Ovanhu otava ponokelwa neendjebo mounyuni aushe — Ombiibeli otai ti ngahelipi?

Ovanhu ovo va ponokelwa neendjebo muJuli 2022 mounyuni aushe:

• Oshifo The Japan Times sho 10 Juli 2022 osha ti: “Edipao lomunapolitika oo e shivike nawa [oo a li omuprima woshilongo Shinzo Abe] ola li la tilifa ovanhu aveshe moshilongo nosho yo ounyuni aushe. Naasho osha ningifa ovanhu va kale tave lipula nomhango yokutokola ovo tava longo oimbuluma nopa tulwe eemhango delongifo leendjebo.”

• O-Reuters yo 4 Juli 2022 oya ti: “Ovadenmark ova li va haluka, eshi ovalumenhu vatatu va homata va ponokela eefitola odo di li mo-mall Copenhagen.”

• O-The Guardian yo 10 Juli 2022 oya ti: “Ovanhu 15 moSouth Africa ova fya, konima eshi va yashwa neendjebo po-bar moSoweto.”

• Eenghundana do CBS do 5 Juli 2022 oda ti: “Ovanhu ve dulife po 220 ova li va yashwa nokudipawa mo U.S. mexuliloshivike lo 4 Juli.”

Mbela oimbuluma ya tya ngaho onai ka xule po ngoo efiku limwe? Ombiibeli otai ti ngahelipi?

Oimbuluma otai ka xula po

Ombiibeli oya popya kutya otu li “momafiku axuuninwa,” efimbo opo ovanhu vehe na onghenda, ovakwanyanya nokave na ouxwenge. (2 Timoteus 3:1, 3) Oimbuluma ya tya ngaho ohai etele ovanhu oumbada. (Lukas 21:11) Mepingafano naasho, Ombiibeli oya udaneka efimbo olo itapa ka kala vali oimbuluma. “Ovanhu otava ka kala momaumbo ombili, nomomitumba dihe nombudi nomeenhele detulumuko liwa.” (Jesaja 32:18) Oimbuluma otai ka xula ngahelipi?

Kalunga ota ka xulifa po ovakolokoshi nokuhanauna po oilwifo aishe.

• “Ovahenakalunga tava ka dudwa mo moshilongo.” — Omayeletumbulo 2:22.

• ‘Kalunga ota ka xulifa po oita fiyo okeengaba dedu, ndele ta teyaula omauta nomaonga, nomatemba oita te a xwike po nomundilo.’ — Epsalme 46:9.

Kalunga ota ka xulifa po eedjo odo hadi etifa elongifo leenghono mokuhonga ovanhu va kale nombili.

• “Vo itava ka ninga owii ile okunyona sha komhunda yange aishe iyapuki; osheshi edu alishe otali ka kala li yadi eshiivo lokushiiva Omwene, ngaashi omeva a tuvikila efuta.” — Jesaja 11:9.

• Nokuli nopaife, Kalunga ota hongo ovapiya vaye mounyuni aushe va efe po elongifo leenghono ‘nokuhambula omaongamukonda avo omatemo nomaonga avo oikashulifo.’ — Mika 4:3.

Opo u lihonge shihapu kombinga yomaudaneko Ombiibeli e na sha nanghee mounyuni tamu ka kala ombili, lesha oshitukulwa “Freedom From Fear—Is It Possible?”

Opo u lihonge shihapu kombinga yanghee oimbuluma tai ka xulifwa po, lesha oshitukulwa “Peace on Earth at Last!”