Mona ouwa mokukonakona embo Ehena popepi naJehova
1 Otwa li twa hafa eshi twa li twa mona embo Ehena popepi naJehova olo la li la pita mOshikwanyama nOshindonga poshoongalele shoshitukulwa shomo 2010, shi na oshipalanyole “Kala popepi naJehova!” Vahapu ova li va lesha embo olo diva eshi ve li pewa.
2 MuOktoba 2011 otwa li twa hovela okukonakona embo Ehena popepi naJehova pEkonakonombibeli lEongalo. Ongahelipi hatu dulu okumona ouwa mekonakono letu? Opo tu mone ouwa mulo, osha fimanenena okukala hatu lilongekida. Ohaku longifwa efimbo lihapu metukulwa keshe molwaashi outendo voshivike keshe ovanini. Osho otashi ku kwafele u mone efimbo la wana lokuyandja omanyamukulo taa di komutima e likolelela kouyelele oo wa konakona nowe u dilonga nawa.
3 Okudja metukulwa etivali okuyuka komesho, omu na oimhungu i na oshipalanyole “Omapulo okudilonga.” Konima ngeenge etukulwa la pu, ohaku kundafanwa oshimhungu. Oo ta kwatele komesho oha pula oilyo yeongalo kutya oshike ye lihonga eshi ya dilonga komishangwa odo da etwa moshimhungu osho. (Omayel. 20:5) Kakele komapulo oo e li moshimhungu, oo ta kwatele komesho ota dulu yo okupula omapulo amwe ngaashi aa taa landula: Ouyelele oo otau tu lombwele shike kombinga yaJehova? Owa kuma ngahelipi onghalamwenyo yoye? Ongahelipi to dulu oku u longifa opo u kwafele vamwe? Elalakano laye olo okupula ovapwilikini va ninge omatyekosha taa di komutima, ndele haku va pula shi na sha nokanima keshe.
4 Nonande oishangomwa aishe oyo hai nyanyangidwa ‘komupiya omudiinini nomunaendunge’ otai tumbalekifa Jehova, embo Ehena popepi naJehova ole likalekelwa molwaashi alishe otali kundafana shi na sha nomaukwatya aJehova. (Mat. 24:45-47) Otu na omhito ihafifa yokumona ouwa pauyadi mokukonakona moule omaukwatya aJehova. Onghee hano, eshi hatu twikile okukonakona embo olo nashi tu kwafele tu ehene popepi elela naTate yetu womeulu nokupondola yo mokukwafela vamwe navo va ninge sha faafana.