EPULO 7
Ondi na okuninga po shike ngeenge ohandi fininikwa kuvamwe ndi ye momilele?
MBELA OTO KA NINGA PO SHIKE?
Diladila konghalo ei: Eshi Helita a mona Mike moule ashike weemwedi mbali, okwa li e wete a fa e mu shii nale. Ova kala have litumine omatumwalaka pandjikilile, hava popi mongodi efimbo lihapu nohava kala ve uditafane nawa. Ashike Mike okwa li a hala shihapu shihe fi ashike eenghundafana.
Moule weemwedi mbali da pita, Mike nosho yo Helita ova hovela okukala have likwata momake nokulixupita. Helita ka li a hala okutwikila nekwatafano olo. Ashike kombinga imwe, ka li a hala okweefa po Mike molwaashi ngeenge e li naye oha kala e udite ombili, ye okwe likalekelwa kuye. Kakele kaasho, Helita okwe lipopila a ti: ‘Fye naMike otu holafane.’
Ngeenge owa fika pomido dokweendelafana nou li monghalo ya faafana noyaHelita, ngeno oto ka ninga po shike?
KANGHAMA NDELE TO DILADILA!
Omilele odi li oshali ya dja kuKalunga noda nuninwa ashike ovalihomboli. Omunhu oo tai momilele komesho yohombo ota longifa papuko oshali ya tya ngaho. Ota faafanifwa nomunhu a kufa oshikutu shiwa osho a pewa kukaume kaye ndele te shi longifa onga oshilapi shokuwapalekifa
Ngeenge omunhu ita dulika keemhango dimwe dopaushitwe, ngaashi omhango yeenghono dedu, tashi dulika a nhuke poima pale unene ota dulu okumona oshiponga. Sha faafana, ngeenge omunhu ita dulika komhango yaKalunga yopaenghedi ngaashi oyo tai ti: ‘Yepeni oluhaelo,’ ota ka mona oilanduliko. — 1 Ovatessaloniki 4:3.
Omunhu oo ina hala okudulika koshipango osho ota ka mona oidjemo ilipi? Ombiibeli oya ti: “Omuhaeli ota nyono kolutu laye mwene.” (1 Ovakorinto 6:18) Osho otu shi shii ngahelipi?
Ovakonakoni voinima ova didilika kutya ovanyasha vahapu ovo va ya momilele komesho yohombo ohava mono imwe yomoilanduliko ei tai landula.
OKUKALA VA NYIKA OLUHODI. Ovanyasha vahapu ovo hava i momilele komesho yohombo ohava popi kutya lwanima ohave ke livela ombedi.
OKUHELINEEKELAFANA. Konima ashike eshi ovanyasha va ya momilele, aveshe vavali oha hovele okulipula pauhandimwe kutya, ‘Okwa ya vali nalyelye momilele?’
OKUKALA VA NYEMATA. Oukadona vahapu ove hole ovamati ovo ve na ko nasha navo noitave va ningilile mo. Mepingafano naasho, ovamati vahapu ihava kala vali va hokwa oukadona ovo va ya navo momilele.
Oushili oyoo kutya: Ngeenge owa i momilele komesho yohombo, oho lishindula noho kanifa oshinima shi na ondilo. (Ovaroma 1:24) Onghee hano, ino ekelashi olutu loye li na ongushu.
Ulika kutya oto dulu ‘okuyepa oluhaelo.’ (1 Ovatessaloniki 4:3) Ngeenge owa ka hombola ile wa ka hombolwa fiku limwe, oto ka dula okuya momilele. Nokungaho, oto ka dula okuhafela omilele nokuhenuka oidjemo ii yokuya momilele komesho yohombo, ngaashi omalipulo mahapu, okulivela ombedi nokukala u udite uhe na vali oshilonga. — Omayeletumbulo 7:22, 23; 1 Ovakorinto 7:3.
OTO DILADILA NGAHELIPI?
Mbela omunhu oo e ku hole shili ota ka kala ngoo a hala okutula moshiponga oukolele nonghalonawa yoye yopamaliudo?
Mbela omunhu oo e na ko nasha naave shili ota ka kala ngoo a hala u nyone po ekwatafano loye naKalunga? — Ovaheberi 13:4.