Okukonakona embo Ehena popepi naJehova
1. Eemhito dilipi tu na natango dokweehena popepi naJehova?
1 Jehova okwa hala tu ehene popepi naye. (Jak. 4:8) Opo e tu kwafele tu ninge ngaho, momudo tau uya ohatu ka twikila okukonakona embo Ehena popepi naJehova pEkonakonombibeli lEongalo. Pepandja lotete lembo olo opa popiwa shi na sha nelalakano lalo, taku ti: “Okudilonga kunghee Jehova ha holola omaukwatya aye, okutala kunghee Jesus Kristus a ulika omaukwatya oo monghedi ya wanenena nokukala tu shii nghee hatu dulu oku a kulika, otashi ke tu ehenifa popepi naKalunga.” Ngaashi twe shi mona momatukulwa a tetekela, embo olo ola kundafana moule omaukwatya aJehova mahokwifa. Otali ke tu kwafela yo tu kale twa lenga neenghono omaukwatya aye.
2. Embo Ehena popepi naJehova oli na okukonakonwa ngahelipi?
2 Nghee tali ka konakonwa: Omukwatelikomesho oku na okuhovela netwalemo li li pauxupi, etumbulo ashike limwe ile avali. Membo olo inamu ulikwa kutya omishangwa dilipi di na okuleshwa, onghee hano, pefimbo lekonakono omukwatelikomesho oku na okuhoolola omishangwa denenediladilo odo di na okuleshwa. Epulo limwe ile avali otaa dulu okupulwa pexulilo loshikundafanwa keshe onga eendululo. Ngeenge ouyelele owa kwatela mo oshimhungu “Omapulo okudilonga” otashi dulu okulongifwa onga eendululo. Ngeenge efimbo otali shi pitike, omukwatelikomesho ota dulu okupula ku leshwe eevelishe dimwe moshimhungu nokupula omapulo a wedwa po opo ovapwilikini va ninge omatyekosha avo.
3. Eshi hatu konakona embo, oshike tu na okuninga nomolwashike?
3 Mona ouwa pauyadi: Lilongekida komesho yefimbo nonande embo olo owe li konakona nale. Yandja omatyekosha, molwaashi osho otashi ka fimanekifa Jehova, notashi ke ku dimbulukifa ouyelele nokweetela ovapwilikini vakweni ouwa. (Eps. 35:18; Heb. 10:24, 25) Eshi to dilonga komaukwatya aJehova a tongomana, otashi ke ku kwafela u ehene popepi elela naye. (Eps. 77:12-14) Kungaho, oto ka kala wa tokola toko okudulika koipango yaye notashi ke ku linyengifa neenghono u lombwele vamwe kombinga yaye. — Eps. 150:1-6.