Eembuto odo twa kuna otu na oku di tekela opo di kule
1. Oshike tu na okutekela opo shi kule?
1 Ngeenge owa kunu eembuto moshikunino shoye, ou na oku di tekela opo di kule. Otu na okuninga sha faafana shi na sha neembuto doshili yOmbibeli odo hatu kunu momitima dovanhu moshitukulwa shetu. (1 Kor. 3:6) Ngeenge otwa hala eembuto odo dopafaneko di mene omidi, di kule nodi imike oiimati, otu na okukala hatu ningi omalishuneko noku di tekela hatu longifa Eendjovo daKalunga.
2. Ongahelipi to dulu okudika ekanghameno laasho tamu uya okukundafana moshikando tashi uya?
2 Mu fiila epulo: Eshi to lilongekida etwalemo loye, omolwashike ito lilongekida yo epulo tali pendula ohokwe olo wa hala oku ka pula opo u dule okuninga elishuneko? Fiila omuneumbo epulo pexulilo leenghundafana deni odo mwa ninga oshikando shotete, ndele to ningi elongekido lokondadalunde u aluke. Vamwe ohava mono hashi pondola okufiila omuneumbo epulo le likolelela koshikundafanwa shonhumba shi li mokambo Ombibeli otai hongo, osho tashi ke va kwafela va dule okuhovela ekonakonombibeli.
3. Ouyelele ulipi to dulu okukwatela momadidilikoshango oye u na sha naavo va ulika ohokwe?
3 Kala ho ningi omadidilikoshango: Ino dimbwa okuninga diva omadidilikoshango konima eshi wa kundafana nomunhu oshikando shotete. Shanga edina lomunhu nondjukifi yaye. Oshiwa yo okushanga efiku nefimbo opo wa li wa kundafana naye, oshikundafanwa sheni nosho yo kutya owe fiila oshishangomwa shilipi. Mbela okwe ku lombwela kutya oku li melongelokalunga lonhumba? Oku na mbela oukwaneumbo? Mbela okwa popya shi na sha naasho e na ohokwe musho nosho yo osho te lipula nasho? Ouyelele oo otau ke ku kwafela u mone kutya oshike tamu dulu oku ka kundafana naye moshikando tashi landula. Shanga yo efiku olo mwa udafana u shune ko nosho yo epulo olo to ka nyamukula.
4. Omolwashike tuhe na okusholola ngeenge hatu ningi omalishuneko kwaavo va li va ulika ohokwe?
4 Ino sholola: Satana ita ka efa okuninga eenghendabala ‘dokukufa mo eendjovo’ odo da kunwa momitima dovanhu. (Mark. 4:14, 15) Onghee hano, inashi ku shololifa ngeenge oo kwa li a ulika ohokwe ino ke mu hanga mo vali meumbo. Oto dulu oku mu shangela onhumwafo ile u fiye okambapila poshivelo sheumbo lavo. Pashihopaenenwa, omukokolindjila umwe okwa li a hovela ekonakonombibeli nomukainhu wonhumba, ndele okudja opo ina kala vali he mu hange mo meumbo, opo nee, okwe mu shangela onhumwafo. Hauxuuninwa, osho e ke mu hanga mo meumbo, nomukainhu oo okwa li a popya kutya okwa pandula neenghono eshi omumwameme a li e mu ulikila ohokwe. Eshi hatu tekele eembuto doshili yOmbibeli, otashi ke tu etela ehafo oku di mona tadi mene, tadi kulu nosho yo tadi “dala oilya [lwomilongo] nhatu, lwo-60 nolwefele.” — Mark. 4:20.