Kolumosho: Hurricane Ian, Florida, USA, Septemba 2022 (Efano laSean Rayford/Getty); pokati: Ina nokamonamati tava di po, Donetsk, Ukraine, Juli 2022 (Efano laAlex Chan Tsz Yuk/SOPA nosho yo efano loLightRocket naGetty); kolulyo: omo hamu konakonwa o-COVID, Beijing, China, Aprili 2022 (Efano laKevin Frayer/Getty)
KALENI OUPAFI!
Odula yo 2022 oya li i yadi omaupyakadi — Ombiibeli otai ti ngahelipi?
Momukokomoko womudo 2022, omwa li unene tamu kundanekwa oita, ouxupilo tau kande omapunya nosho yo oiponga i lili noku lili. Ombiibeli oyo ashike tai dulu okuyelifa kutya oiningwanima oyo oya hala naanaa okutya shike.
Oiningwanima yomo 2022 osho ya hala okutya
Oiningwanima oyo ya ningwa modula ya dja ko, otai weda ko koumbangi oo tau ulike kutya otu li “momafiku axuuninwa,” oo a popiwa mOmbiibeli. (2 Timoteus 3:1) Osho osha hovela modula yo 1914. Tala nghee oiningwanima oyo opo ya ningwa tai tu kumwe naasho Ombiibeli ya popya shi na sha nefimbo letu:
“Oita.” — Mateus 24:6.
“Europa osha mona vali oixuna ya ileni mu tale momudo 2022 omolwoita.”a
Tala oshitukulwa “Russia a ponokela Ukraine.”
“Ondjala.” — Mateus 24:7.
“2022 owa li omudo wanakaidi kahalwenya.”b
Tala oshitukulwa “Ondjala oyo tai etifwa koita yaUkraine.”
“Omikifi dolutapo.” — Lukas 21:11.
“Opolio oya aluka, epulu ihali tongwa vali no-COVID-19 oya longa ilonga inyanyalifa. Oiningwanima oyo otai ulike nghee omikifi odo dolutapo da nyika oshiponga neenghono kovanhu.”c
Tala oshitukulwa “Ovanhu omamiliyona 6 ova fya ko-COVID.”
“Omamoniko matilifi.” — Lukas 21:11.
“Oiningwanima imwe oyo ya ningwa mo 2022 ongaashi: oupyu wa hapupala, oshikukuta, epeya nefudja. Odula oyo kai na fiku i ka dimbiwe, omolwoiningwanima oyo ya ningwa mo i na sha nonghalo yomhepo noya etifa ehanauno, ya twaalela eemwenyo dahapu noya fiya pomutenya ovanhu omamiliyona mounyuni aushe.”d
Tala oshitukulwa “Ounyuni aushe owa lopota kutya onghalo yomhepo oya pupyala nai shi dulife shito.”
“Omapiyaano.” — Lukas 21:9.
“Molwaashi oshiwana osha handuka nale omolwouxupilo tau kande omapunya, eshi ondado yoinima ya kala tai ende nokuwedwa oshe shi ningifa shi ningile omapangeko omakangha mahapu mo 2022.”e
Tala oshitukulwa “Ondado yoinima otai ende nokulonda mounyuni aushe.”
Oshike twa teelela modula tai ya?
Kape na oo taa dulu okushiiva osho tashi ka ningwa mo 2023. Ndele osho tu shii oshosho kutya mafiku Ouhamba waKalunga, ile epangelo laye lomeulu otali ka eta omalunduluko manene kombada yedu. (Daniel 2:44) Epangelo olo otali ka xulifa po okumona oixuna akushe kwovanhu notali ka shilipaleka kutya ehalo laKalunga otali longwa kombada yedu. — Mateus 6:9, 10.
Ohatu ku ladipike u shikule omayele aJesus Kristus ‘nokukala oupafi,’ opo u mone nghee oiningwanima oyo tai ningwa mounyuni tai wanifa po exunganeko lOmbiibeli. (Markus 13:37) Ohatu ku indile u kwatafane nafye, opo u lihonge nghee Ombiibeli tai dulu oku ku kwafela paife nanghee tai dulu oku ku kwafela nosho yo oukwaneumbo weni mu kale mu na eteelelo lashili li na sha nonakwiiwa itunhula.
a Jill Lawless okwa popya momafiku 8 Desemba 2022 meenghundana do-AP, a ti: “Europa osha mona vali oixuna ya ileni mu tale momudo 2022 omolwoita.”
b Ehangano lokuyandja Oikulya mOunyuni ola ti: “Ope na omhumbwe yoikulya mounyuni aushe.”
c Lawrence O. Gostin, JD okwa popya momafiku 22 Septemba 2022 mEhangano li na sha nOukolele loJAMA, a ti: “Otu li pefimbo lomikifi dolutapo ngaashi o-COVID-19, epulu, Opolio, nosho tuu.”
d Martina Igini okwa popya momafiku 24 Oktoba 2022 mEhangano li na sha nOkufila Oshisho Edu, a ti: “Mbela oshike tashi ka shikula ko konima yoiningwanima itilifa i na sha nonghalo yomhepo yomo 2022?”
e Thomas Carothers naBenjamin Feldman ova popya momafiku 8 Desemba 2022 mEhangano li na sha nOkuungaunga nOmaupyakadi Ounyuni nOkukaleka po Ombili, va ti: “Ouxupilo tau kande omapunya oo wa ningifa ovanhu va ninge omakangha mounyuni aushe mo 2022.”