Nghee hatu dulu okuxwepopaleka ounghulungu wetu moukalele, mokudidilika ovo ve na ohokwe

“Lipashukila ove mwene nenongeko loye.” (1 Tim. 4:16) Omayele oo a nwefwa mo oo omuyapostoli Paulus a li apa Timoteus, otaa ulike kutya, kashi na nee mbudi kutya otu vape ile otu na owino, otu na okuninga eenghendabala tu ninge exumokomesho. Opo tu kwafelwe tu dule okuninga ngaho, mokafo Oukalele Wetu wOuhamba otamu kala hamu kala oitukulwa ya pambafana i na oshipalanyole “Nghee hatu dulu okuxwepopaleka ounghulungu wetu moukalele.” Oshitukulwa keshe otashi ka kundafana ounghulungu wa fimana nomaetepo onhumba e na sha nanghee hatu dulu oku u kulika. Momukokomoko womwedi, atusheni ohatu ladipikwa tu yandje elitulemo le likalekelwa kounghulungu oo. Pexulilo lomwedi, oshitukulwa shOkwoongala kwoPailonga otashi ke tu pa omhito yokuninga omatyekosha e na sha nanghee twa mona mo ouwa eshi twa yandja elitulemo kounghulungu oo. Omwedi ou ohatu ladipikwa tu yandje elitulemo kokudidilika ovo va ulika ohokwe.

Omolwashike sha fimana: Opo tu wanife po oshinakuwanifwa shetu, otu na okuninga shihapu shihe fi ashike okuudifa. Otu na okushuna kovanhu ovo va ulika ohokwe noku va honga, hatu tekele eembuto doshili odo twa kuna. (Mat. 28:19, 20; 1 Kor. 3:6-9) Osho osha hala kutya, otu na oku ka konga vali oo a li a ulika ohokwe, nokupopya naye kombinga yomalipulo aye nokutwikila kwaasho twa kundafanene naye. Onghee hano, otu na okuninga omadidilikoshango ngeenge pe na oo a ulika ohokwe.