Otu li Eendombwedi efimbo keshe
1. Oshike hatu dulu okulihonga mehokololo laJesus eshi a li a udifila omukainhu umwe pondungu?
1 Jesus okwa li a loloka nokwa fya ondjala nenota molwaashi okwa enda eevili dihapu. Ndele fimbo ovahongwa vaye va li va ka landa oikulya, okwa li a kala omutumba pondungu imwe oyo ya li kondje yoshilando shaSamaria opo a fude po. Pomhito oyo Jesus ka li a ya muSamaria a ka udife, ndele okwa li ashike ta piti mo a yuka kuGalilea opo a ka twikile noukalele waye. Ndele nande ongaho, okwa li a longifa omhito oyo opo a udifile omukainhu umwe oo a li e uya okuteka. (Joh. 4:5-14) Omolwashike mbela? Omolwaashi Jesus ke na efiku a efele po okukala “Omuhepaululi omudiinini nOmunashili” ile tu tye ondombwedi yaJehova. (Eh. 3:14) Nafye ohatu hopaenene Jesus mokukala Eendombwedi daJehova efimbo keshe. — 1 Pet. 2:21.
2. Ongahelipi hatu dulu okukala twe lilongekida okuyandja oundombwedi wohangelela?
2 Kala we lilongekida: Ohatu dulu okukala twe lilongekida okuyandja oundombwedi wohangelela mokukala hatu ende noileshomwa yonhumba. Ovaudifi vahapu ohava ende noutraktate noku va yandja kovanailonga vomeefitola, kovayakuli vopomahooli nosho yo kovanhu vamwe ovo tava shakene navo momukokomoko wefiku. (Omuud. 11:6) Omumwameme umwe oo hai momalweendo luhapu oha ende alushe e na Ombibeli nosho yo embo Ombibeli otai hongo mondjato yaye yopeke, noha kendabala okuhovela eenghundafana novanhu ovo ve li omutumba popepi naye.
3. Ongahelipi hatu dulu okuhovela eenghundafana novanhu?
3 Nghee to dulu okuhovela eenghundafana: Ngeenge hatu yandje oundombwedi wohangelela, inatu pumbwa okuninga etwalemo li na oshikundafanwa shomushangwa pehovelo. Eshi Jesus a li ta popi nomukainhu pondungu, ka li a hovela eenghundafana mokulombwela omukainhu oo kutya oye Messias. Ndele ponhele yaasho okwa li ashike a pula omukainhu oo e mu pe omeva opo a pendule ohokwe yaye. (Joh. 4:7-9) Omumwameme umwe okwa mona kutya okuninga etwalemo monghedi ya yukila oko ohaku mu kwafele a hovele eenghundafana ngeenge ovanhu tave mu pula kutya omolwashike iha dana efiku lefudo lonhumba. Ponhele yokunyamukula kutya iha dana efiku lefudo lonhumba molwaashi oku li umwe womEendombwedi daJehova, omumwameme oo oha nyamukula ta ti: “Onda tokola pauhandimwe ndiha dane efiku la tya ngaho.” Omunhu oo ta pula luhapu oha kala a hala okuuda kutya omolwashike, naasho ohashi pe omumwameme oo omhito yokuyandja oundombwedi.
4. Omolwashike Mateus 28:18-20 te tu tu omukumo?
4 Nonande Jesus okwa li a mana oukalele waye wokombada yedu nouladi, natango oku na ohokwe inene moilonga yokuudifa oyo tai longwa. (Mat. 28:18-20) Onghee hano, nafye otwe lilongekida okuhepaulula eitavelo letu moipafi efimbo keshe, tu li Eendombwedi, ngaashi Omuhopaenenwa wetu Jesus. — Heb. 10:23.