Owe lilongekida ngoo okuyandja oundombwedi wohangelela?
1 Okuyandja oundombwedi wohangelela otaku dulu okweetifa oidjemo iwa. MOmbibeli omu na oihopaenenwa ihapu yokuyandja oundombwedi wohangelela oyo ya li ya etifa oidjemo iwa. (Joh. 4:7-15) Oshike hatu dulu okuninga po opo tu kale twe lilongekidila okuyandja oundombwedi wohangelela?
2 Okudjala nokuliwapeka: Ngeenge otwa kala hatu djala nawa nokuliwapeka monghedi i shii okufimanekwa efimbo keshe, ohatu ka dula okulombwela vamwe twa manguluka shi na sha neitavelo letu. (1 Tim. 2:9, 10) Ndele ngeenge otu wete kutya onghedi omo twa djala itai fimanekifa Jehova, otashi dulu oku tu imba tu yandje oundombwedi. Mepingafano naasho, ngeenge otwa koshoka notu na eholokepo liwa oshi na oupu shi ningife vamwe ve tu pule kutya omolwashike twa djala nawa. Pashihopaenenwa, ovalihomboli vamwe Eendombwedi ova li va ya molweendo va djala nawa nova li va kala omutumba va shaama nomulumenhu Omumoslema. Eshi omulumenhu oo a tala keholokepo lavo, okwa li e va pula ngeenge Ovakriste. Osho osha li sha twala meenghundafana dOmbibeli odo da li da kwata oule weevili nhatu.
3 Hovela eenghundafana: Eshi Jesus a li a shakena nomukainhu Omusamaria pondungu yaJakob, okwa li a hovela eenghundafana nomukainhu oo, a li ashike e mu pula omeva okunwa. Sha faafana, nafye ohatu dulu okuhovela eenghundafana mokupopya sha pauxupi ile tu pule ashike epulo lonhumba li li paunafangwa. Nonande omafimbo amwe otashi dulika tu ongaonge okuhovela eenghundafana, ohatu ka kala tu na ‘ouladi’ woku shi ninga ngeenge otwa kala twe lineekela mekwafo laJehova. — 1 Tes. 2:2.
4 Konga eemhito dokuyandja oundombwedi wohangelela: Ovaudifi vahapu ohava kongo eemhito dokuyandja oundombwedi wohangelela. Tete konakona eenghalo doye, nokudiladila shi na sha novanhu ovo tashi dulika ho shakeneke momukokomoko wefiku. Kala ho ende noifo yoshiyeleke nosho yo Ombibeli. Kala ho konenene oinima, nokukala u na ohokwe movanhu ovo u li navo. Ngeenge owa diladila shi na sha neemhito odo ho kala u na momukokomoko wefiku, oto ka dula okuyandja oundombwedi nawanawa. — Fil. 1:12-14; 1 Pet. 3:15.
5 Otu na omatomheno mawa avali okukonga eemhito dokuyandja oundombwedi wohangelela: Ohole yetu yokuhola Kalunga nosho yo ohole yokuhola ovanhu vakwetu. (Mat. 22:37-39) Molwaashi oilonga yokuudifa oya endelela, otu na okukala twe lilongekida alushe okuyandja oundombwedi wohangelela. Otu na okukala twe lilongekida okulongifa omhito keshe tai wapalele opo tu lombwele vamwe kombinga yonghundana iwa yOuhamba omanga pe na efimbo. — Rom. 10:13, 14; 2 Tim. 4:2.
[Omapulo ekonakono]
1. Oshihopaenenwa shilipi tashi ulike kutya oundombwedi wohangelela otau dulu okweetifa oidjemo iwa?
2. Ongahelipi okudjala nokuliwapeka kwetu taku dulu oku tu kwafela tu yandje oundombwedi?
3. Oshihopaenenwa shaJesus oshe ku kwafela ngahelipi u kale ho hovele eenghundafana?
4. Ongahelipi hatu dulu okulilongekidila okuyandja oundombwedi wohangelela?
5. Omolwashike tu na okukala twe lilongekida okuyandja oundombwedi wohangelela?