Kala ho hongo ovanhu monghedi i li paunafangwa
1. Oshinima sha fimana shilipi hashi kwafele omunhu a honge monghedi ya yela notai pondola?
1 Opo tu pondole okuhonga ovanhu, osha fimanenena oku va honga monghedi i li paunafangwa. Ngeenge otwa konakona onghedi yokuhonga yOmuhongi Munene, Jesus, otashi ke tu kwafela tu xwepopaleke ‘ounghulungu wetu wokuhonga.’ — 2 Tim. 4:2, NW; Joh. 13:13.
2. Oshike sha kwatelwa mokuhonga monghedi i li paunafangwa, nokuhonga kwa tya ngaho ohaku pondola ngahelipi?
2 Popya monghedi i li paunafangwa: MEudifo lokOmhunda omo ashike tamu hangwa eeshili dimwe domoule odo inadi popiwa nande onale kovanhu, ndele adishe oda li da popiwa monghedi i li paunafangwa. (Mat., etukulwa 5-7) Eemhunga dovanhu odo da li da pwilikina kuJesus oda li da “kuminwa elongo laye.” Ovakwaita ovo va li va tumwa va ka kwate po Jesus ova li ve linyengifwa va popye kutya: “Kapa li omunhu noshito, a popya ngaashi winya ta popi.” (Mat. 7:28, 29; Joh. 7:46) Inatu pumbwa okukala hatu popi oitya idjuu okuudiwa ko, omatumbulo a kitakana ile okulongifa omafaneko male opo ngeno vamwe va tomwe filufilu koshili oyo hatu va udifile. Oshili otai dulu okuyelifwa nawa mokulongifa omautumbulilo oo ovanhu ve shii nawa.
3. Omolwashike vamwe tashi dulika va kale ve na eamo lokundubila ovapwilikini vavo ouyelele poshikando, nongahelipi hatu dulu okuhenuka okuninga ngaho?
3 Tokola kutya otamu kundafana ouyelele u fike peni poshikando: Jesus okwa li ha tale kutya ota dulu okukundafana novapwilikini vaye ouyelele u fike peni poshikando. (Joh. 16:12) Nafye otwa pumbwa okukala hatu didilike okudula kwovanhu nokukala hatu tifuka, unene tuu ngeenge hatu yandje oundombwedi kovapambele, kwaavo opo va ulike ohokwe ile kounona. Otu na okukala twa lungama tuha ndubile ovanhu ouyelele muhapu pefimbo limwe, nokuli nonande otava monika va fa tava pwilikine nelitulemo. Ovanamitimadiwa otava ka twikila okulihonga opo va mone eshiivo lokushiiva Kalunga kashili, Jehova. — Joh. 17:3; 1 Kor. 3:6.
4. Omolwashike shi na ouwa okuyandja elitulemo koitwa oyo ya fimana ponhele yokupopya omauyelele mahapu?
4 Yandja elitulemo koitwa oyo ya fimana: Jesus ka li ha djuupaleke omahongo aye mokukwatela mo omauyelele mahapu unene. Eshi a li a popya kutya ‘aveshe ava va kala meembila otava ka holoka mo,’ ka li a yandja ouyelele muhapu pefimbo opo u na sha naasho tashi ka ningilwa eengudu mbali odo tadi ka nyumuka. (Joh. 5:28, 29) Ngeenge hatu kwatele komesho ekonakonombibeli, otu na okuyukifa elitulemo koitwa oyo ya fimana, nokuhenuka eamo lokuyelifa ouyelele inau pumbiwa oo inau pamba oshikundafanwa.
5. Ohatu ka mona omanangeko noupuna elipi ngeenge otwa kala hatu hongo monghedi i li paunafangwa?
5 Inatu hafa tuu eshi Jehova he tu hongo monghedi i li paunafangwa ashishe osho twa pumbwa okushiiva! (Mat. 11:25) Onghee hano, nafye natu kale hatu hongo monghedi i li paunafangwa nokuhafela oidjemo iwa moukalele.