Divilika shi na sha nokuhovela omakonakonombibeli mOlomakaya lotete
Okudja muMei 2011, ovaudifi ova li va ladipikwa va kendabale okuhovela omakonakonombibeli mOlomakaya lotete lomwedi keshe. Opo tu dule okuninga ngaho, otwa longekidilwa oshitukulwa hashi kala mOshungonangelo yomoukalele shi na oshipalanyole “Omapulo opaMbibeli a nyamukulwa.” Onghee hano, pelongekido loilonga yomomapya mOlomakaya lotete lomwedi keshe ope na okudivilikwa nghee hatu dulu okulongifa oshitukulwa osho tu hovele omakonakonombibeli nope na yo okuningwa euliko langhee shi na okuningwa.
Ovakulunhuongalo otava dulu okuhoolola opo ongudu keshe i kale hai liningile elongekido layo mOlomakaya lotete lomwedi ile va tokole opo eengudu di kale hadi limbwange mumwe tashi dulika tadi kala hadi shakene pOlupale lOuhamba. Ndele ngeenge Olupale ohali longifwa komaongalo e dulife pulimwe, efiku olo le likalekelwa lokuhovela omakonakonombibeli kali na okuundulilwa kefiku likwao.