwa keshe sha fimana, fuda po pokati koshitwa keshe sha fimana ofimbo ino taulukila kushikwao.

Oto dulu okutumbula oitwa oyo ya fimana metwalemo loye opo u kwafele ovapwilikini va shikule ile mokweendulula oitwa oyo ya fimana pexulilo loshipopiwa opo ve i dimbuluke.