Mbela osha yuka ngoo kOvakriste okukufa ombinga moita — Ombiibeli otai ti ngahelipi?

Ngaashi twa mona momakuyunguto oo e li moUkraine, ovawiliki vahapu vomalongelokalunga otava ladipike ovanhu va yambidide oita. Natu taleni nghee tava yambidida ovo tava lwifafana:

• Mo 16 Marsa 2022, omubishofi Epiphanius I wokoKyiv, okwa kundaneka moshifo The Jerusalem Post a ti: “Efimano netumbalo nali pewe ovakwaita aveshe ovo tava amene eedalele daUkraine kovatondi vavo . . . Ohatu va ilikanene tashi di komutima nohatu va yambidida alushe.”

• Mo 3 Aprili 2022 o-Reuters oya ti: “Omukulunhu wongeleka yoOrthodox yomoRussia okwa ningila omambo ovakwaita vaRussia mOsoondaxa noku va lombwela kutya nava lwile oshilongo shavo, molwaashi ovo ashike tava dulu oku shi ninga, eshi ovanhu ovo ve li moMoscow tava twikile okuninga oshikonga shokuponokela Ukraine.”

Mbela osha yuka ngoo kOvakriste okukufa ombinga moita? Ombiibeli otai ti ngahelipi?

Osho Ombiibeli tai ti

Ombiibeli oya ulika kutya ovashikuli vaJesus Kristus vashili ihava kufa ombinga moita.

• “Shunifa mo eongamukonda loye moshilaleko, osheshi aveshe ava tava longifa eongamukonda otava ka fya keongamukonda.” — Mateus 26:52.

  Mbela omunhu oo ha kufa ombinga moita noku i yambidida oha dulika ngoo keendjovo daJesus?

• “Ohandi mu pe oshipango shipe kutya kaleni mu holafane, ndele kaleni mu holafane ngaashi ame nda kala ndi mu hole. Kungaho, ovanhu aveshe otava ka shiiva kutya nye ovahongwa vange ngeenge omu holafane.” — Johannes 13:34, 35.

  Mbela omunhu oo ha yambidida oita ota ulike ngoo kutya ota dulika koshipango shaJesus shokuulika ohole oyo tai didilikifa mo ovahongwa, ile ovashikuli vaye?

Opo u mone ouyelele muhapu, lesha oshitukulwa “Is War Compatible With Christianity?”

Mbela osha yuka ngoo kOvakriste okukufa ombinga moita kunena?

Mbela osha yuka ngoo kOvakriste okuhenuka okukufa ombinga moita kunena? Heeno. Ombiibeli oya xunganeka kutya pefimbo letu, ile tu tye “pomaxulilo omafiku,” ovanhu vomoiwana aishe “itave lilongo vali oukwaita,” metwokumwe nomahongo aJesus. — Jesaja 2:2, 4.

• Opo u mone ouyelele muhapu, lesha oitukulwa yOshungonangelo ya pambafana i na oshipalanyole “Kalunga oha tale ko ngahelipi oita?”

Mafiku Jehova,a “Kalunga kombili,” ota ka longifa epangelo laye lomeulu opo a xupife ovanhu ‘komafininiko nomomalwifo.’ — Ovafilippi 4:9; Epsalme 72:14.

• Opo u mone nghee te ke shi ninga, tala okavidio Ouhamba waKalunga oshike?