Ombiibeli otai ti ngahelipi kombinga yomalongelokalunga nosho yo oita oyo i li moUkraine?

Tala ouyelele u na sha novawiliki vomalongelokalunga, ovo va tumbalekwa, nosho yo oita oyo i li moUkraine:

• “Omuwiliki wongeleka yoOrthodox yomoRussia, Patriarch Kirill, ina popya sha shi na sha naashi Russia a ponokela Ukraine. . . . Ashike ongeleka yaye otai tandavelifa omitotolombo kombinga yaUkraine, na Putin ota longifa omahokololo a tya ngaho, opo a yukipalife eenghatu daye dokuponokela Ukraine.” — EUobserver, 7 Marsa 2022.

• “Patriarch Kirill . . . okwa popya a twa omufindo kutya eshi oshilongo shavo sha ponokela Ukraine otashi kondjifa oulunde.” — Eenghundana doAP, 8 Marsa 2022.

• “Omuwiliki wongeleka yoOrthodox yomoUkraine, Metropolitan Epiphanius I womoKyiv, okwa nangeka noupuna oshiwana shavo mOmaandaxa, opo ‘shi ka lwife Ovarussia ovo ve va ponokela.’ . . . Okwa ti yo kutya okudipaa ovakwaita vaRussia kashi fi oulunde.” — Jerusalem Post, 16 Marsa 2022.

• “Fye [Ongudu yoUkrainian Council of Churches and Religious Organizations (UCCRO)] ohatu yambidida etangakwaita laUkraine nosho yo aveshe ovo tava kufa ombinga molwoodi, opo va amene oshilongo shetu, Ukraine. Otwe va nangeka noupuna, opo va amene oshilongo komutondi nohatu va ilikanene.” — Eendjovo doUCCROa, 24 Februali 2022.

Oto ti ngahelipi? Mbela omalongelokalunga, oo hae liti kutya otaa shikula Jesus Kristus, oku na ngo okuladipika oilyo yao i ye moita? Ombiibeli otai ti ngahelipi?

Ondjokonona i na sha nanghee omalongelokalunga a kala tae lidopo moita

Ondjokonona otai ulike kutya omalongelokalunga okwa kala nokupopya kutya inashi puka okuya moita. Okwa kala yo tae liningifa a fa ta lalakanene ombili. Oule womido, Eendombwedi daJehova oda nyaneka pomutenya oipupulu yomalongelokalunga ya tya ngaho. Natu ka taleni koihopaenenwa imwe moishangomwa yetu.

• “The Crusades—A ‘Tragic Illusion’” oya ulika nghee ongeleka yaKatolika ya kufa ombinga momadipao a nyanyalifa tai longifa edina laKalunga nolaKristus.

• “Ongeleka yaKatolika yomuAfrika” oya yelifa nghee elongelokalunga la dopa okukelela oita yopamihoko, oyo nokuli ya etifa omadipao a nyanyalifi.

• Oshitukulwa “Is Religion to Blame?,” “Religion’s Role in Man’s Wars” nosho yo “Religion Takes Sides” oya yelifa nghee ovafita vongeleka yaKatolika, Orthodox nosho yo Protestant va kala nokuyambidida oita ihapu, va ama keembinga adishe.

Mbela Ovakriste ova pumbwa ngoo shili okuyambidida oita?

Osho Jesus a honga: “Kala u hole mukweni ngaashi u lihole mwene.” (Mateus 22:39) “Kaleni mu hole ovatondi veni.” — Mateus 5:44-47.

Osho Jesus a ti: “Ouhamba wange kau fi oshitukulwa shounyuni ou. Ngeno owa li oshitukulwa shounyuni ou, ovashikuli vange ngeno ova lwa opo ndiha yandjwe momake.” (Johannes 18:36) “Aveshe ava tava longifa eongamukonda otava ka fya keongamukonda.” — Mateus 26:47-52.

Diladila kwaashi: Ngeenge Ovakriste kava li va lwa, opo va amene Jesus, mbela ove na ngoo okukufa ombinga moita? Lesha oshitukulwa “Is War Compatible With Christianity?” opo u mone nghee Ovakriste ovadiinini vopefimbo lovayapostoli vaJesus va li va shikula oshihopaenenwa shaJesus nomahongo aye.

Oshike tashi ka ningilwa omalongelokalunga oo haa yambidida oita?

Ombiibeli oya popya kutya Kalunga ina hokwa omalongelokalunga oo hae liti kutya otaa hopaenene Jesus, ashike ihaa shikula omahongo aye. — Mateus 7:21-23; Titus 1:16.

• Embo lEhololo ola ulika kutya Kalunga ota ka pula omalongelokalunga eemwenyo ‘daaveshe ovo va dipawa kombada yedu.’ (Ehololo 18:21, 24) Opo u mone kutya omolwashike, lesha oshitukulwa “What Is Babylon the Great?”

• Jesus okwa ulika kutya omalongelokalunga aeshe, oo ihaa longele Kalunga, otaa ka hanaunwa po omolwoilonga yao ii, ngaashi ashike omuti, oo ihau imi oiimati iwa, ‘tau kewa po ndele tau ekelwa momundilo.’ (Mateus 7:15-20) Opo u mone nghee osho tashi ka ningwa, lesha oshitukulwa “The End of False Religion Is Near!”

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images