Omaetepo taa kwafa e na sha nokuninga okwoongala kwoilonga yomomapya taku ti sha

Ngaashi ashike okwoongala kukwao akushe, okwoongala kwoilonga yomomapya nako oku li efiloshisho la dja kuJehova, molwaashi ohaku tu kwafele tu ladipikafane, opo tu kale tu holafane nokulonga oilonga iwa. (Heb 10:24, 25) Oku na okukwata oule wominute nhano fiyo heyali, mwa kwatelwa okuunganeka eengudu, okupopya oshitukulwa osho tashi longwa nosho yo okwiilikana. (Ngeenge okwoongala oko otaku ningwa konima yokwoongala kumwe, oku na okuningwa meni lefimbo lixupielela.) Oo te ku kwatele komesho oku na okulilongekida ouyelele oo tau kwafele ovo tava i moukalele efiku olo. Pashihopaenenwa, ngeenge mOlomakaya ope na vahapu ovo inava kufa ombinga moukalele exuliloshivike la pita, oshiwa okukundafana ashike osho tu na oku ka popya novaneumbo. Oitwa vali ilipi tashi dulika i kale ya wapala okukundafanwa?

• Oihopaenenwa yeenghundafana okudja mOnghalamwenyo yopaKriste noilonga yokuudifa — Okafo kokulongifwa pokwoongala

• Nghee to dulu okulongifa oshiningwanima opo sha ningwa, ile eenghundana, opo u hovele eenghundafana

• Nghee to dulu okunyamukula omunhu oo ita tu kumwe noshikundafanwa

• Nghee to dulu okunyamukula omunhu oo ina itavele muKalunga, oo a itavela moevolusi, oo ha popi elaka limwe li lili, ile oo e li melongelokalunga lonhumba olo li li moshitukulwa sheni

• Nghee to dulu okulongifa oinima oyo i li ko jw.org, ko JW Library^®, ile Ombiibeli

• Nghee to dulu okulongifa oishangomwa oyo i li moshikefa shetu shokuhonga

• Nghee to dulu okukufa ombinga moukalele meenghedi di lili noku lili, ngaashi okuudifa mongodi, okushanga eenhumwafo, okuyandja oundombwedi womoipafi, okuninga omalishuneko, ile okuninga omakonakonombiibeli

• Omadimbulukifo e na sha neameno, okutifuka, okukala nelihumbato liwa, okukala netaleko liwa, ile nosho tuu

• Oshileshwa, ile okavidio ka dja mokambo Diinina oku va leshela noku va honga

• Nghee to dulu okutwa omukumo nokukwafela oo tamu longo naye moukalele

• Omushangwa wa pambafana noukalele, ile oshimoniwa tashi tu omukumo shi na sha noukalele